ពលរដ្ឋស្នើអាជ្ញាធរពន្លឿនការជួសជុលផ្លូវបេតុងមួយខ្សែដែលកំពុងបង្កគ្រោះថ្នាក់ដោយសារសរសៃដែក

ផ្លូវបេតុងមួយខ្សែប្រវែង១០០ម៉ែត្រ ស្ថិតក្នុងភូមិកាកាប សង្កាត់កាកាប ខណ្ឌពោធិ៍សែនជ័យ កំពុងរងការខូចខាតយ៉ាងធ្ងន់ធ្ងរដោយផ្នែកមួយចំនួនមានសរសៃដែកលៀនចេញមកក្រៅ ដែលបានបង្កគ្រោះថ្នាក់ដល់អ្នកធ្វើដំណើរដួលដោយ​សារសរសៃដែកនេះ។

អ្នកស្រី សៀក លីន ជាប្រជាពលរដ្ឋរស់នៅតំបន់នោះបានលើកឡើងថា សភាពខូចខាតផ្លូវនេះ គឺមិនអាចចាក់ក្រួស ឬ ខ្សាច់ដើម្បីបំពេញជង្ហុកបាននោះឡើយ ដោយសារតែជង្ហុកនីមួយៗធំខ្លាំងណាស់ទោះបីជាចង់ប្រមូលលុយពលរដ្ឋរស់នៅតំបន់នោះយកមកទិញខ្សាច់ ឬថ្មក៏ត្រូវចំណាយថវិកាច្រើននោះដែរ។ ប្រភពដដែលបន្តថា នៅពេលថ្មីៗនេះ មានអ្នកធ្វើដំណើរឆ្លងកាត់ផ្លូវនេះបានដួលម៉ូតូរងរបួស ដោយសារទាក់ជាមួយសរសៃដែកដដែលលៀនចេញមកក្រៅ។

អ្នកស្រី សៀក លីន ស្នើសុំជួយពន្លឿនក្នុងការជួសជុលផ្លូវបេតុងដែលកំពុងរងខូចខាតទាំងស្រុងនេះផង ព្រោះថាចំណុចផ្លូវនេះ គឺកំពុងបង្កការលំបាកទៅដល់ប្រជាពលរដ្ឋកំពុងរស់នៅតំបន់នោះ ជាពិសេសនៅពេលធ្វើដំណើរពេលយប់ ងាយនឹងអាចគ្រោះថ្នាក់។

គួរបញ្ជាក់ដែរថា កាលពីខែតុលា ឆ្នាំ២០២៤ កម្ពជាថ្មី ធ្លាប់បានទំនាក់ទំនងទៅលោក ប៉ាង លីដា អភិបាលរងខណ្ឌពោធិ៍សែនជ័យ លោកបានអោយដឹងថា លោកនឹងចាត់មន្រ្តីជំនាញពាក់ព័ន្ធចុះទៅត្រួតពិនិត្យជាបន្ទាន់។ ប៉ុន្តែរហូតមកដល់ថ្ងៃនេះ នៅមិនទាន់មានការជួសជុលឡើងវិញនោះឡើយទេ៕

អត្ថបទ៖ ម៉េង