ព័ត៌មានអន្ដរជាតិ
អ៊ីស្រាអែល សម្លាប់មេបញ្ជាការម្នាក់ទៀតហើយរបស់ក្រុមហាម៉ាស
ការវាយប្រហារតាមដែនអាកាសរបស់អ៊ីស្រាអែលកាលពីថ្ងៃសុក្រ បានសម្លាប់មេបញ្ជាការម្នាក់ឈ្មោះ Samer al-Hajj របស់ក្រុមសកម្មប្រយុទ្ធហាម៉ាស នៅក្នុងប្រតិបត្តិការរួមគ្នាមួយរវាងកងកម្លាំងការពារជាតិអ៊ីស្រាអែល និងទីភ្នាក់ងារសន្តិសុខ Shin Bet ដែលធ្វើឡើងក្នុងទីក្រុង Sidon ស្ថិតនៅភាគខាងត្បូងប្រទេសលីបង់។
យោងតាមសេចក្តីថ្លែងការណ៍របស់យោធា និងទីភ្នាក់ងារសន្តិសុខ Shin Bet លោក al-Hajj គឺជាអ្នកដែល «ជំរុញការវាយប្រហារភេរវកម្ម និងការបាញ់មីស៊ីលពីលីបង់ឆ្ពោះទៅកាន់ទឹកដីអ៊ីស្រាអែល»។ សេចក្តីថ្លែងការណ៍ដដែល បានបញ្ជាក់ទៀតថា លោក al-Hajj គឺជាមេបញ្ជាការកងកម្លាំងយោធារបស់ក្រុមហាម៉ាសនៅក្នុងជំរុំជនភៀសខ្លួនប៉ាឡេស្ទីន Ein al-Hilweh ក្បែរទីក្រុង Sidon ហើយមានតួនាទី «ជ្រើសរើស និងបណ្តុះបណ្តាលភេរវករដើម្បីវាយប្រហាររដ្ឋអ៊ីស្រាអែល»។
ទីភ្នាក់ងារសារព័ត៌មានជាតិផ្លូវការរបស់ប្រទេសលីបង់ បានរាយការណ៍ថា លោក al-Hajj កំពុងធ្វើដំណើរក្នុងរថយន្ត SUV មួយគ្រឿង នៅពេលរងការវាយប្រហារដោយមីស៊ីលចំនួន២គ្រាប់របស់អ៊ីស្រាអែល។ ក្នុងការវាយប្រហារនោះ អង្គរក្សរបស់លោក al-Hajj ម្នាក់បានរងរបួសធ្ងន់ធ្ងរ។
ក្រៅពីសម្លាប់លោក al-Hajj កងកម្លាំងការពារជាតិអ៊ីស្រាអែល បាននិយាយថា ខ្លួនក៏បានវាយប្រហារទៅលើគោលដៅរបស់ក្រុមសកម្មប្រយុទ្ធហេសបូឡានៅភាគខាងត្បូងប្រទេសលីបង់ផងដែរ កាលពីល្ងាចថ្ងៃសុក្រ រួមមានទាំងការបាញ់គ្រាប់រ៉ុកកែតចូលទៅក្នុងភូមិ Kfarhamam ដែលជាទីតាំងប្រើប្រាស់សម្រាប់ការវាយប្រហារលើភាគខាងជើងប្រទេសអ៊ីស្រាអែល។
យោធាអ៊ីស្រាអែល បានបន្ថែមថា ក៏មានការវាយប្រហារលើហេដ្ឋារចនាសម្ព័ន្ធរបស់ក្រុមហេសបូឡាផ្សេងទៀតនៅភូមិ Ayta ash-Shab ភូមិ Markaba ភូមិ Mhaibib និងភូមិ Kafr Kila ។
សូមបញ្ជាក់ថា ចាប់តាំងពីថ្ងៃទី៨ខែតុលាឆ្នាំ២០២៣ ហេសបូឡាដែលជាក្រុមសកម្មប្រយុទ្ធមានការគាំទ្រពីអ៊ីរ៉ង់ បានវាយប្រហារលើអ៊ីស្រាអែល និងប៉ុស្តិ៍យោធានៅតាមព្រំដែនជារៀងរាល់ថ្ងៃ។ ក្រុមហេសបូឡា បាននិយាយថា ខ្លួនកំពុងធ្វើដូច្នេះដើម្បីគាំទ្រដល់តំបន់ហ្គាហ្សា បន្ទាប់ពីការវាយប្រហារភេរវកម្មមុន១ថ្ងៃរបស់ក្រុមហាម៉ាសលើភាគខាងត្បូងទឹកដីអ៊ីស្រាអែល៕
ដោយ៖ ឈាង
-
ព័ត៌មានអន្ដរជាតិ១២ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច២ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
កីឡា៣ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៥ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ