ចូ បៃដិន៖ សហរដ្ឋអាមេរិក នឹងបង្កើត សណ្តាប់ធ្នាប់ពិភពលោកថ្មី 

ប្រធានាធិបតីអាមេរិកលោក Joe Biden បានប្រាប់អ្នកគាំទ្រកាលពីថ្ងៃសៅរ៍ទី២១ខែតុលាថា សណ្តាប់ធ្នាប់ពិភពលោក ដែលដឹកនាំដោយសហរដ្ឋអាមេរិក បច្ចុប្បន្នគឺថមថយហើយ ប៉ុន្តែទីក្រុងវ៉ាស៊ីនតោន នឹងរៀបចំប្រព័ន្ធថ្មីយកទៅជំនួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងយុទ្ធនាការនៅទីក្រុងវ៉ាស៊ីនតោន លោក បៃដិន បានអួតអាងពីរបៀបដែលលោកបញ្ចុះបញ្ចូលប្រទេសជប៉ុននិងកូរ៉េខាងត្បូង ឲ្យបញ្ជូនជំនួយហិរញ្ញវត្ថុទៅអ៊ុយក្រែន និងរបៀបដែលលោកបានចុះហត្ថលេខាលើកិច្ចព្រមព្រៀងផ្លូវដែក និងកំពង់ផែជាមួយសហភាពអឺរ៉ុប ឥណ្ឌា និងអារ៉ាប៊ីសាអូឌីត ក្នុងកិច្ចប្រជុំកំពូល G20 នៅទីក្រុងញូវដែលី កាលពីខែមុន។

លោក បៃដិន ប្រកាសថា “ដូច្នេះ ខ្ញុំគិតថា យើងមានឱកាសធ្វើអ្វីៗបាន ប្រសិនបើយើងមានភាពក្លាហាន និងមានទំនុកចិត្តគ្រប់គ្រាន់លើខ្លួនឯង ដើម្បីបង្រួបបង្រួមពិភពលោកតាមរបៀបដែលមិនធ្លាប់មាន។ យើង​ស្ថិត​ក្នុង​សម័យ​ក្រោយ​សង្គ្រាម​អស់​រយៈ​ពេល ៥០ ឆ្នាំ ដែល​វា​ដំណើរការ​បាន​យ៉ាង​ល្អ ប៉ុន្តែ​សណ្តាប់ធ្នាប់បានថមថយលែងដូចមុន។ យើង​ត្រូវ​ការ​របៀប​រៀប​រយ​ពិភព​លោក​ថ្មី​ ក្នុង​ន័យ​មួយ”។

សណ្តាប់ធ្នាប់ពិភពលោកដែលបានលេចឡើងក្រោយសង្គ្រាមលោកលើកទីពីរ គឺបានចែកជាពីរប៉ូល ដោយសហរដ្ឋអាមេរិក និងសហភាពសូវៀត ប្រជែងគ្នាដណ្តើមឥទ្ធិពល និងឧត្តមភាពភូមិសាស្ត្រនយោបាយ។ យ៉ាងណា ការដួលរលំនៃសហភាពសូវៀត បានឈានទៅរកសណ្តាប់ធ្នាប់ពិភពលោកគ្មានប៉ូល ដោយមានសហរដ្ឋអាមេរិក ជាមហាអំណាចតែមួយគត់។

នៅពេលសហភាពសូវៀតបែកបាក់ ប្រធានាធិបតីអាមេរិកលោក George HW Bush បានប្រកាសជ័យជម្នះលើសង្គ្រាមត្រជាក់ និងការចាប់ផ្ដើមនៃសណ្តាប់ធ្នាប់ពិភពលោកថ្មី ក្នុងសុន្ទរកថារដ្ឋឆ្នាំ១៩៩១របស់គាត់។

បីទសវត្សរ៍ក្រោយមក ខណៈទីក្រុងវ៉ាស៊ីនតោនកំពុងស្វះស្វែងរកមូលនិធិដើម្បីប្រយុទ្ធនឹងសង្រ្គាមបរទេសចំនួនពីរ ការគ្រប់គ្រងរបស់អាមេរិកគឺមិនសូវមានទំនុកចិត្តទេ។ សេដ្ឋកិច្ចរបស់ប្រទេសចិនគឺធំលំដាប់ទី១១លើលោកក្នុងឆ្នាំ១៩៩១ ប៉ុន្តែឥឡូវ បានឡើងមកលំដាប់ទីពីរទៅហើយ៕

ប្រែសម្រួល៖ Vann Vann

ប្រភព៖ RT

ចុចអាន៖ ចូ បៃដិន៖ យើងមិនឲ្យក្រុមហាម៉ាស់ និងលោកពូទីន ឈ្នះទេ