រដ្ឋមន្ត្រី៖ ក្រសួងអធិការកិច្ច និង ACU មានទិសដៅរួមក្នុងការប្រឆាំងនឹងអំពើពុករលួយ

ក្នុងកិច្ចពិភាក្សាជាមួយអ្នកសារព័ត៌មាន ដែលរៀបចំឡើងដោយក្លិបអ្នកកាសែតកម្ពុជា នាថ្ងៃទី៤ ខែមករា ឆ្នាំ២០២៤នេះ លោករដ្ឋមន្ត្រីក្រសួងអធិការកិច្ច អះអាងថា ក្រសួងអធិការកិច្ច មានបេសកកម្មរួមមួយជាមួយនឹងអង្គភាពប្រឆាំងអំពើពុករលួយ ក្នុងការបង្ការ ទប់ស្កាត់ និងលើកវិធានការ ដើម្បីប្រឆាំងនឹងការប្រព្រឹត្តអំពើពុករលួយ ក៏ដូចជាការលុបបំបាត់បាតុភាពអសកម្មនានានៅក្នុងសង្គម។

បើតាមការគូសបញ្ជាក់ពីលោករដ្ឋមន្ត្រី ហួត ហាក់ ក្រសួងអធិការកិច្ច មានបេសកកម្មចម្បងសំខាន់ៗចំនួន៣ គឺទី១) ការធ្វើអធិការកិច្ចនៅគ្រប់វិស័យ សំដៅប្រឆាំងអំពើពុករលួយ និងបាតុភាពអសកម្មនានា ទី២) តាមដាន ត្រួតពិនិត្យរាល់ការអនុវត្តច្បាប់ និងលិខិតបទដ្ឋានគតិយុត្ត ព្រមទាំងអនុសាសន៍ណែនាំរបស់ប្រមុខរាជរដ្ឋាភិបាល និងទី៣) ក្រសួងអធិការកិច្ច មានតួនាទីទទួលពាក្យបណ្ដឹង អង្កេត និងបោសសម្អាត។ តាមរយៈបេសកកម្មនេះ លោក ហួត ហាក់ បានអះអាងដូច្នេះថា៖ «ទាំងក្រសួងអធិការកិច្ច ទាំងអង្គភាពប្រឆាំងអំពើពុករលួយ រួមទាំងអាជ្ញាធរជាតិសវនកម្ម គឺមានបេសកកម្មរួមគ្នាបង្ការ​ រួមគ្នាទប់ស្កាត់​ រួមគ្នាលើកវិធានការ ដើម្បីប្រឆាំងអំពើពុករលួយ ប្រឆាំងជាមួយអំពើរំលោភអំណាច និងបាតុភាពអសកម្មនានា​ ដែលមាននៅក្នុងប្រទេសកម្ពុជា»។

លោករដ្ឋមន្ត្រី បានចាត់ទុកបេសកកម្មនេះ គឺបានដើរតួនាទីយ៉ាងសំខាន់ណាស់ក្នុងការរួមចំណែកជាមួយរាជរដ្ឋាភិបាលកម្ពុជា ជាពិសេសនៅក្នុងអាណត្តិទី៧នេះ ដើម្បីសម្រេចឱ្យបានជោគជ័យកម្មវិធីនយោបាយ និងយុទ្ធសាស្ត្របញ្ចកោណ​ ដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត ជានាយករដ្ឋមន្ត្រី សំដៅធានាបានអភិបាលកិច្ចល្អ។

តែយ៉ាងណាមិញ លោករដ្ឋមន្ត្រី ហួត ហាក់ ក៏បានគូសរំលេចនូវភាពខុសគ្នារវាងក្រសួងអធិការកិច្ច និងអង្គភាពប្រឆាំងអំពើពុករលួយ ដោយលោក បញ្ជាក់ថា អង្គភាពប្រឆាំងអំពើពុករលួយ មានតួនាទីទទួលពាក្យបណ្ដឹងពីពលរដ្ឋ ហើយតាមដាន ត្រួតពិនិត្យ ស្រាវជ្រាវ និងលើកវិធានការនានា ដែលពាក់ព័ន្ធនឹងបទល្មើសពុករលួយនៅតាមក្រសួង-ស្ថាប័ន អង្គភាពសាធារណៈ និងឯកជនទាំងអស់ ស្របតាមនីតិវិធីធរមាន ដែលមានចែងក្នុងច្បាប់ស្ដិពីការប្រឆាំងអំពើពុករលួយ ។ ប៉ុន្តែ រាល់ការស៊ើបអង្កេតរបស់អង្គភាពប្រឆាំងអំពើពុករលួយ ត្រូវររាយការណ៍ទៅកាន់ក្រុមប្រឹក្សាជាតិប្រឆាំងអំពើពុករលួយ ខណៈក្រសួងអធិការកិច្ច គឺមានកាតព្វកិច្ចធ្វើរបាយការណ៍គោរពជូនសម្ដេចនាយករដ្ឋមន្ត្រី ដែលជាប្រមុខរាជរដ្ឋាភិបាលកម្ពុជា ដើម្បីពិនិត្យ និងសម្រេច។

ទាក់ទងនឹងអាជ្ញាធរជាតិសវនកម្ម ត្រូវបានលោករដ្ឋមន្ត្រី បញ្ជាក់ថា ជាស្ថាប័នជាតិ ដែលមិនស្ថិតនៅក្រោមដំបូលរបស់រាជរដ្ឋាភិបាលឡើយ ពោល គឺស្ថាប័នអាជ្ញាធរជាតិសវនកម្ម ស្ថិតនៅក្រោមរដ្ឋសភា ដែលរបាយការណ៍របស់ស្ថាប័ននេះ ត្រូវរាយការណ៍ទៅកាន់រដ្ឋសភា ហើយអាជ្ញាធរជាតិសវនកម្ម មិនមានភារកិច្ចក្នុងការលើកជាវិធានការណាមួយឡើយចំពោះបញ្ហា ឬបាតុភាពផ្សេងៗ៕