កម្ពុជា តួកគី ចុះកិច្ចព្រមព្រៀង ស្តីពី ការបើកដំណើរការគ្រឹះស្ថានអប់រំ

កម្ពុជា និង តួកគី ប្រារព្ធពិធីចុះកិច្ចព្រមព្រៀង ស្តីពី ការបើកដំណើរការគ្រឹះស្ថានអប់រំ និងការអនុវត្តសកម្មភាពផ្សេងៗដោយមូលនិធិ Maarif តួកគី នៅក្នុងព្រះរាជាណាចក្រកម្ពុជា។ នេះបើតាមការផ្ដល់ព័ត៌មានដោយ ក្រសួងអប់រំ យុវជន និងកីឡា នៅព្រឹកថ្ងៃទី២២ ខែកញ្ញា ឆ្នាំ២០២៣នេះ។

ពិធីចុះកិច្ចព្រមព្រៀងនេះ ធ្វើឡើងនារសៀលថ្ងៃទី២១ ខែកញ្ញា ឆ្នាំ២០២៣ ដោយ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តី ក្រសួងអប់រំ យុវជន និងកីឡា បានអញ្ជើញជាអធិបតី ក្នុងពិធីចុះកិច្ចព្រមព្រៀងរវាង ក្រសួងអប់រំ យុវជន និងកីឡា និងមូលនិធិ Maarif តួកគី ស្តីពី ការបើកដំណើរការគ្រឹះស្ថានអប់រំ និងការអនុវត្តសកម្មភាពផ្សេងៗដោយមូលនិធិ Maarif តួកគី នៅក្នុងព្រះរាជាណាចក្រកម្ពុជា។

លោកស្រី Ulku Kocaefe អគ្គរដ្ឋទូតតួកគី បានថ្លែងអំណរគុណដល់​ បណ្ឌិតសភាចារ្យ​ ឧបនាយករដ្ឋមន្ត្រី​ ដែលអនុញ្ញាតឱ្យប្រតិភូបានជួបពិភាក្សា និងចុះកិច្ចព្រមព្រៀងនាពេលនេះ។ ក្នុងឱកាសនោះ លោកស្រីបានស្នើសុំអ្នកបង្គោលសម្រាប់ទំនាក់ទំនងការងារនេះ ដើម្បីងាយស្រួលក្នុងការស្វែងរកនូវចំណុចអាទិភាពដើម្បីចាប់ផ្តើមអនុវត្ត។

បណ្ឌិតសភាចារ្យ ឧបនាយករដ្ឋមន្ត្រីបាន អនុញ្ញាតជូន លោក ណុះ ស្លេះ រដ្ឋលេខាធិការ ជាជនបង្គោលក្នុងកិច្ចការងារនេះ និងសូមថ្លែងអំណរគុណចំពោះកិច្ចសហការកន្លងមកជាមួយ និងក្រសួងអប់រំ យុវជន និងកីឡា។ បណ្ឌិតសភាចារ្យ សង្ឃឹមថា ប្រទេសទាំងពីរ និងបន្ដសហការជាមួយគ្នាបន្ថែមទៀតដើម្បីអភិវឌ្ឍវិស័យអប់រំ៕