គ្រាប់បែកអាមេរិក សល់ពីសម័យសង្គ្រាមលោកលើកទី២ ផ្ទុះនៅព្រលានយន្តហោះជប៉ុន

តាមការចុះផ្សាយរបស់ BBC, គ្រាប់បែកអាមេរិកមួយគ្រាប់សល់ពីសម័យសង្គ្រាមលោកលើកទី២ ដែលកប់នៅអាកាសយានដ្ឋាន Miyazaki ប្រទេសជប៉ុន បានផ្ទុះកាលពីថ្ងៃពុធទី២ខែតុលាឆ្នាំ២០២៤ បង្កើតជារណ្តៅដ៏ធំ បណ្តាលឲ្យជើងហោះហើរជាង៨០ជើង ត្រូវលុបចោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណា មិនមានអ្នកស្លាប់និងរបួសទេ ហើយក៏មិនមានយន្តហោះនៅក្បែរនោះដែរ ពេលគ្រាប់បែកផ្ទុះ។

ពាក់ព័ន្ធបញ្ហានេះ ប្រធានខុទ្ទកាល័យជប៉ុនលោក Yoshimasa Hayashi និយាយថា «មិនមានការគំរាមកំហែងផ្ទុះលើកទីពីរទេ ហើយបច្ចុប្បន្នប៉ូលិសនិងក្រុមពន្លត់អគ្គិភ័យ កំពុងពិនិត្យនៅកន្លែងកើតហេតុ»។

ស្ថិតនៅភាគអាគ្នេយ៍នៃកោះ Kyushu, អាកាសយានដ្ឋាន Miyazaki ត្រូវបានសាងសង់ឡើងក្នុងឆ្នាំ១៩៤៣ ជាមូលដ្ឋានទ័ពជើងទឹករបស់អធិរាជជប៉ុន។

គ្រាប់មិន​ទាន់​ផ្ទុះ​ផ្សេង​ទៀត​ដែលទម្លាក់ដោយ​អាមេរិក​ ត្រូវ​បាន​រក​ឃើញ​នៅ​ការដ្ឋាន​សំណង់​ក្បែរ​នោះ​ក្នុង​ឆ្នាំ២០០៩និង២០១១ ខណៈមានគ្រាប់​​មិន​ទាន់​ផ្ទុះជាច្រើន​នៅ​តែ​កប់​ពេញ​ប្រទេស។

បើយោងតាមទីភ្នាក់ងារព័ត៌មាន Reuters, គ្រាប់បែកសរុប ២ ៣៤៨គ្រាប់ ទម្ងន់៤១តោន ត្រូវបានដោះក្នុងអំឡុងឆ្នាំ២០២៣នៅប្រទេសជប៉ុន៕

អត្ថបទ៖ សុខ សុវណ្ណ

ចុចអាន៖ លោក Ishiba ក្លាយ​ជានាយករដ្ឋមន្ត្រី​ផ្លូវការ​របស់​ជប៉ុន