បន្ទាន់! គ្រោងដាក់សាឡង់ ឆ្លងយានយន្ត ពីកោះពេជ្រទៅកាន់កោះនរា រំដោះកកស្ទះ​ផ្លូវ​ជាតិ​លេខ ១

ភ្នំពេញ៖ អាជ្ញាធររាជធានីភ្នំពេញគ្រោងដាក់សាឡង់ឆ្លងយានយន្តនានា ចេញពីកោះពេជ្រទៅកាន់កោះនរា ខណៈដែលស្ពានតភ្ជាប់ពីកោះពេជ្រមកកាន់កោះនរា បានកំពុងសាងសង់យ៉ាងមមាញឹក។

រដ្ឋបាលរាជធានីក៏គ្រោងនសាងសង់ស្ពាន១ទៀតនៅភាគខាងត្បូងផ្លូវជាតិលេខ១ ដើម្បីរំដោះចរាចរណ៍នៅលើផ្លូវជាតិលេខ១។ នេះបើតាមការបញ្ជាក់របស់លោកឃួង ស្រេង អភិបាលរាជធានី ខណៈដែលលោកបានដឹកនាំមន្ត្រីជំនាញនិងអាជ្ញាធរដែនដីចុះពិនិត្យមើលស្ថានភាពជាក់ស្ដែងជុំវិញការអភិវឌ្ឍនិងហេដ្ឋារចនាសម្ព័ន្ធនានានៅលើកោះ នរានាព្រឹក​ថ្ងៃទី ១៧ខែកុម្ភៈឆ្នាំ ២០២១នេះ។

លោក ឃួង ស្រេង បានបញ្ជាក់ឲ្យដឹងថា ដើម្បីដោះស្រាយការកកស្ទះនៅលើកំណាត់ផ្លូវជាតិលេខ១ ខណៈកំណាត់ផ្លូវនេះចរាចរណ៍មមាញឹកខ្លាំង រដ្ឋបាលរាជធានីភ្នំពេញនឹងខ្ចីដីកោះនរា ដាក់សាឡង់ដើម្បីឆ្លងយានយន្តនានាចេញពីកោះពេជ្រមកកាន់កោះនរា ដើម្បីដោះស្រាយបញ្ហាកកស្ទះចរាចរណ៍នៅផ្លូវជាតិលេខ១។ ប៉ុន្តែទោះបីជាយ៉ាងណាក្តីលោកឃួង ស្រេងមិនបានកំណត់ថានឹងចាប់ផ្ដើមដំណើរការនៃការបើកឲ្យដំណើរការនៃការដាក់សាឡង់ឆ្លងយានយន្តនេះនៅពេលណានោះទេ ។

បន្ថែមពីលើនេះទៀតរដ្ឋបាលរាជធានី ក៏គ្រោងនឹងសាងសង់ស្ពាន១ទៀតនៅភាគខាងត្បូងផ្លូវជាតិលេខ១ដែរ ដើម្បីរំដោះ​ចរាចរណ៍នៅលើផ្លូវជាតិលេខ១នេះប៉ុន្តែ គេជឿថាគម្រោងខាងលើនេះមិនយូរទេ នឹងចាប់ផ្តើមដំណើរការហើយ ដោយសារថាការរៀបចំកំពង់ដរទាំងសងខាស្ថាបនាស្ទើរតែរួចរាល់ ១០០% ហើយនោះ៕

អត្ថបទ៖ ស្រីរ័ត្ន