ពីទីក្រុង​ប៉េកាំង កម្ពុជា​ឈានទៅ​ចុះ​កិច្ចព្រមព្រៀង​​ក្របខណ្ឌ​គម្រោង​​​សាងសង់ “ព្រែក​ជីក​ហ្វូណន​តេជោ”

កាលពី​ល្ងាចថ្ងៃទី១៧ ខែតុលា ឆ្នាំ២០២៣ ពី​រដ្ឋធានីប៉េកាំងសាធារណរដ្ឋប្រជាមានិតចិន រដ្ឋាភិបាល​កម្ពុជា​បានឈានទៅ​ចុះហត្ថលេខាលើ​កិច្ចព្រមព្រៀងក្របខណ្ឌ (Framework Agreement) នៃគម្រោង “ព្រែកជីកហ្វូណនតេជោ” ដោយ​មាន​​ការ​ចូលរួម​ពី​លោក​ឧបនាយករដ្ឋមន្ត្រី ស៊ុន ចាន់ថុល ជាមួយតំណាងក្រុមហ៊ុនសាជីវកម្មស្ពាន និងថ្នល់ចិន (CRBC) ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ការ​ឈាន​ទៅ​ចុះហត្ថលេខាលើ​កិច្ចព្រមព្រៀងក្របខណ្ឌ​នៅ​ពេលនេះ​​ ជាការបោះជំហានទៅរកភាពជោគជ័យ​មួយកម្រិតទៀត​នៃ​ប្រព័ន្ធ​ដឹកជញ្ជូនតាមផ្លូវទឹក​ដ៏ធំរបស់កម្ពុជា។

ក្រោយការ​ចុះ​ហត្ថលេខានេះ នឹង​អនុញ្ញាតឱ្យក្រុមហ៊ុន​ចិន​ CRBC អាចសិក្សាលម្អិតលើគ្រប់ទិដ្ឋភាព​ទាំងអស់ពាក់ព័ន្ធនឹងគម្រោងប្រវត្តិសាស្រ្ត​នេះ​ ដើម្បីកំណត់បានកាន់តែច្បាស់ពីសក្ដានុពលនៃគម្រោងព្រែក​ជីក​ហ្វូណនតេជោទាំងផលចំណេញផ្នែកសេដ្ឋកិច្ច និងសង្គម។

តាមរយៈ​គម្រោងផ្លូវនាវាចរណ៍និងប្រព័ន្ធភស្ដុភារកម្មទន្លេបាសាក់​ដែល​ឈានទៅ​ចុះហត្ថលេខាលើ​កិច្ចព្រមព្រៀងក្របខណ្ឌ​ជាមួយ​ក្រុមហ៊ុន​ចិន នឹង​ពង្រីកវិសាលភាពនៃការប្រើប្រាស់សក្តានុពល​ដឹកជញ្ជូនតាមផ្លូវទឹក​របស់ប្រទេស​កម្ពុជា សំដៅចូលរួមលើកកម្ពស់សកម្មភាពសេដ្ឋកិច្ច-សង្គមឱ្យកាន់តែមានការរីក​ចម្រើន​ឈាន​ទៅមុខមួយកម្រិតថែមទៀត។

តាមការសិក្សាបង្ហាញថា ផ្លូវទឹកព្រែកជីកហ្វូណន-តេជោ មានប្រវែង ១៨០ គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លង​កាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៉ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ ១.៦លាននាក់ រស់នៅអមសងខាងផ្លូវទឹក៕