កម្ពុជាបើកកិច្ចប្រជុំ គណៈកម្មការគ្រប់គ្រងលទ្ធផលបឋមសិក្សា អាស៊ីអាគ្នេយ៍

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២១ ខែកុម្ភៈ ឆ្នាំ២០២៤ នេះ បានអញ្ជើញចូលរួមជាអធិបតី បើកកិច្ចប្រជុំ “គណៈកម្មការគ្រប់គ្រងដឹកនាំរង្វាយតម្លៃលទ្ធផលសិក្សារបស់សិស្សបឋមសិក្សានៅតំបន់អាស៊ីអាគ្នេយ៍ (SEA-PLM) លើកទី១៤”។​

កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំ ក្រសួងអប់រំ យុវជន និងកីឡា ព្រមទាំងនាយកដ្ឋានជំនាញពាក់ព័ន្ធ ព្រមទាំងតំណាងប្រទេសជាសមាជិកពេញសិទ្ធិមកពី ឡាវ វៀតណាម ទីម័រខាងកើត ម៉ាឡេស៊ី ហ្វីលីពីន ភូមា ប្រទេសជាសមាជិកកិត្តិយសមកពី ប្រ៊ុយណេ ថៃ ព្រមទាំងតំណាងដៃគូអភិវឌ្ឍមកពី UNICEF Headquarters, UNICEF EPRO, UNICEF ប្រចាំកម្ពុជា, KICE, KEDI, ACER, ASEAN ROK Cooperation Fund, ASEAN Secretariat, British Council, cApStAn, DaLaSalie University, World Bank, Mission of the Republic of Korea to ASEAN សរុបចំនួន ៦៥នាក់។

ក្រសួងអប់រំ យុវជន និងកីឡា សហការជាមួយ លេខាធិការដ្ឋាន នៃអង្គការរដ្ឋមន្ត្រីអប់រំអាស៊ាន (SEAMEO) បានបើកកិច្ចប្រជុំ “គណៈកម្មការគ្រប់គ្រងដឹកនាំរង្វាយតម្លៃលទ្ធផលសិក្សារបស់សិស្សបឋមសិក្សានៅតំបន់អាស៊ីអាគ្នេយ៍ (SEA-PLM) លើកទី១៤” ដែលប្រព្រឹត្តទៅចាប់ពីថ្ងៃទី២១ ដល់២២ ខែកុម្ភៈ ឆ្នាំ២០២៤ នៅសណ្ឋាគារសុខា ខេត្តសៀមរាប។

ក្នុងឱកាសពិធីបើកកិច្ចប្រជុំនេះ បណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះការគាំទ្រពីគ្រប់ភាគីពាក់ព័ន្ធ ជាពិសេសលេខាធិការដ្ឋាន SEAMEO ដែលបានរៀបចំកិច្ចប្រជុំលើកទី១៤ នៅក្នុងព្រះរាជាណាចក្រកម្ពុជានាពេលនេះ។ កម្ពុជា បានចូលរួមអនុវត្តរង្វាយតម្លៃថ្នាក់តំបន់វដ្តដំបូងនៅឆ្នាំ ២០១៩ (SEA-PLM 2019) ប្រកបដោយជោគជ័យ ព្រមទាំងបានប្រើប្រាស់លទ្ធផលដែលទទួលបានពីរង្វាយតម្លៃ SEA-PLM 2019 ជាមូលដ្ឋានក្នុងការលើកកម្ពស់គុណភាពសិក្សានៅកម្រិតមត្តេយ្យសិក្សា ការសិក្សាអំណាន និងគណិតវិទ្យាថ្នាក់ដំបូង គុណវុឌ្ឍិគ្រូបង្រៀន និងនាយកសាលារៀន ការប្រើប្រាស់បច្ចេកវិទ្យាក្នុងការអប់រំ និងការអប់រំភាពជាពលរដ្ឋសាកល។

ទន្ទឹមនឹងនេះ ដើម្បីលើកកម្ពស់លទ្ធផលសិក្សារបស់សិស្សនៅកម្រិតសាលារៀនឱ្យកាន់តែប្រសើរឡើង ក្រសួងអប់រំ យុវជន និងកីឡា បាននិងកំពុងអនុវត្តការគ្រប់គ្រងតាមសាលារៀន (SBM) សាលារៀនជំនាន់ថ្មី (NGS) និងអនុវត្តស្តង់ដាសាលារៀនគំរូ ដោយផ្តោតលើ ស្តង់ដាទី១. លទ្ធផលសិក្សារបស់សិស្ស ស្តង់ដាទី២. ការបង្រៀននិងរៀន ស្តង់ដាទី៣. ការចូលរួមរបស់សហគមន៍ ស្តង់ដាទី៤. ដំណើរប្រតិបត្តិការនិងរដ្ឋបាលសាលារៀន និងស្តង់ដាទី៥. គណនេយ្យភាពរបស់សាលារៀន។ កម្ពុជាបានត្រៀមខ្លួនរួចជាស្រេចក្នុងការចូលរួមអនុវត្តរង្វាយតម្លៃថ្នាក់តំបន់វដ្តទី២ នៅឆ្នាំ២០២៤ (SEA-PLM 2024) តាមរយៈការចូលរួមបំប៉នសមត្ថភាពរបស់ក្រុមការងារបច្ចេកទេសថ្នាក់ជាតិ ដឹកនាំដោយនាយកដ្ឋានធានាគុណភាពអប់រំ ដែលបានអនុវត្តសាលល្បងដោយជោគជ័យ កាលពីឆ្នាំ២០២៣ កន្លងទៅនេះ។

ក្រសួងអប់រំ យុវជន និង​កីឡា នឹងបន្តប្រើប្រាស់លទ្ធផលដែលទទួលបានរង្វាយតម្លៃថ្នាក់តំបន់វដ្តទី២ នៅឆ្នាំ២០២៤ (SEA-PLM-2024) ជា​មូល​ដ្ឋានក្នុងការបកស្រាយទិន្នន័យទៅជាសកម្មភាពអន្តរាគមន៍ (Translation Data into Implementation) ប្រកបដោយ​ប្រសិទ្ធភាពក្នុងការលើកម្ពស់លទ្ធផលសិក្សារបស់សសិ្សឱ្យកាន់តែប្រសើរឡើង៕