ប្រធានាធិបតីអាមេរិក ចោទថា លោក ពូទីន និងក្រុមហាម៉ាស់ មានគោលបំណងតែមួយ

ក្នុងសុន្ទរកថានៅការិយាល័យ Oval កាលពីយប់ថ្ងៃព្រហស្បតិ៍ទី១៩ខែតុលា (ត្រូវនឹងព្រឹកថ្ងៃសុក្រទី២០ខែតុលានៅកម្ពុជា) ប្រធានាធិបតីអាមេរិកលោក ចូ បៃដិន បានថ្កោលទោសសកម្មភាពរបស់ក្រុមហាម៉ាស់ និងប្រធានាធិបតីរុស្ស៊ី លោក វ្ល៉ាឌីមៀរ ពូទីន ដោយនិយាយថា ការវាយប្រហារលើអ៊ីស្រាអែល និងការលុកលុយអ៊ុយក្រែន គឺមានគោលបំណងតែមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន និយាយថា “ក្រុមហាម៉ាស់និងលោកពូទីន គឺតំណាងឲ្យការគំរាមកំហែងផ្សេងៗគ្នា ប៉ុន្តែពួកគេមានគោលបំណងតែមួយគឺ ពួកគេទាំងពីរ ចង់បំផ្លាញលទ្ធិប្រជាធិបតេយ្យអ្នកជិតខាងទាំងស្រុង។

លោក បៃដិន បន្តថា “ខ្ញុំដឹង ជម្លោះទាំងនេះអាចហាក់ដូចជានៅឆ្ងាយ ហើយវាជារឿងធម្មតាក្នុងការសួរថាតើហេតុអ្វីបានជារឿងនេះកើតឡើងចំពោះអាមេរិក។ ដូច្នេះខ្ញុំសូមចែករំលែកជាមួយអ្នក អំពីមូលហេតុដែលអ៊ីស្រាអែលនិងអ៊ុយក្រែនទទួលបានជោគជ័យ គឺមានសារសំខាន់សម្រាប់សន្តិសុខជាតិរបស់អាមេរិក”។

លោក បៃដិន បន្ថែមថា “ប្រវត្តិសាស្ត្របានបង្រៀនយើងថា នៅពេលដែលពួកភេរវករមិនទទួលខុសត្រូវចំពោះទង្វើរបស់ពួកគេ នៅពេលជនផ្តាច់ការមិនទទួលខុសត្រូវសម្រាប់ការឈ្លានពានរបស់ពួកគេ ពួកគេនឹងបណ្តាលឲ្យមានភាពចលាចលនិងការស្លាប់ ក៏ដូចជាការបំផ្លិចបំផ្លាញកាន់តែធំ” ។

លោកប្រធានាធិបតីលើកឡើងទៀតថា ប្រសិនបើសហរដ្ឋអាមេរិកមិនជួយបញ្ឈប់បំណងចង់បានអំណាច និងការគ្រប់គ្រងរបស់លោក ពូទីន នៅអ៊ុយក្រែនទេនោះ គាត់នឹងមិនបញ្ឈប់ការលុកលុយនោះទេ ហើយបន្តវាយលុកប្រទេសប៉ូឡូញ ឬនៅក្នុងរដ្ឋបាល់ទិកផ្សេងទៀត ។ ហើយចំពោះជម្លោះជាមួយក្រុមហាម៉ាស់វិញ ការគាំទ្រអ៊ីស្រាអែល គឺជាផ្នែកមួយនៃគោលដៅរបស់សហរដ្ឋអាមេរិក ដើម្បីកសាងអនាគតដ៏ល្អប្រសើរសម្រាប់មជ្ឈិមបូព៌ា៕

ប្រែសម្រួល៖​ Vann Vann

ប្រភព៖ CNN

ចុចអាន៖ អាមេរិក ចេញការព្រមានដល់ពលរដ្ឋខ្លួននៅទូទាំងពិភពលោក ឲ្យប្រយ័ត្នប្រយែង ពេលចេញទៅណាមកណា