មុនបោះឆ្នោតមួយថ្ងៃ, ពាក្យចចាមអារ៉ាមនិងព័ត៌មានក្លែងក្លាយ កំពុងចែកចាយ ពេញសហរដ្ឋអាមេរិក

នៅថ្ងៃអង្គារទី៥ខែវិច្ឆិកាឆ្នាំ២០២៤នេះ ការបោះឆ្នោតជ្រើសរើសប្រធានាធិបតីសហរដ្ឋអាមេរិក នឹងចូលមកដល់ យ៉ាងណាមិញ មួយថ្ងៃមុនព្រឹត្តិការណ៍ជាប្រវត្តិសាស្រ្តនេះ, បណ្តាញសង្គមកំពុងតែវាយលុកដោយពាក្យចចាមអារ៉ាម ការចោទប្រកាន់មិនពិត និងរឿងភូតកុហក អំពីដំណើរការបោះឆ្នោត ក្នុងកម្រិតយ៉ាងធ្ងន់ធ្ងរមិនធ្លាប់មានពីមុនមកសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មានក្លែងក្លាយជាច្រើនពាក់ព័ន្ធភាពមិនប្រក្រតីនៃការបោះឆ្នោត កំពុងត្រូវបានចែកចាយទាំងពីសំណាក់អ្នកគាំទ្រគណបក្សសាធារណរដ្ឋនិងប្រជាធិបតេយ្យ ក៏ដូចជាក្រុមអ្នកឯករាជ្យ ​ហើយសូម្បីតែរដ្ឋាភិបាលទីក្រុងវ៉ាស៊ីនតោន ក៏ចោទប្រកាន់ភាគីបរទេសជាពិសេសរុស្ស៊ីតែម្តងថា កំពុងសាបព្រោះព័ត៌មានមិនពិតដើម្បីធ្វើឲ្យគ្រប់គ្នាបាត់ទំនុកចិត្តលើដំណើរការនេះដែរ។

មានអ្នកសាធារណរដ្ឋបង្ហោះសារតាមអនឡាញថា កាលឆ្នាំ២០២០ លោក ដូណាល់ ត្រាំ ត្រូវគេប្លន់ជ័យជម្នះម្តងហើយ គាត់ប្រហែលជាត្រូវគេប្លន់ម្តងទៀតនៅថ្ងៃ៥វិច្ឆិកានេះ។

ក្នុងសេចក្តីរាយការណ៍របស់ BBC នៅថ្ងៃចន្ទទី៤ខែវិច្ឆិកាឆ្នាំ២០២៤, ពួកគេថែមទាំងអះអាងថា មានវីដេអូបង្ហាញពីអ្នកគ្មានសិទ្ធបោះឆ្នោតបាននាំគ្នាទៅបោះឆ្នោត, ការនិយាយបង្ខូចអំពីការបោះឆ្នោតតាមប្រៃសណីយ៍ និងការទាញយកភាគីរុស្ស៊ីមកពាក់ព័ន្ធក្នុងដំណើរការនេះ ដើម្បីបំផ្លាញទំនុកចិត្តនៃការបោះឆ្នោត។

លើសពីនេះ នៅក្នុងតំបន់ Northhampton នៃរដ្ឋ Pennsylvania, មានវីដេអូមួយត្រូវគេបង្ហោះ លើបណ្តាញសង្គម X ដែលបង្ហាញពីបុរសម្នាក់ យកធុងឆ្នោតទៅទម្លាក់ចោលនៅតុលាការ ប៉ុន្តែតាមពិតគាត់គឺជាបុគ្គលិកប្រៃសណីយ៍ ដែលប្រមូលសន្លឹកឆ្នោតសោះ។ យ៉ាងណា ក្នុងរយៈពេលខ្លីប៉ុណ្ណោះ វីដេអូនេះត្រូវ គេចូលមើលច្រើនជាងប្រាំលានដង បាត់ទៅហើយ។ 

អ្វីដែលគេបារម្ភខ្លាំងគឺភាពចលាចលក្នុងការបោះឆ្នោតនេះតែម្តង ព្រោះនៅពេលសួរថាតើលោក ត្រាំ នឹងទទួលយកលទ្ធផលបោះឆ្នោតឆ្នាំ២០២៤នេះដែរឬក៏អត់? លោកបានប្រកាសក្នុងអំឡុងពេលជជែកដេញដោលប្រធានាធិបតីកាលពីខែកញ្ញាថា លោកនឹងទទួលយក ប្រសិនបើវាជាការបោះឆ្នោតដ៏ត្រឹមត្រូវ ស្របច្បាប់ និងយុត្តិធម៌។

សូមបញ្ជាក់ថា បើយោងតាមការស្ទង់មតិរបស់ CNN / SSRS ដែលបញ្ចេញនៅថ្ងៃចន្ទ ភាគច្រើននៃជនជាតិអាមេរិក ពោលគឺ៧០% គិតថា លោកត្រាំ នឹងមិនសុខចិត្តទទួលស្គាល់លទ្ធផលបោះឆ្នោតឡើយ ប្រសិនបើគាត់បរាជ័យ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ព្រមានឲ្យ ត្រាំ ប្រយ័ត្នត្រូវគេធ្វើឃាត រឿងដោះស្រាយជម្លោះនៅអ៊ុយក្រែន ក្រោយជាប់ឆ្នោត