អាមេរិក ចេញការព្រមានដល់ពលរដ្ឋខ្លួននៅទូទាំងពិភពលោក ឲ្យប្រយ័ត្នប្រយែង ពេលចេញទៅណាមកណា

កាលពីថ្ងៃព្រហស្បតិ៍ទី១៩ខែតុលា ក្រសួងការបរទេសសហរដ្ឋអាមេរិក បានចេញការព្រមាន “ប្រុងប្រយ័ត្នទូទាំងពិភពលោក” សម្រាប់ពលរដ្ឋអាមេរិកនៅក្រៅប្រទេស ចំពេលមានភាពតានតឹងកើនឡើងខ្លាំង ជុំវិញសង្គ្រាមអ៊ីស្រាអែលនិងក្រុមហាម៉ាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាស់តឿននេះ ណែនាំឲ្យពលរដ្ឋអាមេរិកបង្កើនការប្រុងប្រយ័ត្នពេលចេញទៅណាមកណា ដោយសារតែសក្តានុពលសម្រាប់ការវាយប្រហារភេរវកម្ម បាតុកម្ម ឬសកម្មភាពហិង្សាប្រឆាំងពលរដ្ឋនិងផលប្រយោជន៍សហរដ្ឋអាមេរិក។

ការតវ៉ាបានផ្ទុះឡើងនៅតាមស្ថានទូតអាមេរិកនិងអ៊ីស្រាអែលជុំវិញពិភពលោក រួមទាំងនៅទុយនីស៊ី បារ៉ែន អេហ្ស៊ីប លីបង់ និងម៉ារ៉ុក ផងដែរ បន្ទាប់ពីការទម្លាក់គ្រាប់បែកលើមន្ទីរពេទ្យនៅទីក្រុង ហ្គាហ្សា បានសម្លាប់មនុស្សរាប់រយនាក់កាលពីថ្ងៃអង្គារខណៈ មន្ត្រី​អ៊ីស្រាអែល និង​ប៉ាឡេស្ទីន​ បានចោទ​ដាក់គ្នា ​ចំពោះ​ការ​បំផ្ទុះ​ដ៏​សាហាវ​នោះ។

លោក​ប្រធានាធិបតី បៃដិន បាន​គាំទ្រ​ការ​បដិសេធ​របស់​អ៊ីស្រាអែល ​ចំពោះ​ការ​ទទួល​ខុស​ត្រូវ ហើយ​​និយាយ​ថា ទិន្នន័យ​យោធា​របស់​សហរដ្ឋ​អាមេរិក ​បាន​បង្ហាញ​ថា ​ក្រុម​សកម្មប្រយុទ្ធ​នៅ​តំបន់ ហ្គាហ្សា អាចនៅពីក្រោយរឿងនេះ។

ចាប់តាំងពីការវាយប្រហាររបស់ក្រុមហាម៉ាស់នៅថ្ងៃទី៧ខែតុលាលើអ៊ីស្រាអែលមក ក្រសួងការបរទេសសហរដ្ឋអាមេរិក បានបង្កើនការព្រមានធ្វើដំណើរជាបន្តបន្ទាប់។

កាល​ពី​ថ្ងៃ​ព្រហស្បតិ៍ ក្រសួងក៏​បាន​ចេញ​ការ​ប្រកាស​អាសន្នកុំ​ធ្វើ​ដំណើរទៅ​ប្រទេស​លីបង់ ដែល​មាន​ព្រំប្រទល់​ជាប់​ ​អ៊ីស្រាអែល​​ភាគ​ខាង​ជើង ផងដែរ។

សូមបញ្ជាក់ថា ក្រសួងការបរទេសអាមេរិក ​បាន​ចេញ​ការ​ប្រកាស​អាសន្ន​​ទូទាំង​ពិភពលោកចំនួន១៥លើករួចមកហើយ ​ក្នុង​រយៈពេលពេលមួយទសវត្សរ៍​ចុង​ក្រោយ​នេះ។ ការដាស់តឿនថ្មីបំផុតមុនថ្ងៃព្រហស្បតិ៍ គឺត្រូវបានចេញនៅឆ្នាំ២០២២ បន្ទាប់ពីការស្លាប់របស់មេដឹកនាំក្រុមអាល់កៃដា Ayman al-Zawahiri ចំពេលមានការភ័យខ្លាចនៃអំពើហិង្សាប្រឆាំងអាមេរិក៕

ប្រែសម្រួល៖ Vann Vann

ប្រភព៖ CBS News

ចុចអាន៖ អាមេរិក ចេញការព្រមានដល់ពលរដ្ឋខ្លួននៅទូទាំងពិភពលោក ឲ្យប្រយ័ត្នប្រយែង ពេលចេញទៅណាមកណា