ព័ត៌មានអន្ដរជាតិ

កូរ៉េខាងជើង បន្តដាក់ពង្រាយគ្រាប់មីន បើទោះជាជួបឧបទ្ទវហេតុច្រើនដងក៏ដោយ

បានផុស

១ year មុន

នៅ

ថ្ងៃពុធ ១៧ កក្កដា ២០២៤

ដោយ

Chheang

យោងតាមសេចក្ដីថ្លែងការណ៍របស់យោធាកូរ៉េខាងត្បូង នៅថ្ងៃពុធទី១៧ ខែកក្កដា ឆ្នាំ២០២៤ ក្រុមទាហានក្រុងព្យុងយ៉ាងនៅតែបន្តដាក់ពង្រាយគ្រាប់មីន និងរបងការពារបន្ថែមទៀតនៅតាមបន្ទាត់ព្រំដែន ក្នុងរយៈពេលប៉ុន្មានខែកន្លងទៅនេះ ថ្វីដ្បិតធ្លាប់កើតមានឧបទ្ទវហេតុជាច្រើនករណីក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុងសេអ៊ូល ថា យោធាកូរ៉េខាងជើង បានបន្តការងាររបស់ពួកគេទាំងបង្ខំ ហើយក្នុងនោះមានខ្លះជាក្រុមទាហានស្ត្រី។ ជាច្រើនខែកន្លងទៅ ធ្លាប់មានគ្រោះថ្នាក់កើតឡើងប្រមាណជា ១០ដង ដូចជា ការផ្ទុះគ្រាប់មីន និងការកើតមានជំងឺគ្រុនក្ដៅ ជាដើម ដែលបណ្ដាលឲ្យមានអ្នកស្លាប់ និងរបួសអស់ជាច្រើននាក់។

ក្រៅតែពីការបង្ករឿងដោយក្រុងព្យុងយ៉ាង រដ្ឋមន្ត្រីក្រសួងការពារជាតិកូរ៉េខាងត្បូង លោក Shin Won-sik បាននិយាយថា យោធារបស់ខ្លួនក៏ប្រឈមផងដែរចំពោះវិបត្តិដ៏ស្មុគស្មាញ ពាក់ព័ន្ធនឹងគ្រោះមហន្តរាយធម្មជាតិ ដែលពិបាកគ្រប់គ្រង និងទាយទុកមុន។ ករណីភ្លៀងធ្លាក់ខ្លាំង បានជះឥទ្ធិពលអាក្រក់ទៅលើទីក្រុងសេអ៊ូល និងតំបន់ជុំវិញ នៅថ្ងៃពុធនេះ ហើយកូរ៉េខាងត្បូង ព្រួយបារម្ភថា នឹងអាចមានការបង្ហូរទឹកទំនប់ពីកូរ៉េខាងជើង នៅអំឡុងពេលភ្លៀងធ្លាក់ខ្លាំង ព្រមទាំងអាចពាំនាំនូវគ្រាប់មីនដែលត្រូវបានដាក់ពង្រាយហូរចូលមកជាមួយផងដែរ។

បន្ថែមពីនេះ កូរ៉េខាងត្បូង បានអះអាងថា ខ្លួនបានត្រៀមទុកមុនរួចជាស្រេច នៅក្នុងករណីមានទាហានកូរ៉េខាងជើង ដែលលួចរត់ចោលស្រុកជាយថាហេតុនៅអំឡុងពេលកំពុងធ្វើការ ក៏ដូចជាការលួចឆ្លងចូលក្នុងតំបន់ព្រំដែនគ្មានយោធារវាងប្រទេសទាំង២។

កាលពីខែមិថុនាកន្លងទៅ យោធាកូរ៉េខាងត្បូង ធ្លាប់បានបាញ់កាំភ្លើងព្រមានប៉ុន្មានលើក បន្ទាប់ពីក្រុមទាហានកូរ៉េខាងជើងលួចឆ្លងបន្ទាត់ព្រំដែន។

សូមបញ្ជាក់ថា បើទោះមានការបិទបញ្ចប់សង្គ្រាមកូរ៉េឆ្នាំ១៩៥០-១៩៥៣ក៏ដោយ ក៏ការប៉ះទង្គិចដោយបង្ហូរឈាម ម្ដងម្កាលនៅតែកើតឡើងដដែល នារយៈពេលប៉ុន្មានទសវត្សរ៍ចុងក្រោយ។ យ៉ាងណាមិញ ឧបទ្ទវហេតុថ្មីៗនៅជិតនឹងខ្សែបន្ទាត់ព្រំដែនគ្មានយោធានេះ ត្រូវគេមើលឃើញថាជាការបង្កើនភាពថ្នាំងថ្នាក់នឹងគ្នារវាងកូរ៉េទាំង២នៅក្នុងកម្រិតថ្មីមួយបន្ថែមទៀត៕

ដោយ៖ ឈាង