អ៊ុយក្រែន បើកការវាយលុកនៅតំបន់ព្រំដែន រុស្ស៊ី

តាមការចុះផ្សាយរបស់ BBC នៅថ្ងៃអង្គារទី៨ខែមីនាឆ្នាំ២០២៥ នេះជាលើកដំបូងហើយដែលប្រមុខរដ្ឋាភិបាលទីក្រុងកៀវ លោក វ៉ូឡូឌីមៀរ ហ្សេលេនស្គី ប្រកាសជាសាធារណៈថា កងទ័ពអ៊ុយក្រែន បានបើកការវាយលុកហើយបន្តឈរជើងនៅក្នុងតំបន់ Belgorod នៃព្រំដែនរបស់ប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះតំបន់នេះធ្លាប់ផ្ទុះការប្រយុទ្ធគ្នារវាងភាគីទាំងពីរជាច្រើនលើកច្រើនសាមកហើយក៏ដោយ តែលោក ហ្សេលេនស្គី មិនដែលបញ្ចេញព័ត៌មានលម្អិតអ្វីឡើយ ទើបតែពេលនេះប៉ុណ្ណោះ ទើបលោកទទួលស្គាល់ជាផ្លូវការថា កងទ័ពអ៊ុយក្រែន បានបើកប្រតិបត្តិការនិងរក្សាវត្តមាននៅទីនោះ។

ដោយទទួលរបាយការណ៍ពីមេទ័ព Oleksandr Syrsky, លោកហ្សេលេនស្គី បញ្ជាក់ក្នុងសន្និសីទកា​សែតថា «ជាមួយវត្តមានកងទ័ពនៅទីនោះ យើងកំពុងបើកប្រតិបត្តិការយ៉ាងរលូនប្រកបដោយផ្លែផ្កាលើទឹកដីសត្រូវនៅព្រំដែន ហើយនេះគឺជារឿងដ៏ត្រឹមត្រូវបំផុត។ សង្គ្រាមត្រូវតែវិលទៅកន្លែងដើមវិញ»។

លោកបន្តថា ប្រតិបត្តិការទាំងនេះ គឺមានគោលបំណងការពារតំបន់ព្រំដែនអ៊ុយក្រែនដូចជា Sumy និង Kharkov ពីការវាយលុករបស់រុស្ស៊ី។

កាលពីខែមុន មានសេចក្តីរាយការណ៍ថា កងទ័ពអ៊ុយក្រែនព្យាយាមឆ្លងទន្លេចូលទៅក្នុងតំបន់ Belgorod ប៉ុន្តែត្រូវទាហានរុស្ស៊ី បាញ់ឲ្យរត់បកទៅវិញ។ យ៉ាងណា មិនមានការបញ្ជាក់ជាផ្លូវការឡើយជុំវិញព័ត៌មាននេះ។

សូមជម្រាបថា Belgorod គឺជាតំបន់មួយនៅភាគខាងលិចប្រទេសរុស្ស៊ី ដែលមានព្រំប្រទល់ជាប់នឹង អ៊ុយក្រែន។ វាមានផ្ទៃដីប្រហែល ២៧ ១០០គីឡូម៉ែត្រការ៉េ និងមានប្រជាជនប្រហែល ១.៥៤លាននាក់៕

អត្ថបទ៖ សុខ សុវណ្ណ

ចុចអាន៖ ម៉ាក្រុង ទាមទារឲ្យប្រើធម៌ក្តៅលើរុស្ស៊ី បើពូទីន មិនព្រមឈប់បាញ់នៅអ៊ុយក្រែន