ក្រសួងសុខាភិបាល ចុះពង្រឹងសេវាសាធារណៈថែទាំ ព្យាបាលជំងឺ ខេត្តកោះកុង

លោក ហេង សុទ្ធី អនុរដ្ឋលេខាធិការ ក្រសួងសុខាភិបាល នៅទី១៥ ខែកុម្ភៈ ឆ្នាំ២០២៤ បានអញ្ជើញចុះទៅពិនិត្យស្ថានភាព មណ្ឌលសុខភាពបឹងព្រាវ ចំណុះឱ្យការិយាល័យស្រុកប្រតិបត្តិសុខាភិបាលស្រែអំបិល នៃមន្ទីរសុខាភិបាល នៃរដ្ឋបាលខេត្តកោះកុង ដើម្បីជួយគាំទ្រ ពង្រឹងការផ្តល់សេវាប្រកបដោយប្រសិទ្ធភាព។ នេះបើតាមការផ្ដល់ព័ត៌មាន ពីក្រសួងសុខាភិបាល នៅរសៀលថ្ងៃទី១៦ ខែកុម្ភៈ ឆ្នាំ២០២៤ នេះ។

ការចុះពង្រឹងសេវាសុខាភិបាលនៅមូលដ្ឋាននេះ ធ្វើឡើងក្រោម ណែនាំរបស់ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ព្រមទាំងទទួលបានការចង្អុលបង្ហាញពី ឯកឧត្តមសាស្ត្រាចារ្យ កុយ វ៉ាន់នី និងលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល។

បេសកកម្មក្នុងការចុះអភិបាលនេះ ក្រុមការងារបានជួបពិភាក្សាជាមួយថ្នាក់ដឹកនាំ និងមន្រ្តី នៃការិយាល័យស្រុកប្រតិបត្តិសុខាភិបាលកំពង់សិលា ហើយពិនិត្យការងារជារួម ដោយសង្កត់ធ្ងន់លើ ៥ចំណុច៖

១. ហេដ្ឋារចនាសម្ព័ន្ធ និងស្ថានភាពបរិស្ថានជុំវិញ ២. លទ្ធភាពគ្រប់គ្រងក្នុងការផ្តល់សេវា ៣. ការបំពាក់សម្ភារ បរិក្ខារ និងឱសថ ៤. ធនធានមនុស្ស និងការគ្រប់គ្រង និង ៥ ប្រចាំការ និងបម្រើសេវា ២៤ម៉ោង/៧ថ្ងៃ។

គួរបញ្ជាក់ថា ថ្នាក់ដឹកនាំ និងមន្ត្រីសុខាភិបាល បាន និងកំពុងចុះធ្វើកិច្ចអភិបាលនេះជាប្រចាំ ដើម្បីបង្កើនប្រសិទ្ធភាព នៃការថែទាំ ព្យាបាលជំងឺ ជូនប្រជាពលរដ្ឋដល់មូលដ្ឋានជិតផ្ទះឱ្យកាន់តែប្រសើរឡើង ស្របតាមគោលនយោបាយអាទិភាពលើវិស័យសុខាភិបាល នៃរាជរដ្ឋាភិបាល ក្នុងការពង្រីកសេវាថែទាំសុខភាព ឆ្ពោះទៅរកការគ្របដណ្តប់សុខភាពជាសកល៕