មហាជនសង្ស័យ ព្រះនាងតូច ជេនណា ពាក់ព័ន្ធជាមួយអន្ទិត​ កក្តដា​

នៅព្រឹកមិញនេះ ព្រះនាងតូច នរោត្តម ជេនណា បញ្ជាក់ថា ទ្រង់ពុំបានជួបនឹងបុគ្គល សោភ័ណ កក្តដា​ នោះទេ ក្រោយពីមានការផ្សព្វផ្សាយ​ថាអន្ទិតរូបនេះឆ្លងកូវីដ-១៩ ហើយបានប៉ះពាល់ផ្ទាល់ជាមួយព្រះនាង។

នៅលើផេកហ្វេសប៊ុកផ្លូវការរបស់ព្រះនាងតូច បានបង្ហោះសារដូច្នេះថា “សូមជម្រាបសួរពុកម៉ែបងប្អូនជិតឆ្ងាយទាំងអស់​ ដែលព្រួយបារម្ភអំពីខ្ញុំ​ ក្រោយពីមានការផុសផ្សាយថា​ លោក​ កក្តដា​ សោភ័ណ​ បានជួបខ្ញុំ ខ្ញុំចង់ជម្រាបថា​ រូបនេះ​ ថតជិតមួយឆ្នាំមកហេីយ​ ដែលកាលនោះរូបគាត់បានមកលេងខ្ញុំនៅព្រះដំណាក់​មែន តែតាំងពីពេលនោះមកនេះខ្ញុំពុំដែលបានជួបគាត់ទៀតនោះទេ។”

ក្រោយពីបកស្រាយចម្ងល់លើរូបថតដែលធ្លាប់ថតរួមគ្នារួចមក ព្រះនាងតូច ជេនណា ក៏បានថ្លែងអំណរគុណដល់ពុកម៉ែបងប្អូនដែលព្រួយបារម្ភអំពី​ព្រះរាជសុខភាពរបស់ទ្រង់និងបានបន្ថែមថា “ខ្ញុំនិងក្រុមគ្រួសារពុំបានចេញពីព្រះដំណាក់ បេីគ្មានការចាំបាច់នោះទេ​ ទោះបីជាចេញទៅណាមកណាក៏ពាក់ម៉ាស​ និងលាងដៃដោយអាល់កុលការពារជាប្រចាំដែរ។”

ជាចុងក្រោយ ​ ព្រះនាងបានជូនពរដល់បងប្អូនដែលកំពុងមានជំងឺកូវីដទាំងអស់រួមទាំងសិល្បករ​ ក៏ដូចជាប្រជាជនដទៃទៀតឆាប់ជាសះស្បេីយឡេីងវិញ។ ទ្រងក៏អំពាវនាវឱ្យបងប្អូនទាំងអស់ មេត្តារួមគ្នាគោរពតាមការណែនាំរបស់ក្រសួងសុខាភិបាល​ និងសារាចរណ៍របស់រាជរដ្ឋាភិបាលផងដែរ៕

អត្ថបទ៖ សន្យា

ចុចអាន៖ សិល្បករ​-​សិល្បការិនី​ប្រមាណ​ជា​៤០០​នាក់​ចុះ ឈ្មោះ​ចាក់​វ៉ាក់សាំង​ការពារ​កូ​វីដ​-១៩

ចុចអាន៖ កែវ ច័ន្ទ​និ​មល ៖ ​រឿង​មួយ​ចំនួន​បើ​មិន​ធ្លាប់​ឆ្លង​កាត់​ផ្ទាល់​ គ្មាន​ថ្ងៃ​យល់​នោះ​ឡើយ