ព័ត៌មានជាតិ

ត្រីមាសដំបូង ពលរដ្ឋជាង ៣ លាននាក់ ចូលរួមយុទ្ធនាការមិនប្រើថង់ប្លាស្ទិក

បានផុស

៣ years មុន

នៅ

ថ្ងៃចន្ទ ៤ ធ្នូ ២០២៣

ដោយ

ក្រសួងបរិស្ថានបានប្រកាសពីសមិទ្ធផលការងារដែលសម្រេចបាននៅក្នុងត្រីមាសដំបូង គឺមានប្រជាពលរដ្ឋជាង ៣ លានអង្គ/នាក់ (៣,១៨៣,៦៧១អង្គ/នាក់) បានចូលរួម និងបានប្ដេជ្ញាចិត្តកាត់បន្ថយការប្រើប្រាស់ថង់ប្លាស្ទិកនៅក្នុងយុទ្ធនាការកាត់បន្ថយការប្រើប្រាស់ប្លាស្ទិកក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបរិស្ថានបានបង្ហាញថា ចាប់តាំងពីការដាក់ចេញយុទ្ធនាការកាត់បន្ថយការប្រើប្រាស់ប្លាស្ទិកក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ចាប់ពីថ្ងៃទី០១ ខែកញ្ញា ២០២៣ នៅក្នុងត្រីមាសដំបូងនេះ សមិទ្ធផលការងារដែលក្រសួងបរិស្ថានសម្រេចបានរួមមាន ប្រជាពលរដ្ឋជាង ៣លានអង្គ/នាក់(៣,១៨៣,៦៧១អង្គ/នាក់) ដែលបានប្ដេជ្ញាចូលរួមយុទ្ធនាការកាត់បន្ថយការប្រើប្រាស់ប្លាស្ទិក។

មិនតែប៉ុណ្ណោះក្រសួងបរិស្ថានក៏អាចសម្រេចបានកូនឈើចំនួន ១,២១៤,៣០០ ដើម ក្នុងចំណោមខេត្ត/ក្រុងចំនួន ២៥ ដែលក្នុងនោះមានប្រភេទឈើប្រណិតៗដូចជា ធ្នុង បេង នាងនួន ក្រញូង ឈើទាល គគី ក្ងោក និងប្រភេទឈើផ្សេងៗ នៃយុទ្ធនាការថ្ងៃ១០ តុលា ២០២៣ ស្តីពីការដាំ និងស្តារព្រៃឈើឡើងវិញសម្រាប់ចែកជូនពលរដ្ឋដោយឥតគិតថ្លៃ និងការដាំដើមឈើត្រូវដាំឲ្យស្របទៅនឹងស្ថានភាពដី សំដៅឲ្យមានការដាំដើមឈើឲ្យច្រើនជាងការកាប់ ដើម្បីបង្កើនការដាំដុះគម្របព្រៃឈើឲ្យបាន ៦០% នៅឆ្នាំ២០៥០ផងដែរ។

បន្ថែមពីនេះ ក្រសួងបរិស្ថានក៏បានដាក់ចេញវិធានការចំនួន ៤ ដើម្បីទប់ស្កាត់បទល្មើសធនធានធម្មជាតិ។ ក្រសួងបរិស្ថានបានអះអាងថា ការសម្រេចចេញនូវផ្លែផ្កាដូចពេលនេះ ដោយសារមានផែនទីបង្ហាញផ្លូវពីរាជរដ្ឋាភិបាលកម្ពុជានីតិកាលទី៧ គឺយុទ្ធសាស្ត្របញ្ចកោណដំណាក់កាលទី១ ដែលមានភាពលំអិត ងាយស្រួលវាស់វែងលទ្ធផលការងារ និងជាក់លាក់នេះហើយ បានរុញច្រានឲ្យនាវាបរិស្ថានកម្ពុជា ឈានឆ្ពោះទៅការអភិវឌ្ឍដោយចីរភាព៕