ឥណ្ឌូណេស៊ី ត្រៀម​បង្កើត​គម្រោង​ពិនិត្យ​សុខភាព​មិន​យក​លុយ ចាប់​ពី​ឆ្នាំ​២០២៥

ប្រធានាធិបតី​ទើប​ជាប់ឆ្នោតរបស់ឥណ្ឌូណេស៊ី លោក Prabowo Subianto គ្រោងនឹង​បង្កើត​កម្មវិធីពិនិត្យសុខភាពដោយឥតគិតថ្លៃ ដែល​​ជា​ជំហាន​ដំបូង​ផ្តោត​សំខាន់​លើប្រជាជន​ចំនួន៥៥លាននាក់ ចាប់ពីឆ្នាំ​២០២៥។

គំនិតផ្តួចផ្តើម​នេះ នឹងផ្តោតលើសូចនាករសុខភាពសំខាន់ៗដូចជា សម្ពាធឈាម ជាតិស្ករក្នុងឈាម អាស៊ីតទឹកនោម និងការ​តាមដាន​ដំបូងនៃជំងឺធ្ងន់ធ្ងរ។

សេវា​សុខភាពដ៏មានមហិច្ឆតានេះ ស្របតាមកិច្ចខិតខំប្រឹងប្រែងរបស់រដ្ឋាភិបាលក្នុងការប្រយុទ្ធប្រឆាំងនឹងជំងឺរបេង ដែលនៅតែជាបញ្ហាប្រឈមផ្នែកសុខភាពសាធារណៈដ៏សំខាន់នៅក្នុងប្រទេសឥណ្ឌូណេស៊ី។ បច្ចុប្បន្ន ប្រទេស​អាស៊ី​មួយ​នេះ​ជាប់ចំណាត់ថ្នាក់ទី​២​ នៅលើពិភពលោកសម្រាប់ករណីជំងឺរបេង ដោយមានមនុស្សប្រមាណ ១០​ម៉ឺន​​នាក់បានស្លាប់ដោយសារជំងឺនេះជារៀងរាល់ឆ្នាំ។

នៅក្នុងដំណាក់កាលដំបូង កម្មវិធីពិនិត្យសុខភាពដោយឥតគិតថ្លៃនឹងផ្តល់អាទិភាពដល់បុគ្គលដែលមានអាយុលើសពី ​៥០​ឆ្នាំ ក៏ដូចជាអ្នកដែលចាត់ទុកថាមានហានិភ័យខ្ពស់នៃការឆ្លងជំងឺរបេង ឬជំងឺធ្ងន់ធ្ងរផ្សេងទៀត។ ក្នុងរយៈពេល​៥​ឆ្នាំខាងមុខ កម្មវិធីនេះនឹងពង្រីកដល់ប្រជាជនប្រមាណ ២០០​លាននាក់។

លោក Hasan Nasbi ប្រធានការិយាល័យទំនាក់ទំនងប្រធានាធិបតី បានបង្ហាញនៅក្នុងបទសម្ភាសន៍ជាមួយទូរទស្សន៍​ក្នុង​ស្រុក​មួយ​ថា រដ្ឋាភិបាលរបស់លោក Prabowo នឹង​យក​ថវិកាសរុបចំនួន ៥​ទ្រី​លានរូពី (៣៣០​លានដុល្លារអាមេរិក) ពីសេចក្តីព្រាងថវិការដ្ឋឆ្នាំ២០២៥ ដើម្បីផ្តល់មូលនិធិដល់កម្មវិធីពិនិត្យសុខភាពដោយឥតគិតថ្លៃ និងកែលម្អហេដ្ឋារចនាសម្ព័ន្ធថែទាំសុខភាព។

លោក Hasan បានបន្ត​ថា ក្នុងចំណោមនោះ ប្រាក់​៣,៣​ពាន់ពាន់លានរូពី ត្រូវបានបែងចែកជាពិសេសសម្រាប់គំនិតផ្តួចផ្តើមពិនិត្យសុខភាព ខណៈដែល ១,៧​ពាន់ពាន់លានរូពី​ នឹងត្រូវប្រើ​ពង្រីកកន្លែងថែទាំសុខភាព រួមទាំងការសាងសង់មន្ទីរពេទ្យថ្មីផងដែរ៕

ដោយ៖ ឈាង