ព័ត៌មានជាតិ

អាជីវករបឹងកេងកង ណាដែលមិនអនុវត្តវិធានការរបស់ក្រសួងសុខាភិបាល ត្រូវប្រឈមនឹងការបិទតូបបណ្ដោះអាសន្ន

បានផុស

៥ years មុន

នៅ

ថ្ងៃព្រហស្បតិ៍ ៤ មីនា ២០២១

ដោយ

អាជីវករលក់ដូរនៅក្នុងផ្សារបឹងកេងកងទាំងអស់ បើមិនអនុវត្តវិធានការរបស់ក្រសួងសុខាភិបាល ក្នុងការទប់ស្កាត់ជំងឺកូវីដ-១៩ទេ គណៈកម្មការផ្សារនិងធ្វើការបិទតូបលក់ដូររបស់បងប្អូនជាបណ្ដោះអាសន្ន ដើម្បីជាការព្រមានដល់អាជីវករផ្សេងទៀតឲ្យពួកគាត់អនុវត្តនូវវិធានរបស់ក្រសួងសុខាភិបាល ក្នុងការចូលរួមទប់ស្កាត់ជំងឺ-១៩ ខណៈដែលជំងឺនេះបាននិងកំពុងរាតត្បាតចូលក្នុងសហគមន៍ជាថ្មីម្ដងទៀត នោះគឺព្រឹត្តិការណ៍សហគមន៍២០កុម្ភ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការបញ្ជាក់របស់លោក ឯក និមល ប្រធានគណៈកម្មការផ្សារបឹងកេងកង ខណៈដែលលោកដឹកនាំក្រុមការងារចុះចែកម៉ាស និងធ្វើការណែនាំដល់បងប្អូនប្រជាពលរដ្ឋនិងអាជីវករនៅក្នុងផ្សារបឹងកេងកងកាលពីព្រឹកថ្ងៃទី០៤ខែមិនានេះ។ លោក ឯក និមល បានមានប្រសាសន៍លើកឡើងថា អនុវត្តតាមការណែនាំរបស់ក្រសួងសុខាភិបាល ក៏ដូចជាការណែនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ គណៈកម្មការផ្សារបឹងកេងកង បានដាក់ម៉ាស៊ីនវាស់កម្ដៅបាញ់អាល់កុលនិងបំពាក់ប្រព័ន្ធ QR Code ទប់ស្កាត់កូវីដ Stop Covid នៅតាមច្រកទាំង១៣ចេញចូលផ្សារ ជាមួយនិងការចែកម៉ាស ចុះណែនាំជាប្រចាំឲ្យបងប្អូនប្រជាពលរដ្ឋនិងអាជីវករឲ្យអនុវត្តតាមវិធានរបស់ក្រសួងសុខាភិបាល ដូចជាការពាក់ម៉ាស លាងដៃនឹងអាល់កុល ជែល និងការរក្សាគម្លាតសុខភាពជាដើម។

លោកបានបញ្ជាក់ផងដែរថា នៅផ្សារបឹងកេងកងក្នុងព្រឹត្តិការណ៍សហគមន៍២០កុម្ភៈនេះ មិនមានអ្វីប្រែប្រួលដូចកាលពីមុនឡើយ ពោលគឺកាលពីផ្ទុះកូវីដ-១៩ដំបូង ប្រជាពលរដ្ឋមានការភ្ញាក់ផ្អើលភ័យខ្លាចច្រើន នាំគ្នាពពាក់ពពូនមកទិញស្បៀងទុក។ តែសម្រាប់ពេលនេះ ប្រជាពលរដ្ឋមិនដូចមុនទេ គឺការលក់ដូរ ការទិញនៅរក្សា ភាពដើម ជាធម្មតា។ ប៉ុន្តែទោះបីជាយ៉ាងណាក្តី គណៈកម្មការផ្សារ នៅតែបន្តធ្វើការអប់រំផ្សព្វផ្សាយឲ្យបងប្អូនប្រជាពលរដ្ឋអនុវត្ត ឲ្យបានខ្ជាប់ខ្ជួននូវវិធានរបស់ក្រសួងសុខាភិបាល ដើម្បីរួមគ្នាទប់ស្កាត់ជំងឺកូវីដ-១៩ទាំងអស់គ្នា។ចំពោះបងប្អូនអាជីវករ ដែលមិនព្រមអនុវត្តតាមការណែនាំរបស់ក្រសួងសុខាភិបាល គណៈកម្មការផ្សារនិងបិទតូបលក់ដូររបស់បងប្អូនជាបណ្ដោះអាសន្ន ដើម្បីជាការព្រមាន៕