តារាៗ និងស្រ្តីស្បែកខ្មៅអាមេរិក ចេញគាំទ្រលោកស្រី ហារីស ភ្លូកទឹកភ្លូកដី

គ្រាន់តែលោក ចូ បៃដិន ដកបេក្ខភាពចេញពីការឈរឈ្មោះបោះឆ្នោតប្រធានាធិបតី តទល់ជាមួយលោក ត្រាំ ហើយប្រកាសគាំទ្រលោកស្រី កាម៉ាឡា ហារីស ជាអ្នកបន្តវេនភ្លាម ស្រាប់តែពេលនេះ សន្ទុះនៃការគាំទ្ររបស់គណបក្សប្រជាធិបតេយ្យ មានការហក់ឡើងគួរឲ្យកត់សម្គាល់ ដល់ថ្នាក់តារាល្បីៗរបស់អាមេរិក និងស្រ្តីស្បែកខ្មៅរាប់ម៉ឺននាក់ ក៏ចេញមកគាំទ្រភ្លូកទឹកភ្លូកដីផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងគេគឺតារាសម្តែង Jamie Lee Curtis ដែលចាត់ទុកលោកស្រី ហារីស គឺជា មនុស្សគួរឲ្យទុកចិត្ត។ ហារីស គឺជាអ្នកតស៊ូមតិដ៏ក្លាហានសម្រាប់សិទ្ធិនារីនិងពណ៌សម្បុរ ហើយសាររបស់លោកស្រី គឺជាក្តីសង្ឃឹមនិងការរួបរួមសម្រាប់អាមេរិក។

ទន្ទឹមនោះ តារា​ចម្រៀង Katy Perry ក៏​បង្ហោះ​សារ​ជា​វីដេអូ​លើ Instagram ផងដែរ ដោយ​ក្នុងនោះនាងបាន​ច្រៀងយ៉ាងខ្លី​ថា “វាជា​ពិភព​របស់​មនុស្ស​ស្រី ហើយ​អ្នក​មាន​សំណាង​ណាស់​ដែល​បាន​រស់​នៅ​ក្នុងពិភព​នេះ”។

មិនត្រឹមប៉ុណ្ណឹង តារាកំប្លែង Jon Stewart ព្រមទាំងតារាសម្តែងនិងជាតារាចម្រៀងឈ្នះពានរង្វាន់អូស្ការ Barbra Streisand សុទ្ធតែបានចេញមុខគាំទ្រលោកស្រី ហារីស យ៉ាងពេញទំហឹង។

ក្រៅពីតារាល្បី គេក៏ឃើញមានស្រ្តីស្បែកខ្មៅរាប់ម៉ឺននាក់ទូទាំងសហរដ្ឋអាមេរិក នាំគ្នាចូលរួមវីដេអូ Call តាមកម្មវិធី Zoom កាលពីរាត្រីថ្ងៃអាទិត្យ ដើម្បីបង្ហាញការគាំទ្រដល់លោកស្រី ហារីស ផងដែរ។

អ្នកចូលរួមក្នុងកម្មវិធីនេះមួយចំនួនបានលើកឡើងថា ប្រសិនបើត្រូវបានតែងតាំងជាបេក្ខជនឈរឈ្មោះគណបក្សប្រជាធិបតេយ្យមែន លោកស្រី ហារីស ច្បាស់ជាឈ្នះលោក ត្រាំ ព្រោះលោកស្រី មានប្រៀបទាំងអាយុនិងកំណត់ត្រាបទល្មើសព្រហ្មទណ្ឌ។

សូមបញ្ជាក់ថា កាម៉ាឡា ហារីស គឺជាស្ត្រីជនជាតិស្បែកខ្មៅ ឬអ្នកមានដើមកំណើតអាស៊ីខាងត្បូង ដំបូងគេ ដែលឡើងឋានៈជាអនុប្រធានាធិបតីអាមេរិក ហើយប្រសិនបើលោកស្រី ក្លាយជាបេក្ខជនតែងតាំងខាងគណបក្សប្រជាធិបតេយ្យ រួចឈានទៅដល់ការផ្តួលលោក ដូណាល់ ត្រាំ ក្នុងការបោះឆ្នោតខែវិច្ឆិកាមែននោះ ហារីស នឹងក្លាយជាស្ត្រីទីមួយដែលកាន់តំណែងជាប្រធានាធិបតីសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ ត្រួសៗ​អំពីលោកស្រី កាម៉ាឡា ហារីស ដែលលោក បៃដិន គាំទ្រជា​បេក្ខភាព​ប្រធានាធិបតី​អាមេរិក