យុវជន Yamal សម្លឹងឃើញឱកាសបំបែកកំណត់ត្រា​ទី៣ នៅ EURO

កីឡាករវ័យក្មេង Lamine Yamal កំពុងធ្វើឲ្យអ្នកគាំទ្របាល់ទាត់ជុំវិញពិភពលោកមានការភ្ញាក់ផ្អើលយ៉ាងខ្លាំង បន្ទាប់ពីបង្ហាញទម្រង់លេងបានយ៉ាងល្អ ជួយឲ្យក្រុមជម្រើសជាតិអេស្ប៉ាញ​បាន​ឡើងដល់វគ្គផ្ដាច់ព្រ័ត្រពានរង្វាន់ Euro។

គិតមកទល់ពេលនេះកីឡាករ Lamine Yamal បានបំបែកកំណត់ត្រាចំនូន២ រួចមកហើយក្នុងពានរង្វាន់ EURO ឆ្នាំ២០២៤ នៅ​ប្រទេសអាល្លឺម៉ង់។ កំណត់ត្រាទី១ ខ្សែបម្រើស្លាបសញ្ជាតិអេស្ប៉ាញវ័យ​ក្មេង​រូប​នេះ​បានបំបែកកំណត់ត្រាក្លាយជាកីឡាករវ័យក្មេងបំផុតដែលបានបង្ហាញខ្លួននៅជុំចុងក្រោយពានរង្វាន់ EURO ស្ដិតក្នុងវ័យត្រឹមតែ១៦ឆ្នាំនិង​៣៣៨ថ្ងៃ ក្នុងការប្រកួតទល់នឹងក្រុមជម្រើសជាតិក្រូអាត។

កំណត់ត្រទី២ កីឡាករ Yamal បានក្លាយជាកីឡាករវ័យក្មេងបំផុតក្នុងប្រវត្តិសាស្រ្ដពានរង្វាន់អឺរ៉ូ ក្រោយស៊ុតបញ្ចូលទី១គ្រាប់ ទល់នឹង​ក្រុមជម្រើសជាតិបារាំងនៅវគ្គពាក់កណ្ដាលផ្ដាច់ព្រ័ត្រ ក្នុងវ័យត្រឹមតែ១៦ឆ្នាំនិង៣៦២ថ្ងៃ។

ចំពោះកំណត់ត្រាទី៣ Lamine Yamal កំពុងសម្លឹងឃើញគឺកំណត់ត្រាក្លាយជាកីឡាករវ័យក្មេងទី១ ឈ្នះពានរង្វាន់ EURO ប្រសិន​បើ​អេស្ប៉ាញ​ឈ្នះ​ជើង​ឯក​អឺរ៉ូ​ឆ្នាំ​នេះ។

Yamal នឹងឈានចូលអាយុ១៧ឆ្នាំនៅរយៈពេលប៉ុន្មានថ្ងៃខាងមុខនេះហើយ។ ប្រសិនរូបគេអាចជួយឲ្យអេស្ប៉ាញឈ្នះពានរង្វាន់ឆ្នាំនេះទៀត នោះកេរ្តិ៍​ឈ្មោះរបស់គេនឹងត្រូវបានចារក្នុងប្រវត្តិបាល់ទាត់ទ្វីបអឺរ៉ុប និងក្នុងក្រុមជម្រើសជាតិអេស្ប៉ាញ ហើយកំណត់ត្រានេះនឹងពិបាករកកីឡាករណាធ្វើបានណាស់៕

អត្ថបទ៖ ផា រតនា