នាយករដ្ឋមន្ត្រី ផ្ញើសារទៅ អ្នកវិនិយោគបរទេស កុំចំណាយពេលមក សុំដាំកញ្ឆានៅកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្ញើសារទៅ អ្នកវិនិយោគបរទេស កុំចំណាយពេលជិះយន្តហោះមក ស្នើសុំសម្ដេច ដើម្បីវិនិយោគដាំកញ្ឆានៅកម្ពុជា។

ការផ្ញើសារនេះ ធ្វើឡើង ក្នុងឱកាស សម្តេចធិបតី ហ៊ុន ម៉ាណែត អញ្ជើញជាអធិបតី បិទសន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធ​ប្រឆាំង​គ្រឿងញៀន និងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី៩ នៅរសៀលថ្ងៃអង្គារ ទី២០ ខែកុម្ភៈ ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត បានរំលឹកថា បញ្ហាមិនអនុញ្ញាតដាំកញ្ឆានៅកម្ពុជា សម្ដេចចធ្លាប់បានចេញសារតាមហ្វេសប៊ុករួចហើយ ប៉ុន្តែថ្មីៗនេះ មានបុគ្គល ២ ៣នាក់ បានសុំច្បាប់វិនិយោគដាំកញ្ឆានៅកម្ពុជា ដើម្បីបម្រើវិស័យសុខាភិបាល ខណៈប្រទេសជិតខាងកម្ពុជា គឺប្រទេសថៃ ក៏បានធ្វើរួចហើយ។

សម្ដេចធិបតី ហ៊ុន ម៉ាណែត បញ្ជាក់បន្តថា៖ “សម្រាប់ខ្ញុំ ខ្ញុំប្រាប់ថា ដរាបណា ហ៊ុន ម៉ាណែត នៅតែជានាយករដ្ឋមន្ត្រី ច្បាប់នេះ ខ្ញុំអត់ឯកភាពទេ។ ចំពោះការគ្រប់គ្រង សួរថា គ្រប់គ្រងបានអត់? ខ្ញុំធ្លាប់ឃើញព័ត៌មានមួយនៅអាមេរិក ប្រទេសមហាអំណាចធំជាងយើង រដ្ឋខ្លះគាត់ឱ្យសិទ្ធិដាំ តែគ្រប់គ្រងអត់រួចដោយសារបញ្ហា២។ ទី១ គ្រប់គ្រងការប្រើប្រាស់អត់បាន ទី២ លួចដាំ លើសអាជ្ញាបណ្ណ”។

សម្ដេចធិបតី ហ៊ុន ម៉ាណែត លើកឡើងបន្ថែមថា រឿងកញ្ឆានេះពាក់ព័ន្ធគ្រឿងញៀន ហើយបើតាមព័ត៌មាននៃការប្រើប្រាស់គ្រឿងញៀននៅសិង្ហបុរី ដែលមានជាង ៤០% គឺបានប្រើតាំងពីក្រោមអាយុ ១៨ឆ្នាំ ហើយក្នុងនោះមាន ៥០% បានចាប់ផ្ដើមប្រើគ្រឿងញៀន ដោយប្រើកញ្ឆា។

សម្ដេចធិបតី ហ៊ុន ម៉ាណែត មានប្រសាសន៍បន្តថា៖ “សម្រាប់កម្ពុជា ខ្ញុំថា មិនសំខាន់អីទេ! វាអត់ចំណេញអីទៅវិនិយោគធ្វើកសិកម្មរាប់រយ រាប់ពាន់ រាប់ម៉ឺនហិកតាដាំកញ្ឆា ដើម្បីផ្គត់ផ្គង់ក្រុមហ៊ុនផលិតថ្នាំនៅកាណាដា ទេ។ អ៊ីចឹង សរុបសេចក្ដី ហើយខ្ញុំជូនសារទៅផង គឺភាគច្រើនអ្នកចង់វិនិយោគមកពីក្រៅប្រទេសដែលសុំវិនិយោគដាំកញ្ឆានៅកម្ពុជា សុំកុំចំណាយពេលជិះកប៉ាល់ហោះមកកម្ពុជា គឺអត់ប្រយោជន៍ ជូនព័ត៌មាន មិនបាច់មកទេ”។

​

គួរបញ្ជាក់ថា គ្រឿងញៀន បានក្លាយទៅជាបញ្ហាដ៏គួរឱ្យព្រួយបារម្ភនៅក្នុងសង្គមកម្ពុជា បន្ទាប់ពីការជួញដូរ និងការប្រើ​ប្រាស់​​មានសភាពកាន់ធ្ងន់ធ្ងរ។ សម្តេចធិបតី ហ៊ុន ម៉ាណែត បានចាត់ទុកការងារប្រយុទ្ធប្រឆាំងគ្រឿង​ញៀន​ជាកិច្ចការដ៏ចាំបាច់មួយសម្រាប់កិច្ចការសន្តិសុខសង្គម ហើយសម្តេចបានដាក់ចេញបទបញ្ជាក្តៅឱ្យ​អាជ្ញាធរពាក់ព័ន្ធរួមគ្នាប្រយុទ្ធប្រឆាំងឱ្យមានប្រសិទ្ធភាព។ ដើម្បីការប្រយុទ្ធប្រឆាំងគ្រឿងញៀនមានប្រសិទ្ធភាព សម្តេចធិបតី ហ៊ុន ម៉ាណែត បានសម្រេចកែសម្រួល​សមាស​ភាពអាជ្ញាធរជាតិប្រយុទ្ធប្រឆាំងគ្រឿងញៀន ដោយបានតែងតាំង ឧបនាយករដ្ឋមន្ត្រី ៤រូប ជាថ្នាក់​ដឹក​នាំអាជ្ញាធរនេះ ហើយមានថ្នាក់ដឹកនាំមកពី ក្រសួង ស្ថាប័នរបស់រដ្ឋចំនួន ១៤ រូបផ្សេងទៀត ជា​សមា​ជិក​។

សម្តេចធិបតី ហ៊ុន ម៉ាណែត ក៏បានប្រកាសចាត់វិធានការក្តៅទៅលើ​ស្ថាប័ន​កងកម្លាំង​ប្រដាប់​អាវុធ​មាន​កង​ទ័ព និងនគរបាលជាតិ ដោយបណ្តេញចេញពីក្របខណ្ឌ បើរកឃើញមានជាប់ពាក់ព័ន្ធនឹងគ្រឿង​ញៀន។ ក្នុងនោះមាន កម្លាំងយោធា និងនគរបាលជាតិមួយចំនួន ត្រូវបានបណ្តេញចេញពីក្របខណ្ឌ​ផង​ដែរ បន្ទាប់ពីរកឃើញជាប់ពាក់ព័ន្ធនឹងគ្រឿងញៀន។ របាយការណ៍របស់ អាជ្ញាធរជាតិប្រយុទ្ធប្រឆាំងគ្រឿងញៀន បានឱ្យដឹងថា ក្នុងឆ្នាំ២០២៣ កន្លងទៅនេះ អាជ្ញាធរ បង្រ្កាបបទល្មើសគ្រឿងញៀនសរុបចំនួន ៨ ០៦៣ ករណី ឃាត់ខ្លួនជនសង្ស័យសរុបចំនួន ២០ ០០២ នាក់។ ចាប់បានគ្រឿងញៀនជិត ៣ តោន។ រឹបអូសសារធាតុគីមីផ្សំបាន ១ តោន និង ៤៦៩ គីឡូក្រាម។ ដុតកម្ទេច និងបន្សាបគ្រឿងញៀន និងសារធាតុពាក់ព័ន្ធជាង ៣៤៧ តោន និង ១ ២០៧ គ្រាប់៕