ព្យុះ Milton ធ្វើឲ្យផ្អើលសត្វក្រពើ ចេញមកតាមផ្លូវក្នុងរដ្ឋ Florida 

ក្រៅពីបង្កទុក្ខលំបាកដល់មនុស្សហើយនោះ ព្យុះសង្ឃរា Milton ក៏វាយប្រហារសួនសត្វផងដែរដោយបណ្តាលឲ្យសត្វជាច្រើនរួចពីទ្រុង ហើយសូម្បីតែសត្វព្រៃក៏ផ្អើលដែរ ជាពិសេសមានអ្នករដ្ឋ Florida ម្នាក់បានថតជាប់សត្វក្រពើ វារមកជិតរថយន្តរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធរឿងនេះ អ្នកជំនាញសត្វព្រៃព្រមានថា ដោយសារតែព្យុះ Milton មានសត្វជាច្រើនដែលកំពុងផ្អើលហើយរកផ្លូវទៅកន្លែងដើមវិញ ដូច្នេះពួកវាកំពុងស្ថិតនៅពាសពេញផ្លូវឬអាចចូលទៅក្នុងផ្ទះរបស់ពលរដ្ឋទៀតផង។

រឿងដែលគេបារម្ភគឺថា សត្វក្រពើគឺសម្បូរខ្លាំងណាស់នៅក្នុងរដ្ឋ Florida ពោលគឺមាននៅពាសពេញតាមទន្លេស្ទឹងបឹងបួ ហើយគេរកឃើញក្រពើនៅតំបន់ទាំង៦៧របស់រដ្ឋនេះ។

ក្រៅពីក្រពើ មន្ត្រីសត្វព្រៃក៏ព្រមានឲ្យពលរដ្ឋត្រូវប្រុងប្រយ័ត្នចំពោះសត្វពស់ និងសត្វសាហាវផ្សេងទៀតផងដែរ ដែលពួកវាអាចសំងំលាក់ខ្លួននៅក្នុងផ្ទះ។

សូមបញ្ជាក់ជាថ្មី ព្យុះសង្ឃរា Milton បានវាយប្រហាររដ្ឋ Florida ក្នុងនាមព្យុះប្រភេទទី៣ ជាមួយកម្លាំង២០៥គីឡូម៉ែត្រក្នុងមួយម៉ោង ហើយឥទ្ធិពលរបស់វា បង្កើតឲ្យមានខ្យល់កួចយ៉ាងសាហាវ ភ្លៀងផ្គររន្ទះ និងទឹកជំនន់ទូទាំងតំបន់តែម្តង។

គិតត្រឹមព្រឹកថ្ងៃសុក្រទី១១ខែតុលាឆ្នាំ២០២៤ ចំនួនមនុស្សស្លាប់ដោយសារព្យុះនេះ បានកើនដល់១៦នាក់ហើយ ខណៈគេបារម្ភថា តួលេខជនរងគ្រោះនឹងបន្តឡើងបន្ថែមទៀត ព្រោះនៅមានមនុស្សជាច្រើនកំពុងបាត់ខ្លួន។

ក្រៅពីឆក់យកជីវិតមនុស្ស ព្យុះ Milton ក៏បង្កទុកវេទនាដល់មនុស្សរាប់លាននាក់ផងដែរ ពោលគឺបានផ្តាច់អគ្គិសនីដល់ផ្ទះជាង៣.៣លានខ្នងនិងអាជីវកម្មរាប់ម៉ឺនកន្លែង៕

អត្ថបទ៖ សុខ សុវណ្ណ

ចុចអាន៖ ចំនួនមនុស្សស្លាប់ដោយសារព្យុះកំណាច Milton នៅរដ្ឋ Florida កើនឡើងកាន់តែច្រើន