ស្ពាន ១ កន្លែងដាច់​ដោយកម្លាំងទឹកហូរ ខណៈផ្លូវប្របមាត់ប្រឡាយស្រុតបាក់ជាបណ្តើរៗ

ផ្លូវប្របមាត់ប្រឡាយមេ ១ ខ្សែកំពុងរងផលប៉ះពាល់យ៉ាងខ្លាំងពីកម្លាំងទឹកហូរច្រោះបាក់ស្រុតស្ទើរដាច់ទាំងស្រុង ធ្វើឲ្យប្រជាពលរដ្ឋនៅក្នុងភូមិមានការព្រួយបារម្មណ៍ បើសិនជាទឹកភ្លៀងនៅតែបន្តធ្លាក់នៅថ្ងៃនេះឬថ្ងៃស្អែកជាបន្តបន្ទាប់ទៀ ត នឹងអាចប៉ះពាល់ដល់ស្ពានឆ្លងកាត់ប្រឡាយ កាន់តែមានផលលំបាកក្នុងការធ្វើដំណើរឆ្លងកាត់ទៅមកមួយកម្រិតថែមទៀត។ នេះបើតាម លោក ប៊ុន ធឿត ជាពលរដ្ឋរស់នៅក្បែរចំណុចកើតហេតុ ដែលស្ថិតនៅចំណុច ស្ពានភូមិអូរស្លាប៉ាង ឃុំតាគ្រាម ស្រុកបាណន់ ខេត្តបាត់ដំបង បានឲ្យដឹងនៅថ្ងៃទី១៧ ខែកញ្ញា នេះ។

ករណីខាងលើនេះបានកើតឡើង ក្រោយពីមានភ្លៀងធ្លាក់ផ្ទួនៗកាលពីថ្ងៃទី១៦ ខែកញ្ញា ទើបមានទឹកហូរធ្លាក់ពី​ស្ទឹងបវេល ធ្លាក់ចូលអូរដូនពៅ ហើយធ្លាក់ចូលអាងកំពីងពួយ ដោយកម្លាំងទឹកហូរមានសន្ទុះខ្លាំង ទើបធ្វើឲ្យបាក់ស្រុតផ្លូវប្រ បមាត់ប្រឡាយបាក់ស្រុតតែម្តង។

ប្រជាពលរដ្ឋក្នុងភូមិថា បើទឹកនៅតែហូរពីរទៅបីថ្ងៃបន្តទៅមុខទៀតច្បាស់ជាដាច់ផ្លូវទាំងស្រុងជាពុំខាន ហើយពួកគាត់នឹងពិបាក​ក្នុងការធ្វើដំណើរព្រមទាំងប៉ះពាល់ដំណាំក្នុងភូមិផងដែរ។

បើតាមមន្ត្រីអាជ្ញាធរស្រុកបាណន់ និងស្រុកបវេលបានលើកឡើងស្រដៀងគ្នាថា ប្រឡាយមេ ១ ខ្សែខាងលើនេះដើរតួសំខាន់​​ណាស់ក្នុងការនាំទឹកចេញចូលរវាងស្ទឹងបវេលនិងអាងកំពីងពួយ សម្រាប់ប្រជាកសិករស្រោចស្រព​ផលដំណាំ។ ផ្លូវប្រប​មាត់ប្រឡាយនេះដែរ ក៏ជាការសំខាន់សម្រាប់ការដឹកជញ្ជូនរាល់កសិផលរបស់កសិករ បើសិនជាមាន​ផលប៉ះពាល់ខ្លាំង ប្រជាពលរដ្ឋពិតជាមានផលលំបាកក្នុងការធ្វើដំណើរប្រកបមុខរបរ។

ជាមួយគ្នានេះ បើសិនជាភ្លៀងនៅបន្តធ្វើឲ្យស្ទឹងបវេលឡើងព្រៀប អាជ្ញាធរនិងមន្ត្រីជំនាញកំពុងរកវិធានការទប់ស្កាត់នឹងបានបញ្ចៀសទឹកខ្លះៗ ចៀសវាងបាក់ស្រុតផ្លូវកាន់តែមានទំហ៊ំធំ៕

អត្ថបទ៖ សៅ សារិទ្ធ