ការបោះឆ្នោតជាប្រវត្តិសាស្ត្រនៅបង់ក្លាដែស ក្រោយបដិវត្តន៍ Gen Z

ជួរមនុស្សយ៉ាងវែងបានចាប់ផ្តើមតម្រង់ជួរតាំងពីមុនថ្ងៃរះនាថ្ងៃព្រហស្បតិ៍​ទី​១២​កុម្ភៈ​នេះ ខណៈដែលប្រជាពលរដ្ឋបង់ក្លាដែសបានចាប់យកឱកាសដំបូងក្នុងរយៈពេលជិតពីរទសវត្សរ៍ ដើម្បីចូលរួមក្នុងការបោះឆ្នោតដោយសេរី និងយុត្តិធម៌។ នេះ​បើយោង​តាម​ការ​ផ្សាយ​របស់​ទីភ្នាក់ងារ​ព័ត៌មាន​រ៉យទ័រ។

នេះគឺជា​ពេល​វេលាដ៏សំខាន់ដែលកើតឡើងបន្ទាប់ពីការដួលរលំនៃរបបដឹកនាំដ៏យូរអង្វែងរបស់លោកស្រី Sheikh Hasina កាលពីឆ្នាំ២០២៤ ដែលជាបដិវត្តន៍បង្កើតឡើងដោយយុវជន «Gen Z» ហើយឥឡូវនេះបានឈានពីការតវ៉ាតាមដងផ្លូវមកកាន់ហឹបឆ្នោតវិញ។ ជាមួយនឹងការហាមឃាត់គណបក្ស Awami League និងការនិរទេសខ្លួនរបស់លោកស្រី Hasina បរិយាកាសបោះឆ្នោតពោរពេញដោយក្តីសង្ឃឹមថ្មី។

ការប្រកួតប្រជែងនេះធ្វើឡើងរវាងសម្ព័ន្ធភាពធំៗពីរ គឺគណបក្សជាតិនិយមបង់ក្លាដែស (BNP) ដឹកនាំដោយលោក Tarique Rahman និងក្រុមឥស្លាមនិយម Jamaat-e-Islami ដឹកនាំដោយលោក Shafiqur Rahman។ ក្រៅពីការជ្រើសរើសសមាជិកសភាចំនួន​៣០០​រូប ប្រជាពលរដ្ឋក៏ត្រូវបោះឆ្នោតលើការធ្វើប្រជាមតិដើម្បីកែទម្រង់រដ្ឋធម្មនុញ្ញ ដែលរៀបចំឡើងដើម្បីទប់ស្កាត់ការវិលត្រឡប់នៃរបបផ្តាច់ការ។ ការកែទម្រង់ទាំងនោះរួមមាន ការកំណត់អាណត្តិនាយករដ្ឋមន្ត្រីត្រឹម​២​អាណត្តិ ការបង្កើតសភាពីរថ្នាក់ និងការធានា​ឲ្យ​មានរដ្ឋាភិបាលបណ្តោះអាសន្នអព្យាក្រឹតសម្រាប់រៀបចំការបោះឆ្នោតនាពេលអនាគត។ លោក Muhammad Yunus ម្ចាស់ពានរង្វាន់ណូបែលសន្តិភាព និងជាប្រមុខរដ្ឋាភិបាលបណ្តោះអាសន្ន បានចាត់ទុកការបោះឆ្នោតនេះថាជា «ការបង្ហាញតាមរដ្ឋធម្មនុញ្ញ» នៃស្មារតីភ្ញាក់រលឹករបស់ប្រជាជនប្រឆាំងនឹងអយុត្តិធម៌សង្គម។

ជាមួយនឹងការដាក់ពង្រាយកម្លាំងសន្តិសុខជាង ៣០០ ០០០​នាក់ ដើម្បីរក្សាសណ្តាប់ធ្នាប់ ដំណើរការបោះឆ្នោតដ៏មានសន្តិភាពនាថ្ងៃនេះ ត្រូវបានអ្នកសង្កេតការណ៍អន្តរជាតិចាត់ទុកថាជាភស្តុតាងដ៏រឹងមាំនៃការរស់ឡើងវិញនៃលទ្ធិប្រជាធិបតេយ្យនៅក្នុងប្រទេសដែលមានប្រជាជន ១៧៥​លាននាក់នេះ។

ទោះបីជាមានការចូលរួមយ៉ាងច្រើនកុះករ និងមានគណបក្សរហូតដល់៥១​ចូលរួមប្រកួតប្រជែងក៏ដោយ ក៏បញ្ហាប្រឈមជាច្រើននៅតែបន្តកើតមាន។ វិស័យកាត់ដេរ និងសេដ្ឋកិច្ចសំខាន់ៗផ្សេងទៀតកំពុងព្យាយាមងើបឡើងវិញពីភាពវឹកវរ ហើយ​អ្នកបោះឆ្នោតបានលើកឡើងថា អំពើពុករលួយ និងអតិផរណាគឺជាកង្វល់ចម្បងរបស់ពួកគេ៕

ប្រែសម្រួល៖ ឈាង