ព័ត៌មានអន្ដរជាតិ

អតីត CEO ក្រុមហ៊ុន ASML៖ ចិន និងអាមេរិក នឹងបន្តឈ្លោះគ្នាលើវិស័យបន្ទះឈីប

បានផុស

២ years មុន

នៅ

ថ្ងៃចន្ទ ៨ កក្កដា ២០២៤

ដោយ

អតីតនាយកប្រតិបត្តិរបស់ក្រុមហ៊ុនផលិតឧបករណ៍ផលិតបន្ទះឈីបហូឡង់ ASML បាននិយាយក្នុងបទសម្ភាសន៍ជាមួយវិទ្យុហូឡង់ BNR កាលពីចុងសប្ដាហ៍ថា ជម្លោះរវាងសហរដ្ឋអាមេរិក និងចិនលើបន្ទះឈីបគឺជាមនោគមវិជ្ជា ដែលមិនផ្អែកលើការពិតនោះទេ ដូច្នេះវានឹងបន្ត។ នេះបើតាមការស្រង់សម្ដីរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wennink ថ្លែងយ៉ាងដូច្នេះថា៖ «ការពិភាក្សាបែបនេះ(បញ្ហាឈីប) មិនធ្វើឡើងដោយផ្អែកលើអង្គហេតុ ឬខ្លឹមសារ ឬតួលេខ ឬទិន្នន័យនោះទេ ប៉ុន្តែផ្អែកលើមនោគមវិជ្ជា»។ លោកបន្តថា៖ «អ្នកអាចគិតតាមចិត្តចង់របស់អ្នកអំពីបញ្ហានេះ ប៉ុន្តែយើងធ្វើជំនួញ ដែលផលប្រយោជន៍ម្ចាស់ភាគហ៊ុនរបស់យើងត្រូវតែគ្រប់គ្រងដោយតុល្យភាព…ប្រសិនបើមនោគមវិជ្ជាធ្វើឱ្យប៉ះពាល់នោះ ខ្ញុំក៏មានបញ្ហាជាមួយវា»។

អតីតនាយកប្រតិបត្តិ ដែលបញ្ចប់អាណត្តិកាលពីខែមេសាដដែល បានគូសថា ក្រុមហ៊ុន ASML មានអតិថិជន និងបុគ្គលិកក្នុងប្រទេសចិនអស់រយៈពេល ៣០ ឆ្នាំមកហើយ ដូច្នេះ ក្រុមហ៊ុនក៏មានកាតព្វកិច្ចដោះស្រាយបញ្ហា។

លោក Wennink បានលើកឡើងទៀតថា អាមេរិកប្រហែលជាគិតថាលោកជាមិត្តនឹងចិន ប៉ុន្តែ «វាមិនពិតទេ។ ខ្ញុំជាមិត្តនឹងអតិថិជនរបស់ខ្ញុំ អ្នកផ្គត់ផ្គង់របស់ខ្ញុំ បុគ្គលិករបស់ខ្ញុំ ម្ចាស់ភាគហ៊ុនរបស់ខ្ញុំ»។ លោកបន្ថែមថា ដោយសារតែបញ្ហាផលប្រយោជន៍ភូមិសាស្រ្តនយោបាយបច្ចុប្បន្ន សង្រ្គាមបន្ទះឈីបនឹងអូសបន្លាយទៅមុខបន្តរយៈពេលយូរទៀត។

គូសបញ្ជាក់ថា ការព្រមានរបស់លោក ធ្វើឡើងខណៈ ASML ដែលជាក្រុមហ៊ុនផលិតឧបករណ៍ផលិតបន្ទះឈីបឈានមុខគេមួយរបស់ពិភពលោក ត្រូវជាប់ខ្លួននៅក្នុងជម្លោះពាណិជ្ជកម្មរវាងសហរដ្ឋអាមេរិក និងចិន។ កន្លងមក សហរដ្ឋអាមេរិក និងសម្ព័ន្ធមិត្ត បានចេញការរឹតត្បឹតលើការនាំចេញឧបករណ៍ផលិតបន្ទះឈីបទំនើបៗទៅចិន ដោយខ្លាចប្រទេសនេះប្រើវាដើម្បីធ្វើទំនើបកម្មយោធា៕

Related Topics: