ដោយសារនយោបាយកាន់តែតានតឹង ភាពយន្ដ​របស់ជំទាវ​ទី​មួយ​​កូរ៉េ ត្រូវលុបចោលភ្លាមៗ

ភាពយន្តឯកសារអំពីជំទាវទីមួយកូរ៉េខាងត្បូង Kim Keon Hee គ្រោងនឹងចាក់ផ្សាយឲ្យទស្សនិកជនបានទស្សនា ប៉ុន្តែចំពេលមានភាពតានតឹងផ្នែកនយោបាយកាន់តែខ្លាំងឡើង ដោយសារតែបទបញ្ជាច្បាប់អាជ្ញាសឹករបស់លោកប្រធានាធិបតី Yoon Suk Yeol​ រឿងនេះបែរត្រូវរំសាយចោលភ្លាមៗ។

ប្រព័ន្ធ​ផ្សព្វផ្សាយ​កូរ៉េ​បាន​រាយការណ៍​ថា ភាពយន្ត​ឯកសារ​មាន​ចំណង​ជើង​ថា First Lady គ្រោង​នឹង​ចេញ​នៅ​ថ្ងៃ​ទី ១២ ខែ​ធ្នូនេះតែម្ដង។ ការងារនេះនិយាយអំពីលោកស្រី Kim Keon Hee ភរិយារបស់ប្រធានាធិបតីកូរ៉េ Yoon Suk Yeol ដោយស្វែងយល់ពីភាពចម្រូងចម្រាសជាច្រើនអំពីស្ត្រីដែលកើតក្នុងឆ្នាំ ១៩៧២ រួមទាំងការចោទប្រកាន់ពីបទសូកប៉ាន់ និងការជ្រៀតជ្រែកក្នុងកិច្ចការរដ្ឋ។ តួរលេខផ្សេងទៀតដែលពាក់ព័ន្ធនឹងការចោទប្រកាន់ខាងលើ​​ ក៏ត្រូវបានលើកឡើងផងដែរ រួមទាំងគ្រូគង្វាលជនជាតិអាមេរិកដើមកំណើតកូរ៉េ Choi Jae Young ផងដែរ។

លោក Choi គឺជាអ្នកដែលបានផ្តល់ឲ្យភរិយាលោក Yoon នូវកាបូប Dior ក្នុងតម្លៃ ២,២០០ ដុល្លារ និងអំណោយថ្លៃៗផ្សេងទៀតនៅក្នុងខែកញ្ញា ឆ្នាំ ២០២២។ ដោយ​សារ​តែ​រឿង​នេះ ស្ត្រី​ទី​មួយ​របស់​កូរ៉េ​ខាង​ត្បូង ​ត្រូវ​បាន​គេ​សួរ​ចម្លើយ​ផ្ទាល់​នៅ​អគារ​រដ្ឋាភិបាល​មួយ​ក្នុង​រយៈ​ពេល ១២ ម៉ោង​ក្នុង​ខែ​កក្កដា មួយ​ខែ​ក្រោយ​មក ការិយាល័យ​រដ្ឋអាជ្ញា​កូរ៉េ​បាន​កំណត់​ថា អំណោយ​ខាង​លើ​មិន​ជាប់​ពាក់​ព័ន្ធ​នឹង​ឧក្រិដ្ឋកម្ម​ណា​មួយ​របស់​ប្រធានាធិបតី ក៏​មិន​អាច​ដោះ​ដូរ​បាន​នូវ​ការ​អនុគ្រោះ​ណា​មួយ​ដែរ។

ក្រៅ​ពី​នេះ តួ​អង្គ​ពីរ​ផ្សេង​ទៀត​ទាក់​ទង​នឹង​លោកស្រី ក៏​លេច​មុខ​ក្នុង​រឿង​នេះ​ដែរ។ ពួកគេគឺលោក Lee Myung Soo អ្នកកាសែតរបស់ Voice of Seoul ដែលបានសន្ទនាតាមទូរស័ព្ទរយៈពេល ៧ ម៉ោងជាមួយលោកស្រី Kim ក្នុងអំឡុងពេលបោះឆ្នោតប្រធានាធិបតីកូរ៉េទី ២០ និងលោក Chung Dae Taek អ្នកជំនួញពាក់ព័ន្ធនឹងជម្លោះផ្លូវច្បាប់ក្នុងការដោះស្រាយជាមួយគ្រួសារលោកស្រីជាងមួយទសវត្សរ៍។

ទោះបីជាយ៉ាងនេះក្ដី លោក Kim Tae Hoon នាយកប្រតិបត្តិនៃក្រុមហ៊ុន Today’s Pictures ដែលជាផលិតករម្នាក់នៃខ្សែភាពយន្តនេះបាននិយាយថា «ខ្ញុំសង្ឃឹមថាមនុស្សដែលគ្មានចំណូលចិត្តផ្នែកនយោបាយ និងក្មេងជំនាន់ក្រោយបានទស្សនាខ្សែភាពយន្តនេះដោយគ្មានការរើសអើង»។

ដំបូង​ឡើយ ភាពយន្ត​នេះ​ត្រូវ​បាន​គ្រោង​នឹង​ចាក់​បញ្ចាំង​នៅ​មុខ​រដ្ឋសភា​កូរ៉េ។ ប៉ុន្តែ នៅក្នុងបរិបទនៃភាពតានតឹងផ្នែកនយោបាយដែលកើនឡើង ទាក់ទងនឹងបទបញ្ជាច្បាប់អាជ្ញាសឹករបស់លោកប្រធានាធិបតី Yoon Suk Yeol កាលវិភាគត្រូវបានបង្ខំឲ្យលុបចោល។​ លេខាធិការដ្ឋានរដ្ឋសភាបានជូនដំណឹងដល់ថា ពួកគេមិនអនុញ្ញាតឲ្យមានការបញ្ចាំងភាពយន្តស្ត្រីទីមួយនៅក្នុងរដ្ឋសភាទេ។ ជាពិសេស គណបក្សអំណាចជាតិដែលកំពុងកាន់អំណាចបានជំទាស់យ៉ាងខ្លាំង ចំពោះការបញ្ចាំងភាពយន្តក្នុងអំឡុងពេលដំណើរការជ្រើសរើសទីតាំង ដែលនាំឲ្យមានការមិនយល់ព្រម។​

យ៉ាងណាមិញ ការចេញផ្សាយខ្សែភាពយន្តនេះបានទាក់ទាញការចាប់អារម្មណ៍យ៉ាងខ្លាំងពីសាធារណជន នៅពេលដែលរលកនៃការតវ៉ាប្រឆាំងនឹង Blue House កំពុងពុះកញ្ជ្រោលពេញទឹកដីកូរ៉េ។ អ្នកលេងអ៊ីនធឺណេតបានបញ្ចេញមតិដែរថា ពួកគេគួរតែមើលរឿងនេះ និងចង់ឲ្យចាក់ផ្សាយរឿងនៅគ្រប់ទីកន្លែង បើគេរាយការណ៍រឿងពុករលួយពិតមែន។ អ្នកខ្លះថែមទាំងស្នើឲ្យមានចាក់ក្នុងរោងកុន និងត្រៀមខ្លួនទិញសំបុត្រមើលភាពយន្តឯកសារនេះយ៉ាងគគ្រឹកគគ្រេងផងដែរ៕

អត្ថបទ៖ សាង ស្រីល័ក្ខ

ចុចអាន៖ស្ងៀមស្ងាត់មកជាយូរ តារា K-pop ប៉ុន្មានរូប ហ៊ានចេញមុខអំពាវនាវឲ្យមានការចោទប្រកាន់លោក Yoon