ព័ត៌មានអន្ដរជាតិ

អតីតប្រធានាធិបតីរុស្ស៊ី៖ ឆ្នាំ២០៣៤ អ៊ុយក្រែននឹងបាត់វត្តមានពីពិភពលោក

បានផុស

២ years មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

Chheang

ជំនួយការជិតស្និទ្ធរបស់លោក ពូទីន និងជាអតីតប្រធានាធិបតីរុស្ស៊ី លោក Dmitry Medvedev បានអះអាងថា នាពេលឆាប់ៗខាងមុខ វត្តមានរបស់ប្រទេសអ៊ុយក្រែន នឹងរលាយបាត់ពីលើលោកនេះ។ ការលើកឡើងរបស់លោក Medvedev បានធ្វើឡើងនៅអំឡុងពេលផ្ដល់បទសម្ភាសន៍មួយជាមួយសារព័ត៌មានរុស្ស៊ី AIF.ru កាលពីថ្ងៃទី១៦ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជាន់ខ្ពស់ក្រុងមូស្គូរូបនេះ បានបញ្ជាក់ថា ការបាត់វត្តមានរបស់អ៊ុយក្រែន នឹងកើតឡើងនៅក្រោយឆ្នាំ២០៣៤ខាងមុខ ជាឆ្នាំដែលអ៊ុយក្រែនធ្លាប់អះអាងថា ខ្លួននឹងក្លាយជាសមាជិកអង្គការណាតូ។ លោក Medvedev បាននិយាយថា៖«វាមិនមែនជារឿងចៃដន្យទេ ដែលអគ្គលេខាធិការអង្គការណាតូ លោក Jens Stoltenberg បាននិយាយដោយបើកចំហថា វានឹងក្លាយជាសេណារីយ៉ូវិជ្ជមាន ប្រសិនបើអ៊ុយក្រែនចូលរួមជាមួយសម្ព័ន្ធមិត្តនៅឆ្នាំ២០៣៤។ នោះមានន័យថា វានឹងមិនកើតឡើងទេ។ ដល់ពេលនោះ គ្មានមេដឹកនាំបច្ចុប្បន្នណាម្នាក់នៃណាតូ អាចនៅតែកាន់តំណែងរបស់ពួកគេដដែលឡើយ។ វាអាចទៅរួចដែលថា អ៊ុយក្រែន នឹងលែងមានវត្តមានទៀតផងដែរ»។

បន្ថែមពីនេះ លោក Medvedev ក៏បានចោទប្រកាន់អង្គការណាតូដែលជាស្ថាប័នយោធាកំពូលរបស់អឺរ៉ុបនិងអាមេរិកថា ពួកគេបានព្យាយាមប្រើប្រាស់អ៊ុយក្រែនជាមធ្យោបាយដើម្បីកម្ទេចរុស្ស៊ី។ ទន្ទឹមនោះ លោកបានស្ដីបន្ទោសទៅលើរដ្ឋាភិបាលក្រុងកៀវ ចំពោះរឿងដែលមិនអាចឈានទៅដល់កិច្ចចរចាបទឈប់បាញ់មួយដែលគេចង់បានបំផុត។

លោក បាននិយាយថា៖«ដរាបណា យើងអាចបង្ការមហន្តរាយសកលបាន យើងនឹងព្យាយាមធ្វើដូច្នេះទៀត។ គួរឲ្យសោកស្ដាយ សត្រូវរបស់យើងបច្ចុប្បន្ន មិនអាចចែករំលែកនូវមហិច្ឆតារបស់ពួកយើង ហើយយើងមិនអាចជឿជាក់លើឧត្ដមគតិ ឆន្ទៈ និងសេចក្តីប្រាថ្នាចង់បានសន្តិភាពរបស់ពួកគេបានឡើយ។ នេះមានន័យថា អ្វីៗគ្រប់យ៉ាងគឺអាចទៅរួច»។

សូមបញ្ជាក់ថា សម្ដីរបស់លោក Medvedev ធ្វើឡើងស្របពេលដែលភាពតានតឹងរវាងអង្គការណាតូ និងរុស្ស៊ី បានកើនកម្ដៅខ្លាំងដល់ចំណុចខ្ពស់បំផុតមិនធ្លាប់មាននាពេលកន្លងមក ពាក់ព័ន្ធនឹងសង្គ្រាមនៅអ៊ុយក្រែន។ លោក វ៉្លាឌឺមៀរ ពូទីន ប្រធានាធិបតីរុស្ស៊ី បានព្រមានម្ដងហើយម្ដងទៀតចំពោះការប្រើប្រាស់អាវុធនុយក្លេអ៊ែរសម្រាប់ការការពារខ្លួន ហើយរដ្ឋាភិបាលក្រុងមូស្គូបានចោទប្រកាន់ទៅលើសម្ព័ន្ធមិត្តលោកខាងលិចរបស់អ៊ុយក្រែនថា បានជំរុញឲ្យពិភពលោកឆ្ពោះទៅរកការប្រឈមមុខនឹងសង្គ្រាមនុយក្លេអ៊ែរ៕

ដោយ៖ ឈាង

ព័ត៌មានអន្ដរជាតិ១៧ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

ព័ត៌មានអន្ដរជាតិ៧ ថ្ងៃ ago

អ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា