ព័ត៌មានអន្ដរជាតិ

កូរ៉េខាងជើង បញ្ជាឲ្យរឹបអូសទូរសព្ទពីពលករក្រៅប្រទេស ខ្លាចពួកគេបែកគំនិតរត់ចោលស្រុក

បានផុស

១ year មុន

នៅ

ថ្ងៃអង្គារ ៣០ មេសា ២០២៤

ដោយ

Chheang

ពលករកូរ៉េខាងជើង ដែលកំពុងធ្វើការនៅក្នុងប្រទេសរុស្ស៊ី នឹងត្រូវរដ្ឋាភិបាលក្រុងព្យុងយ៉ាងរឹបអូសយកទូរសព្ទដៃរបស់ពួកគេ នៅក្នុងការអនុវត្តវិធានការឃ្លាំមើល និងគ្រប់គ្រងពលករក្រៅប្រទេសមិនឲ្យមានបំណងរត់ចោលស្រុកនោះឡើយ។ នេះបើយោងតាមការចុះផ្សាយរបស់សារព័ត៌មាន Daily NK នៅថ្ងៃទី៣០ ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កុងស៊ុលកូរ៉េខាងជើងនៅរុស្ស៊ី បានទទួលបញ្ជាពីរដ្ឋាភិបាលខ្លួន នៅអំឡុងចុងខែមេសានេះ ឲ្យចាប់រឹបអូសទូរសព្ទពីពលករ ដែលពួកគេបានទិញពីប្រភពមិនត្រូវបានអនុញ្ញាត។ Daily NK បានចុះផ្សាយថា “ទោះបីជានៅក្រៅប្រទេស ពលករកូរ៉េខាងជើងគ្មានសេរីភាពក្នុងការផ្លាស់ប្ដូរទេ ហើយត្រូវតែធ្វើការពេញមួយថ្ងៃ។ រឿងម្យ៉ាងគត់ដែលពួកគេអាចធ្វើបានគឺមើល Youtube នៅលើទូរសព្ទជាមួយប្រព័ន្ធអ៊ីនធឺណិតមើលបានតែព័ត៌មាន ឬក៏ភាពយន្ត កម្មវិធីទូរទស្សន៍ និងកម្មផ្សេងៗខ្លះទៀតពីកូរ៉េខាងជើង”។

ពលករមួយចំនួន បានប៉ុនប៉ងរត់ចោលស្រុក ក្រោយពេលពួកគេបានទិញប្រភេទទូរសព្ទថ្មី ដែលអាចមើលកម្មវិធីព័ត៌មានអន្តរជាតិបាន ហើយធ្វើឲ្យពួកគេដឹងឮរឿងរ៉ាវដ៏ខ្មៅងងឹតពីរដ្ឋាភិបាលក្រុងព្យុងយ៉ាង។ ក្រោយកើតមានហេតុការណ៍ដូច្នេះ មន្ត្រីកូរ៉េខាងជើងបានបញ្ជាឲ្យដកហូតទូរសព្ទរបស់ពលករ ដែលទិញមកខុសពីគោលការណ៍របស់ពួកគេ ក្រោមហេតុផលថា ពលករទាំងនោះអាចនឹងក្លាយជាមនុស្សមិនស្មោះត្រង់នឹងរបបមនោគមវិជ្ជារបស់កូរ៉េខាងជើង។

នៅពេលថ្មីៗនេះ គេសង្កេតឃើញមានកងសន្តិសុខរុស្ស៊ីតែងឈរឃ្លាំមើលពលករកូរ៉េខាងជើងនៅការដ្ឋានសំណង់ជាប់ជាប្រចាំ។

ប្រភពរបស់សារព័ត៌មាន Daily NK បានប្រាប់ថា “ពលករកូរ៉េខាងជើងធ្លាប់ត្រូវគេអនុញ្ញាតឲ្យទៅលេងផ្សារឬភោជនីយដ្ឋានក្បែរៗនោះនៅថ្ងៃអាទិត្យ ដែលជាថ្ងៃឈប់សម្រាក។ ប៉ុន្តែឥលូវពួកគេមិនត្រូវបានអនុញ្ញាតឲ្យចាកចេញសូម្បីតែពីកន្លែងធ្វើការ។ កងសន្តិសុខរុស្ស៊ីល្បាតនៅជុំវិញ ដើម្បីធានាថា ពលករកូរ៉េខាងជើងមិនចាកចេញទៅណាបានភ្លាមៗនោះទេ”៕

ដោយ៖ ឈាង

Related Topics:ប្រទេសកូរ៉េខាងជើង