មុនបោះឆ្នោត លោកត្រាំ និយាយប៉ុន្មានម៉ាត់ នាំឲ្យគេបារម្ភ បើគាត់ចាញ់ទៀត

ក្នុងយុទ្ធនាការឃោសនាបោះឆ្នោតនៅទីក្រុង Lititz នៃរដ្ឋ Pennsylvania កាលពីថ្ងៃអាទិត្យទី៣ខែវិច្ឆិកាឆ្នាំ២០២៤ បេក្ខជនគណបក្សសាធារណរដ្ឋលោក ដូណាល់ ត្រាំ ប្រកាសថា លោកស្តាយណាស់ដែលចាកចេញពីសេតវិមានក្រោយបរាជ័យក្រោមថ្វីដៃលោក ចូ បៃដិន ក្នុងឆ្នាំ២០២០ ហើយអះអាងជាថ្មីថា ជ័យជម្នះរបស់លោកត្រូវគេលួច។ រឿងនេះធ្វើឲ្យគេបារម្ភថា ក្នុងការឆ្នោតលើកនេះ បើលោកត្រាំចាញ់ទៀត គាត់ក៏ប្រហែលជាមិនទទួលស្គាល់លទ្ធផលដដែរ ហើយអាចញុះញ៉ង់ឲ្យអ្នកគាំទ្រធ្វើបាតុកម្មថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកគាំទ្រ, អតីតប្រធានាធិបតីរូបនេះបានស្តីបន្ទោសខ្លាំងៗថា សហរដ្ឋអាមេរិកបានប្រែទៅជាប្រទេសបរាជ័យ ក្រោមការដឹកនាំរបស់ក្រុមមនុស្សល្ងីល្ងើ ហើយគូប្រជែងខាងគណបក្សប្រជាធិបតេយ្យមិនអាចទប់ស្កាត់លំហូរជនចំណាកស្រុកខុសច្បាប់ ឆ្លងព្រំដែនមកពីប្រទេសម៉ិកស៊ិកបានទេ។ លោកនិយាយថា «យើងមានព្រំដែនដែលមានសុវត្ថិភាពបំផុតក្នុងប្រវត្តិសាស្ត្រនៃប្រទេសរបស់យើង គឺជាថ្ងៃដែលខ្ញុំចាកចេញ។ ខ្ញុំមិនគួរចាកចេញទេ! និយាយ​ដោយ​ស្មោះ យើង​ធ្វើ​បាន​ល្អហើយ»។

មកទល់ពេលនេះ លោក ត្រាំ មិនដែលទទួលស្គាល់ថាគាត់ចាញ់ឆ្នោតឆ្នាំ២០២០ឡើយ បើទោះបីជាតុលាការមិនអាចរកឃើញព័ស្តុតាង នៃការលួចបន្លំសន្លឹកឆ្នោតក៏ដោយ។

យ៉ាងណានៅទីបំផុត គាត់សុខចិត្តលាលែងពីតំណែងជាប្រធានាធិបតី បន្ទាប់ពីក្រុមអ្នកគាំទ្រគណបក្សសាធារណរដ្ឋ សម្រុកចូលវិមានកាពីតូលនៅថ្ងៃទី៦ខែមករា ឆ្នាំ២០២១ ដើម្បីអុកឡុកពិធីប្រកាសជ័យជម្នះផ្លូវការរបស់លោក ចូ បៃដិន។

អ្វីដែលគេកត់សម្គាល់ខ្លាំងគឺថា នៅពេលសួរថាតើលោក ត្រាំ នឹងទទួលយកលទ្ធផលបោះឆ្នោតឆ្នាំ២០២៤នេះដែរឬក៏អត់? លោកបានប្រកាសក្នុងអំឡុងពេលជជែកដេញដោលប្រធានាធិបតីកាលពីខែកញ្ញាថា លោកនឹងទទួលយក ប្រសិនបើវាជាការបោះឆ្នោតដ៏ត្រឹមត្រូវ ស្របច្បាប់ និងយុត្តិធម៌។

សម្តីបែបនេះ ធ្វើឲ្យគេបារម្ភមែនទែន ព្រោះថា គេសង្ស័យថា លោកត្រាំ ទំនងមិនទទួលស្គាល់បរាជ័យឡើយ ប្រសិនបើគាត់ចាញ់អ្នកស្រីកាម៉ាឡា ហារីសនៅថ្ងៃ៥វិច្ឆិកានេះ៕

អត្ថបទ៖ សុខ សុវណ្ណ

ចុចអាន៖ មុនបោះឆ្នោតមួយថ្ងៃ, ពាក្យចចាមអារ៉ាមនិងព័ត៌មានក្លែងក្លាយ កំពុងចែកចាយ ពេញសហរដ្ឋអាមេរិក