សៃហ្វុន ផ្ទុះប្រតិកម្មខ្លាំង ក្រោយឃើញយុវជនមួយក្រុម ផលិតមាតិកាហាក់បង្ហាញការរើសអើងភេទ

បវរកញ្ញាលំដាប់រងទី១ Miss Universe Cambodia 2024 និងជាតារាសម្តែងភេទទី៣ សៃហ្វុន បានចេញមុខបង្ហាញប្រតិកម្មយ៉ាងខ្លាំង ក្រោយឃើញយុវជនមួយក្រុម ផលិតមាតិកាដែលមានលក្ខណៈមើលងាយ និងមិនផ្តល់តម្លៃដល់សហគមន៍ភេទទី៣ ។

សៃហ្វុន បានបង្ហោះសារបង្ហាញការខកចិត្ត ដោយលើកឡើងថា ទោះបីសង្គមឈានមកដល់ឆ្នាំ២០២៦ ហើយ ក៏នៅតែមានមនុស្សមួយចំនួនបន្តផលិតមាតិកាដែលជំរុញការរើសអើងភេទ និងបង្កផលប៉ះពាល់ដល់អារម្មណ៍អ្នកដទៃ។

សៃហ្វុន ចោទសួរទៅកាន់ក្រុមអ្នកផលិតមាតិកាប្រភេទនេះ ដោយដាក់ចំៗក្នុងន័យដូច្នេះថា តើគ្មានគំនិតថ្មីៗដើម្បីផលិត Content ល្អៗ ឬមានលក្ខណៈអប់រំ ឱ្យជាប្រយោជន៍ដល់សង្គមឬយ៉ាណា?។

មិនតែប៉ុណ្ណោះ សៃហ្វុន ក៏បានចោទជាសំណួរថា ហេតុអ្វីបានជាជ្រើសរើសយកគំនិតអវិជ្ជមាន មើលងាយភេទទី៣ ឬអ្នកស្រឡាញ់ភេទដូចគ្នា មកធ្វើជាមាតិកាកម្សាន្ត។

សៃហ្វុន ក៏បាននិយាយចំៗទៅកាន់ក្រុមអ្នកផលិតមាតិកាប្រភេទនេះ ក្នុងន័យចោទសួរទៀត ថាតើគ្មានគំនិតថ្មីៗដើម្បីផលិត Content ល្អៗ ឬមានលក្ខណៈអប់រំឱ្យជាប្រយោជន៍ដល់សង្គមឬយ៉ាណា? ខណៈខ្លួនយល់ថា ការបង្កើតមាតិកាបែបនេះ មិនត្រឹមតែមិនផ្តល់តម្លៃដល់សង្គមប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីការខ្វះការយល់ដឹង និងការគោរពចំពោះភាពចម្រុះផ្នែកភេទផងដែរ។

គួរបញ្ជាក់ថា ក្រោយបោះជំហានចូលប្រឡូកក្នុងវិស័យសិល្បៈ សៃហ្វុន ទទួលបានការគាំទ្រកាន់តែច្រើនពីមហាជន ទាំងលើសមត្ថភាព ការបង្ហាញខ្លួន និងការចូលរួមលើកកម្ពស់ការទទួលស្គាល់ភាពចម្រុះក្នុងសង្គម។ លើកនេះ នាងក៏បានប្រើសំឡេងរបស់ខ្លួន ដើម្បីអំពាវនាវឱ្យអ្នកផលិតមាតិកា ងាកមកបង្កើតខ្លឹមសារដែលមានគុណតម្លៃ និងមិនបង្កការរើសអើង ឬប៉ះពាល់ដល់សេចក្តីថ្លៃថ្នូររបស់អ្នកដទៃ៕ អត្ថបទ៖ ចាន់រ៉ា