ប៉ូលិសក្រុងដូនកែវ ខេត្តតាកែវ ឃាត់ខ្លួនជនសង្ស័យ៤នាក់ ពាក់ព័ន្ធករណីហិង្សា

​ជនសង្ស័យករណីបង្កហិង្សាដោយចេតនា៤នាក់ ​ត្រូវសមត្ថកិច្ចនៃអធិការដ្ឋាននគរបាលក្រុងដូនកែវ​ ចាប់ឃាត់ខ្លួន​ ក្រោយធ្វេីសកម្មភាពវាយតបលេីជនរងគ្រោះ៣នាក់ កាលពីយប់រំលងអាធ្រាតឈានចូលថ្ងៃទី២៩​ ខែធ្នូ​ ឆ្នាំ២០២៤​ វេលាម៉ោង៣និង៣០នាទី​ នៅចំណុចភូមិស្នោរ​ សង្កាត់រកាក្នុង​ ក្រុងដូនកែវ​ ខេត្តតាកែវ។

តាមរបាយការណ៍ប៉ូលិសក្រុងដូនកែវបង្ហាញថា​ ជនសង្ស័យដែលឃាត់ខ្លួនមានឈ្មោះដូចជា៖​ ១​.ឈ្មោះ​ ពក​ ភិនិន​ ភេទប្រុស​ អាយុ២១ឆ្នាំ​ រស់នៅភូមិពុទ្ធិសាំ​ ឃុំស្រង៉ែ​ ស្រុកទ្រាំង។ ២.ឈ្មោះ​ ផុន​ រិទ្ធីសំណាង​ ភេទប្រុស​ អាយុ១៨ឆ្នាំ​ រស់នៅភូមិព្រៃឈេីទាល​ ឃុំស្រង៉ែ​ ស្រុកទ្រាំង។ ៣.​ឈ្មោះ​ វន​ សុភាវង់​ ភេទប្រុស​ អាយុ២២ឆ្នាំ​ រស់នៅភូមិព្រៃរុន​ ឃុំស្រង៉ែ​ ស្រុកទ្រាំង។ ទី៤ឈ្មោះ​ ស្រី​ ចាន់រិទ្ធ​ ភេទប្រុស​ អាយុ២០​ ទីលំនៅបណ្តោះអាសន្នភូមិចក​ សង្កាត់រកាក្នុង​ ក្រុងដូនកែវ។ របាយការណ៍ដដែលបញ្ជាក់ថា​ ជនសង្ស័យទាំង៤នាក់មានខ្លះកាន់ជំពាមកៅស៊ូ​ ខ្លះកាន់ខ្សែក្រវាត់​ បានធ្វេីសកម្មភាពវាយតប់លេីជនរងគ្រោះ៣នាក់បណ្តាលឱ្យរងរបួស​។ 

បន្ទាប់ពីកេីតហេតុម៉ោង៥ទៀបភ្លឺ​ ថ្ងៃទី២៩ធ្នូ​ ជនរងគ្រោះឈ្មោះ​ ប៉ិច​ សុវណ្ណវីផាត់​ បានមកដាក់ពាក្យបណ្តឹងនៅអធិការដ្ឋាននគរបាលក្រុងដូនកែវ​។ ក្រោយទទួលពាក្យបណ្តឹង​ និងមានបទបញ្ជាពីលោក ម៉ែន​ លី​ ស្នងការនគរបាលខេត្ត​ ដោយសម្របសម្រួលនីតិវិធីពី លោក​ ឯក​ ឆេងហួត​ ព្រះរាជអាជ្ញាអមសាលាដំបូងខេត្តតាកែវផងនោះ​ ទេីបឈានដល់ការឃាត់ខ្លួនជនសង្ស័យទាំង៤នាក់យកមកសួរនាំ។

បច្ចុប្បន្នជនសង្ស័យទាំង៤នាក់ខាងលេីត្រូវបានឃាត់ខ្លួនសួរនាំនៅអធិការដ្ឋាននគរបាលក្រុងដូនកែវ​ និងបន្តបញ្ជូនខ្លួនទៅស្នងការដ្ឋាននគរបាលខេត្តតាកែវចាត់ការបន្តតាមនីតិវិធី៕​

ដោយ ៖វីរៈ