អ្នកអង្គម្ចាស់ក្សត្រិយ៍ ចេណ្ណា បង្ហាញមោទនភាព ក្រោយចូលរួមព្រឹត្តិការណ៍អន្តរជាតិក្នុងឈុត Cosplay ដែលបំផុសក្បាច់នៃប្រាសាទអង្គរ

អ្នកអង្គម្ចាស់ក្សត្រិយ៍ នរោត្តម ចេណ្ណា បានបង្ហាញនូវមោទនភាពយ៉ាងក្រៃលែង ក្នុងការតំណាងឱ្យកម្ពុជា ចូលរួមកម្មវិធី Bilibili World 2026 ដែលបានរៀបចំឡើងនៅទីក្រុងសៀងហៃ ប្រទេសចិន នាពេលថ្មីៗនេះ។ ក្នុងឱកាសនោះ អ្នកអង្គម្ចាស់ក្សត្រិយ៍ បានតុងតែងជា Cosplay ដែលបំផុសគំនិតចេញពីក្បាច់ផ្កាឈូកនៃប្រាសាទអង្គរវត្ត និងការដេរតុបតែងអង្កាំដោយដៃយ៉ាងល្អិតល្អន់ ដោយឆ្លុះបញ្ចាំងពីប្រណិតភាពនៃសិល្បៈហត្ថកម្ម និងអត្តសញ្ញាណខ្មែរ។

តាមរយៈសារបង្ហោះលើទំព័រហ្វេសប៊ុក នៅថ្ងៃទី១៥ ខែកក្កដា ឆ្នាំ២០២៦ អ្នកអង្គម្ចាស់ក្សត្រិយ៍ បានបង្ហាញនូវមោទនភាពយ៉ាងក្រៃលែង ក្នុងការបង្ហាញវត្តមានជាមួយអត្តសញ្ញាណខ្មែរ ក្នុងព្រឹត្តិការណ៍ Pop Culture ដ៏ធំបំផុតមួយរបស់ប្រទេសចិន និងក្នុងតំបន់អាស៊ី តាមរយៈការតុបតែងជាតួអង្គ Cosplay ។ កម្មវិធីនេះ មានការចូលរួមពីអ្នកគាំទ្ររាប់សែននាក់ ព្រមទាំងម៉ាកយីហោល្បីៗ ក្រុមហ៊ុនកម្សាន្តឈានមុខ សិល្បករ និងភ្ញៀវកិត្តិយសអន្តរជាតិជាច្រើន មកពីជុំវិញពិភពលោក។

ជាមួយគ្នានេះ អ្នកអង្គម្ចាស់ក្សត្រិយ៍ នរោត្តម ចេណ្ណា ក៏បានថ្លែងអំណរគុណយ៉ាងជ្រាលជ្រៅដល់ការរចនាម៉ូដរបស់ ALmée Couture ដែលបានច្នៃរ៉ូបដ៏ស្រស់ស្អាត និងប្រកបដោយអត្ថន័យ សម្រាប់ការបង្ហាញខ្លួនក្នុងព្រឹត្តិការណ៍អន្តរជាតិលើកនេះ។

ចំពោះអត្ថន័យនៃរ៉ូប ALmée Couture ដែលជាអ្នករចនារ៉ូបសម្រាប់អ្នកអង្គម្ចាស់ក្សត្រិយ៍ បញ្ជាក់ថា ស្នាដៃនេះត្រូវបានបំផុសគំនិតចេញពីក្បាច់ផ្កាឈូកនៃប្រាសាទអង្គរវត្ត ដោយរួមបញ្ចូលការប្រើប្រាស់ពណ៌ស្រទន់ស្រាល និងការដេរតុបតែងអង្កាំដោយដៃយ៉ាងល្អិតល្អន់ ដែលឆ្លុះបញ្ចាំងពីប្រណិតភាពនៃសិល្បៈហត្ថកម្ម និងអត្តសញ្ញាណខ្មែរ។

ការចូលរួមរបស់អ្នកអង្គម្ចាស់ក្សត្រិយ៍ នរោត្តម ចេណ្ណា មិនត្រឹមតែជាការបង្ហាញសមត្ថភាព និងភាពច្នៃប្រឌិតក្នុងវិស័យ Cosplay ប៉ុណ្ណោះទេ ប៉ុន្តែក៏ជាឱកាសដ៏មានតម្លៃ ក្នុងការផ្សព្វផ្សាយអត្តសញ្ញាណ វប្បធម៌ និងភាពស្រស់ស្អាតរបស់កម្ពុជា ទៅកាន់ទស្សនិកជនអន្តរជាតិផងដែរ៕