កូរ៉េខាងជើង បញ្ចេញប្រព័ន្ធមីស៊ីលប្រឆាំងយន្តហោះថ្មី ដើម្បីកម្ចាត់ការ​ឈ្លានពានរបស់ អាមេរិក

កូរ៉េខាងជើងអាចនឹងដាក់ពង្រាយនាវាផ្ទុកប្រព័ន្ធកាំជ្រួចមីស៊ីលប្រឆាំងយន្តហោះថ្មី ដើម្បីទប់ស្កាត់ និងកម្ចាត់ការឈ្លានពានដោយខុសច្បាប់ពីសំណាក់យន្តហោះឈ្លបយកការណ៍របស់សហរដ្ឋអាមេរិក ។

អ្នកនាំពាក្យរបស់អគ្គសេនាធិការនៃកងទ័ពប្រជាជនកូរ៉េរបស់ទីក្រុងព្យុងយ៉ាងបានចេញសេចក្តីថ្លែងការណ៍មួយថា ការដាកពង្រាយប្រព័ន្ធកាំជ្រួចមីស៊ីលនេះ គឺជាការបន្ថែមកម្លាំងជំនួយដល់កងទ័ព បន្ទាប់ពីបានវាយប្រហារយន្តហោះចម្បាំងរបស់អាមេរិកដែលបានហោះឈ្លានពានចូលទៅក្នុងតំបន់សេដ្ឋកិច្ចរបស់ប្រទេសកូរ៉េខាងជើងចំនួន ៣ ដងកាលពីថ្ងៃព្រហស្បតិ៍ ។

សេចក្តីថ្លែងការណ៍នេះក៏និយាយផងដែរថា កូរ៉េខាងជើងបានត្រៀមខ្លួនរួចជាស្រេចដើម្បីចាត់វិធានការណាមួយសម្រាប់ការការពារអធិបតេយ្យភាពរបស់ខ្លួន ។

ទន្ទឹមនោះ ទីក្រុង​ព្យុងយ៉ាង​ក៏ធ្លាប់បាន​ចោទប្រកាន់​យន្តហោះ​ឈ្លបយកការណ៍​របស់​អាមេរិក​ពី​ការហោះ​ឈ្លានពាន​ខុសច្បាប់រួចមកហើយផងដែរ​កាលពី​ខែកក្កដា​ ។ ក្រោយ​មក រដ្ឋាភិបាលទីក្រុងព្យុងយ៉ាងបានបាញ់សាកល្បងមីស៊ីផ្លោងអន្តរទ្វីបប្រភេទថ្មី ដើម្បីជាការកំញើញទៅដល់អាមេរិក ។

គួរបញ្ជាក់ថា សេចក្តីថ្លែងការណ៍របស់កូរ៉េខាងជើងក៏កើតមានឡើង ចំពេលកិច្ចប្រជុំកំពូលត្រីភាគរវាងសហរដ្ឋអាមេរិក ជប៉ុន និងកូរ៉េខាងត្បូង នៅជំរំប្រធានាធិបតី Camp David ដែលមានទីតាំងជិតទីក្រុងវ៉ាស៊ីនតោន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រដ្ឋមន្ត្រីស្ដីទីក្រសួងយុត្តិធម៌ ថៃ ៖ លោក ថាក់ស៊ីន នឹងនាំទៅពន្ធនាគារ ពេលត្រលប់ចូលស្រុកវិញ