ព័ត៌មានជាតិ

អភិបាលខណ្ឌឫស្សីកែវ ដឹកនាំក្រុមការងារ ចុះរៀបចំសណ្ដាប់ធ្នាប់ក្នុងផ្សារច្រាំងចម្រេះ

បានផុស

៣ ខែ មុន

នៅ

ថ្ងៃសុក្រ ១០ មករា ២០២៥

ដោយ

កាលពីព្រឹកថ្ងៃទី ១០ ខែមករា ឆ្នាំ ២០២៥ នេះ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំក្រុមការងារ រៀបចំសណ្ដាប់ធ្នាប់ក្នុងផ្សារច្រាំងចម្រេះ និងបន្តចុះសួរសុខទុក្ខប្រជាពលរដ្ឋជាអាជីវករលក់ដូរ ឲ្យលក់ដូរមានរបៀបរៀបរយ បរិស្ថានល្អ សោភ័ណភាពស្អាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនោះ លោកអភិបាលខណ្ឌឫស្សីកែវ បានណែនាំឲ្យរៀបចំសម្អាតផ្លូវ រៀបចំមុខផ្សារឲ្យស្អាត មានរបៀបរៀបរយ និងសូមឲ្យម្ចាស់លំនៅឋានបញ្ឈប់យកប្រយោជន៍ពីដីផ្លូវ និងដីចំណីរបស់រដ្ឋ ទោះបីជាអាជ្ញាធរបានចុះអប់រំណែនាំច្រើនយ៉ាងណាក្តីនាពេលកន្លងមក។ ជាពិសេស នឹងមានរៀបចំកិច្ចប្រជុំស្ដីពីការកែលម្អផ្សារច្រាំងចម្រេះនេះ ដែលជាផ្សាររដ្ឋ ១ ក្នុងចំណោម ៣ ក្នុងខណ្ឌ រួមមាន ៖ ផ្សារច្រាំងចម្រេះ ផ្សារទួលសង្កែ និងផ្សារគីឡូម៉ែត្រលេខ ៦។

ការរៀបចំសណ្ដាប់ធ្នាប់ក្នុងផ្សារច្រាំងចម្រេះនេះ ដើម្បីឲ្យមានរបៀបរៀបរយ សណ្ដាប់ធ្នាប់ បរិស្ថាន សោភ័ណភាព ដោយបច្ចុប្បន្ននៅតែមានអាជីវករមួយចំនួនបន្តយកអីវ៉ាន់ដាក់លក់ដូរនៅលើដងផ្លូវជុំវិញក្នុងផ្សារជារៀងរាល់ថ្ងៃ គ្មានសណ្ដាប់ធ្នាប់ របៀបរៀបរយ។

ជាមួយគ្នានេះ អាជីវករ បានគាំទ្ររាល់ចំណាត់ការរបស់អាជ្ញាធរ និងសំណូមពរដល់លោកអភិបាលខណ្ឌ ជួយសម្របសម្រួលឲ្យអាជីវករលក់ដូរតាមផ្លូវខាងក្រៅផ្សារមកចូលលក់ដូរក្នុងផ្សារចាស់វិញផងដែរ៕

អត្ថបទ ៖ សំណាង