ព័ត៌មានជាតិ

អ្នកនាំពាក្យអប់រំ ៖ ដំណើរការប្រឡងឌីប្លូម ឆ្នាំនេះ ប្រព្រឹត្តិទៅដោយរលូន មិនមានភាពមិនប្រក្រតីកើតឡើងទេ

បានផុស

២ years មុន

នៅ

ថ្ងៃអង្គារ ៣ កញ្ញា ២០២៤

ដោយ

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី ០៣ កញ្ញា នេះថា សម្រាប់ដំណើរការប្រឡងសញ្ញាបត្រមធ្យមសិក្សាបឋមភូមិ ឬ ឌីប្លូម ឆ្នាំនេះ បានប្រព្រឹត្តិទៅដោយរលូន មិនមានភាពមិនប្រក្រតីណាមួយកើតឡើងគួរឱ្យកត់សម្គាល់នោះទេ។

លោកស្រីបានបន្តថា «ខ្ញុំសង្កេតឃើញថាការប្រឡងនេះបានដំណើរការទៅបានល្អប្រសើរ ដោយបេក្ខជនប្រឡងបានយល់ដឹងពីគោលការណ៍ នៃការប្រឡង និងគោរពវិន័យបានល្អ ហើយមិនត្រឹមតែប៉ុណ្ណោះបានបង្ហាញពីការផ្លាស់ប្តូរអាកប្បកិរិយាបានល្អ ដោយមិនមាននាំយកចម្លើយវិញ្ញាសា ទូរស័ព្ទ ឬ ប្រ៊ុយយ៉ុង ចូលក្នុងមណ្ឌលប្រឡងឡើយ»។

លោកស្រីបានបន្តទៀតថា បើទោះបីជាប្រឡងឌីប្លូមនេះក្រសួងប្រគល់សិទ្ធដល់គ្រឹះស្ថានសិក្សាចាប់តាំងពីការរៀបចំវិញ្ញាសាដំណើរការសំណេរ កំណែស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ ដោយប្រើប្រាស់បុគ្គលិកអប់រំនៅក្នុងគ្រឹះស្ថានមធ្យមសិក្សារបស់ខ្លួនធ្វើជាមេប្រយោគប្រឡងក៏ដោយ ក៏ក្រសួងនៅតែប្រកាន់ខ្ជាប់នូវគោលការណ៍គុណភាពសុក្រឹតភាព និងលទ្ធផលអាចទទួលយក បានទាំងអស់គ្នាដដែល ដោយក្រសួងបានចេញសេចក្តីណែនាំឱ្យគ្រឹះស្ថាននីមួយៗ ត្រូវគោរព និងអនុវត្តឱ្យបានខ្ជាប់ខ្ជួន។ លើសពីនេះ មន្ទីរអប់រំ យុវជន និងកីឡារាជធានី-ខេត្តនីមួយៗ ក៏ត្រូវចូលរួមតាមដាន និងឃ្លាំងមើលពីដំណើរការប្រឡងនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបន្ថែមថា សម្រាប់ឆ្នាំនេះ ក្រសួងអប់រំ យុវជន និងកីឡា បានរៀបចំប្រឡងសញ្ញាបត្រមធ្យមសិក្សាបឋមភូមិ ឬឌីប្លូម នៅថ្ងៃទី ២ ខែកញ្ញា និងប្រកាសលទ្ធផលនៅថ្ងៃទី ៩ ខែកញ្ញា ឆ្នាំ ២០២៤ ដោយមានបេក្ខជនដាក់ពាក្យប្រឡងចំនួន ២០១ ៧១២ នាក់ ស្រី ១០៧ ៨០៦ នាក់ ចែកជា ២ ០៩៦ មណ្ឌល ទាំងរដ្ឋ និងឯកជន។ តួលេខនេះ បើធៀបទៅនឹងប្រឡងឆ្នាំមុនឃើញថា មានការកើនឡើង ២៣ ៥៧៨ នាក់ ដោយឆ្នាំមុនមានបេក្ខជនចូលរួមប្រឡង ចំនួន ១៧៨ ១៣៤ នាក់ ស្រី ៩៤ ៨០៥ នាក់ មានចំនួន ១ ៧៤៣ មណ្ឌល ចែកជា ៨០៩០ បន្ទប់៕

អត្ថបទ ៖ សំអឿន