លោក Zelensky ដកតំណែងប្រមុខយោធានៅគ្រប់តំបន់ ព្រោះស៊ីសំណូក បើកផ្លូវឲ្យបុរសអ៊ុយក្រែន គេចផុតពីការកែនទ័ព

លោក Volodymyr Zelensky បានបញ្ចប់តំណែងប្រមុខយោធានៅគ្រប់តំបន់នៃប្រទេសអ៊ុយក្រែន បន្ទាប់ពីមានការចោទប្រកាន់ពីបទអំពើពុករលួយថា ប្រមុខយោធាទាំងនោះស៊ីសំណូក ដោយធ្វើជាមិនដឹងមិនឮ បើកផ្លូវឲ្យបុរសអ៊ុយក្រែន រត់គេចពីការរើសទាហាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលទីក្រុង​កៀវ ​បាន​និង​កំពុងកែន​ទាហាន​ ​សម្រាប់​កងវរសេនាតូច ខណៈ​ការ​វាយលុក​របស់​ខ្លួន​ប្រឆាំង​នឹង​កម្លាំង​រុស្ស៊ី នៅតែបន្តដំណើរការទៅមុខ។

បន្ទាប់ពីកិច្ចប្រជុំជាមួយថ្នាក់ដឹកនាំយោធាកាលពីថ្ងៃសុក្រទី១១ខែសីហា លោក Zelensky បានបង្ហោះនៅលើប្រព័ន្ធផ្សព្វផ្សាយសង្គមថា “យើងកំពុងបណ្តេញស្នងការយោធា ក្នុងតំបន់ទាំងអស់។ ប្រព័ន្ធនេះ គួរតែត្រូវបានគ្រប់គ្រងដោយមនុស្សដែលដឹងច្បាស់ថាអ្វីជាសង្រ្គាម និងអ្វីជាអំពើឃោរឃៅ ហើយការសូកប៉ាន់នៅពេលប្រទេសមានសង្រ្គាម គឺជាទង្វើក្បត់ជាតិដ៏ធំធេង”។

ចំណាត់ការនេះ បានឆ្លុះបញ្ចាំងពីកិច្ចខិតខំប្រឹងប្រែងរបស់អ៊ុយក្រែន ដើម្បីទប់ស្កាត់អំពើពុករលួយ ជាផ្នែកនៃកំណែទម្រង់ដ៏ទូលំទូលាយដែលស្នើឡើងដោយសហភាពអឺរ៉ុប។

ក្នុងសេចក្តីថ្លែងការណ៍ដាច់ដោយឡែកមួយ ប្រធានាធិបតីអ៊ុយក្រែន និយាយថា “ក្នុងអំឡុងពេលត្រួតពិនិត្យមជ្ឈមណ្ឌលកែនទាហាន ភ្នាក់ងារអនុវត្តច្បាប់បានលាតត្រដាងករណីនៃអំពើពុករលួយយ៉ាងច្បាស់។ ទាំងនេះ គឺជាការគំរាមកំហែងដល់សន្តិសុខជាតិរបស់អ៊ុយក្រែន និងធ្វើឲ្យប៉ះពាល់ដល់ទំនុកចិត្តនៅក្នុងស្ថាប័នរដ្ឋ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ុយក្រែន ទម្លាយថា ខ្លួនមានគិញសម្ងាត់ នៅ រុស្ស៊ី