ផ្ទះពលរដ្ឋជាច្រើនខ្នងក្នុងស្រុកចំនួនពីរនៃខេត្តបាត់ដំបងរងការវាយប្រហារដោយខ្យល់កន្ត្រាក់

ផ្ទះប្រជាពលរដ្ឋជាច្រើនខ្នងនៅក្នុងស្រុកគាស់ក្រឡ និងស្រុកសំពៅលូន ត្រូវបានភ្លៀងមួយមេលាយឡំជាមួយខ្យល់កន្ត្រាក់បោកបក់បំផ្លាញដួលរលំ និងប៉ើងស័ង្កសីរប៉ាត់រប៉ាយពេញវាលស្រែ។

តាមការបញ្ជាក់ពីសមត្ថកិច្ចមូលដ្ឋានបានឲ្យដឹងថា ហេតុការណ៍នេះបានកើតឡើងកាលពីរសៀលថ្ងៃទី៥ ខែឧសភា ឆ្នាំ២០២៤ បានបង្កឲ្យមានភ្លៀងធ្លាក់លាយឡំខ្យល់កន្ត្រាក់ លើកស្រុកគាស់ក្រឡ និងស្រុកសំពៅលូន ខេត្តបាត់ដំបង ក្នុងនោះស្រុកគាស់ក្រឡប៉ពាល់ផ្ទះពលរដ្ឋសរុបចំនួន១០ខ្នង និងស្រុកសំពៅលូន ប៉ះពាល់ផ្ទះពលរដ្ឋមួយចំនួនក្នុងឃុំ ចំនួន៣ គឺឃុំតាស្ដា ឃុំសំពៅលូន  និង ឃុំអង្គរបាន។ 

នៅក្នុងនោះដែរគឺ ឃុំតាស្ដាខូចខាតដល់លំនៅឋានរបស់ប្រជាពលរដ្ឋអស់ចំនួន២ ខ្នង ផ្ទះសាងសង់អំពីឈើ ប្រកដំបូលស័ង្កសី គឺរបើករបាញគ្មានសល់។ឃុំ សំពៅលូន ខូចខាតដល់លំនៅឋានរបស់ប្រជាពលរដ្ឋអស់ចំនួន ២ ខ្នង ដែលផ្ទះសាងសង់ អំពីឈើ ប្រកដំបូលស័ង្កសី និងខូចខាតគ្មានសល់។ ឃុំអង្គរបាន  ខូចខាតផ្ទះពលរដ្ឋ ១ ខ្នង របើកស័ង្កសី និង ក្តារជញ្ជាំង គ្មានសល់ ប៉ុន្តែជាសំណាងល្អគឺពុំមានប៉ះពាល់ដល់អាយុជីវិតមនុស្សឬសត្វឡើយ៕

អត្ថបទ៖ សោ និយមរ័ត្ន