ភាព​តានតឹង​ថ្មី​គ្របដណ្ដប់​​បង់ក្លាដែស ខណៈ​ក្រុម​បាតុករ​និស្សិត​ទាមទារ​ឲ្យ​ប្រធានាធិបតី​លាលែង​ពី​តំណែង

ភាពតានតឹងផ្នែកនយោបាយនៅក្នុងប្រទេសបង់ក្លាដែសបានកើនឡើងសារជាថ្មី បន្ទាប់ពីក្រុមនិស្សិតឈានមុខមួយក្រុមបានអំពាវនាវឱ្យប្រធានាធិបតីរបស់ប្រទេសនេះលាលែងពីមុខ​ដំណែង ជុំវិញការលើកឡើងរបស់គាត់ដែលហាក់ដូចជាសហការជាមួយ អតីតនាយករដ្ឋមន្ត្រី Sheikh Hasina ដែល​និរទេស​ខ្លួន​​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី២៤ខែតុលានេះ។

រដ្ឋាភិបាលបណ្តោះអាសន្នត្រូវបានគេរំពឹងថានឹងរៀបចំកិច្ចប្រជុំគណៈរដ្ឋមន្ត្រីដើម្បីពិភាក្សាអំពីបញ្ហានេះនៅថ្ងៃព្រហស្បតិ៍នេះ ខណៈដែលក្រុមបាតុករនិស្សិតបានចោទប្រកាន់ប្រធានាធិបតី Mohammed Shahabuddin ពីបទសហការជាមួយរបប «ហ្វាស៊ីសនិយម» របស់លោកស្រី Hasina ដោយសារពេលសួរដេញដោលអំពីសំបុត្រលាលែងពីតំណែងរបស់ Hasina លោកហាក់ស្រពិចស្រពិល។

ចលនានិស្សិតដែលប្រឆាំងបានកំណត់រយៈពេលពីរថ្ងៃសម្រាប់ Shahabuddin ដើម្បីចុះចេញពីតំណែង។ បាតុកររាប់រយនាក់បានប្រមូលផ្តុំគ្នានៅរដ្ឋធានី Dhaka កាលពីថ្ងៃអង្គារ និង​ដល់ថ្ងៃពុធ ខណៈដែលអ្នកផ្សេងទៀតព្យាយាមសម្រុកចូលវិមានប្រធានាធិបតី ដែលបង្ខំឲ្យមន្ត្រីសន្តិសុខបានប្រើគ្រាប់បែកផ្សែងដើម្បីបំបែកហ្វូងមនុស្ស។

បើយោងតាមលោក Shahabuddin បានប្រាប់កាសែតជាភាសាបង់ក្លាដែសនៅដើមសប្តាហ៍នេះថា គាត់មិនបានឃើញលិខិតលាលែងពីតំណែងរបស់ Hasina ខណៈដែលលោកស្រីបានភៀសខ្លួនទៅប្រទេសឥណ្ឌាក្នុងខែសីហា អំឡុងពេលមានការបះបោរដឹកនាំដោយសារបាតុកម្មនិស្សិត។

រដ្ឋាភិបាលបណ្តោះអាសន្នមួយដឹកនាំដោយម្ចាស់ជ័យលាភីណូបែល Muhammad Yunus បានឡើងកាន់អំណាច និងបង្កើតរដ្ឋាភិបាលមួយបន្ទាប់ពី Hasina បានលាលែងពីតំណែងកាលពីថ្ងៃទី៥ ខែសីហា។

លោកថាលោក គ្រាន់តែលឺអំពីការលាលែងពីតំណែងរបស់ Hasina ប៉ុន្តែមិនបានឃើញសំបុត្រនោះទេ ដោយនិយាយថាគាត់បានព្យាយាមប្រមូលវា «ជាច្រើនដងប៉ុន្តែមិនបានសម្រេច» និងបានបន្ថែមថា «ប្រហែលជាHasinaមិនមានពេលធ្វើនោះទេ»។

សេចក្តី​ថ្លែងការណ៍​នោះ​បានធ្វើឲ្យមានការ​ខឹងសម្បារ​ដល់​រដ្ឋាភិបាល​ដឹកនាំ​ដោយ​លោក Yunus និង​សកម្មជន​និស្សិត។ វាផ្ទុយនឹងការប្រកាសរបស់លោក Shahabuddin ទៅកាន់ប្រទេសជាតិកាលពីថ្ងៃទី ៥ ខែសីហាដែលថាគាត់បានទទួលសំបុត្រនោះ។

នៅក្រោមរដ្ឋធម្មនុញ្ញរបស់ប្រទេសបង់ក្លាដែស នាយករដ្ឋមន្ត្រីជាប់ឆ្នោតត្រូវតែដាក់លិខិតលាលែងពីតំណែងជាលាយលក្ខណ៍អក្សរទៅកាន់ប្រធានាធិបតី។ ខណៈដែលលោក Shahabuddin ត្រូវបានតែងតាំងឱ្យកាន់តំណែងដោយសភាបន្ទាប់ពី Hasina ត្រូវបានជ្រើសរើសជានាយករដ្ឋមន្ត្រីសម្រាប់អាណត្តិទី៤ ជាប់ៗគ្នាក្នុងខែមករា។ ហើយលោកShahabuddin ក៏បានរំលាយសភាមុនពេលរដ្ឋាភិបាលបណ្តោះអាសន្នចូលកាន់អំណាចនៅថ្ងៃទី៨ ខែសីហា។

ជាមួយគ្នានេះលោក Asif Nazrul ទីប្រឹក្សាច្បាប់របស់ប្រទេសនេះ ថ្មីៗនេះបានចោទប្រកាន់ Shahabuddin ពីការផ្សព្វផ្សាយព័ត៌មានមិនពិត ហើយបានចោទសួរថាតើគាត់សមនឹងបន្តកាន់តំណែងដែរឬទេ។ ទោះយ៉ាងណាអ្នក​ជំនាញ​បាន​និយាយ​ថា ការ​លាលែង​ពី​តំណែង ឬ​ដក​តំណែង​ប្រធានាធិបតី​អាច​បង្កើត​ភាព​ខ្វះ​ចន្លោះ​នៃ​រដ្ឋធម្មនុញ្ញ ដោយនៅក្រោមរដ្ឋធម្មនុញ្ញ មានតែសភាទេដែលអាចចោទប្រកាន់ប្រធានាធិបតីបាន។

ពេលនេះ Hasina ស្ថិតនៅក្នុងប្រទេសឥណ្ឌា ប៉ុន្តែរដ្ឋាភិបាលដែលដឹកនាំដោយលោក Yunus បាននិយាយថា ខ្លួននឹងស្វែងរកការនាំខ្លួនអតីនាយករដ្ឋមន្ត្រីរូបនេះមកវិញ ដើម្បីកាត់ទោសពីបទឧក្រិដ្ឋកម្មប្រឆាំងមនុស្សជាតិ៕

អត្ថបទ៖ ប៊ុន សុភាព