អ្នកជំនាញថៃ បង្ហាញពីទុទ្ទិដ្ឋិនិយមនៃទស្សនវិស័យការងារ​

សម្ព័ន្ធសមាគមសហគ្រាសធុនតូច និងមធ្យមថៃ បាន​បង្ហាញពី​ទុទ្ទិដ្ឋិនិយមរបស់ខ្លួន​ជុំវិញ​ទស្សនវិស័យការងារក្នុងប្រទេស​ ​ដោយ​មាន​សញ្ញា​កាន់តែច្បាស់នៃការថយចុះកម្លាំងពលកម្ម​។ នេះបើតាម​ការចុះផ្សាយរបស់​កាសែតបាងកកប៉ុស្តិ៍​នាថ្ងៃចន្ទនេះ​។

ប្រធាន​សម្ព័ន្ធសមាគម លោក Sangchai Theerakulvanich ​បាន​ថ្លែងថា​ ការថយចុះនៃកម្លាំងពលកម្ម បង្ហាញឱ្យឃើញ​តាម​រយៈការធ្លាក់ចុះ​នៃចំនួន​កម្មករ​ដែល​ទទួល​បាន​ការ​ធានារ៉ាប់រងក្រោម​មាត្រា​ទី ៣៣ នៃច្បាប់ស្តីពីរបបសន្តិសុខសង្គម ​ដែល​​រ៉ាប់រងកម្មករសរុប​ជាង ១០​ លាននាក់។

លោក​បន្តថា​ ​សញ្ញាទុទ្ទិដ្ឋិនិយមមួយផ្សេងទៀត​សម្រាប់វិស័យការងារនោះ គឺការបិទអាជីវកម្ម​នៅក្នុងប្រទេស​ថៃ។ របាយការណ៍ហិរញ្ញវត្ថុសម្រាប់ឆ្នាំសារពើពន្ធ ២០២៤ បង្ហាញថា អាជីវកម្មមួយចំនួនកំពុងជួបការលំបាក។ សញ្ញាផ្សេង​ៗ​នៃបញ្ហារួមមាន បណ្ដា​ក្រុមហ៊ុន​អាជីវកម្ម​​រាយការណ៍ពីការខាតបង់ជាប់លាប់ទៅនាយកដ្ឋានប្រាក់ចំណូល ឬដាក់របាយការណ៍ហិរញ្ញវត្ថុទទេ ​ដោយ​បង្ហាញថា ​ខ្លួន​គ្មាន​សកម្មភាព​។

លោក​ Sangchai ​បន្ថែម​ថា សេដ្ឋកិច្ច​ធ្លាក់​ចុះ​បាន​ប៉ះពាល់​ទាំង​អាជីវកម្ម និង​ការងារ​ក្នុង​ប្រទេសថៃ ដោយសារតែ​តម្លៃ​ផលិតកម្ម​កើនឡើង។ លោកថ្លែងយ៉ាងដូច្នេះថា៖ «សេដ្ឋកិច្ចថៃបានស្ថិតក្នុងស្ថានភាពអាក្រក់រួចទៅហើយ មុនពេល​វិបត្តិ​ជំងឺរាតត្បាត(កូវីដ១៩)។ អាជីវកម្មខ្នាតតូច និងមធ្យម បានជួបការលំបាកអស់រយៈពេល ៥-៦ ឆ្នាំ​ហើយ មុនពេល​វិបត្តិ​ចូលមក»។

លោក​បន្តថា​៖ «ជំងឺរាតត្បាត​បាន​បង្កើនល្បឿននៃការ​ធ្លាក់ចុះ។ បន្ទាប់មក នៅពេលដែលសេដ្ឋកិច្ចចាប់ផ្តើមស្ទុះងើបឡើងវិញនៅឆ្នាំ ២០២២ សង្រ្គាមរុស្ស៊ី-អ៊ុយក្រែនក៏បាន​ផ្ទុះឡើង ​ហើយអ្នកវិនិយោគចិនបានជ្រើសរើសជួលកម្មករចិនជំនួសឱ្យប្រជាជន​ក្នុងស្រុក​វិញ​»។

អ្នកជំនាញថៃដដែល​លើកឡើងថា​ ​កិច្ចការសំខាន់ៗសម្រាប់រដ្ឋាភិបាលគឺការកែទម្រង់ប្រព័ន្ធអប់រំ ដើម្បីគាំទ្រដល់ឧស្សាហកម្មនាពេលអនាគតដែលពឹងផ្អែកលើបញ្ញាសិប្បនិម្មិត (AI) បច្ចេកវិទ្យាឌីជីថល និងជំនាញភាសា៕