អាស៊ានប្រជុំគ្នាពិសេស ដើម្បីដោះស្រាយបញ្ហាពន្ធរបស់អាមេរិក ដោយមិនសងសឹក

រដ្ឋមន្ត្រីក្រសួងសេដ្ឋកិច្ច និងពាណិជ្ជកម្មនៃប្រទេសអាស៊ានទាំង១០ រួមជាមួយនឹងប្រទេសទីម័រខាងកើត បានបើកកិច្ចប្រជុំពិសេសតាម​អនឡាញនៅថ្ងៃ​ព្រហស្បតិ៍នេះ ដើម្បីពិភាក្សាអំពីយុទ្ធសាស្ត្រឆ្លើយតបទៅនឹងគោលនយោបាយពន្ធ​គយបដិការរបស់ប្រធានាធិបតីអាមេរិក លោក​ ដូណាល់ ត្រាំ។ នេះបើតាម​ការចុះផ្សាយរបស់កាសែតបាងកកប៉ុស្តិ៍ ដែលថា អាស៊ានព្រមគ្នាមិនសងសឹកអាមេរិក។

កិច្ចប្រជុំនេះ មានគោលបំណងរិះរកមធ្យោបាយកាត់បន្ថយផលប៉ះពាល់សេដ្ឋកិច្ច ពាណិជ្ជកម្ម និងការវិនិយោគក្នុងតំបន់ ក៏ដូចជាការដោះស្រាយកង្វល់ជុំវិញខ្សែច្រវ៉ាក់ផ្គត់ផ្គង់សកល និងប្រតិបត្តិការអាជីវកម្មឯកជន ជាពិសេសសហគ្រាសធុនតូច និងមធ្យម និងកសិករក្នុងតំបន់អាស៊ាន។

រដ្ឋមន្ត្រីទាំងអស់ បានយល់ព្រមចេញសេចក្តីថ្លែងការណ៍រួមមួយ ដើម្បីបង្ហាញពីជំហររបស់អាស៊ានជា «ដៃគូយុទ្ធសាស្ត្រគ្រប់ជ្រុងជ្រោយ» ជាមួយសហរដ្ឋអាមេរិក ដោយស្នើឱ្យមានការសន្ទនាក្នុងន័យស្ថាបនា ដើម្បីកាត់បន្ថយភាពតានតឹងពាណិជ្ជកម្ម និងស្វែងរកដំណោះស្រាយប្រកបដោយតុល្យភាពក្រោមភាពជាដៃគូពាណិជ្ជកម្ម និងវិនិយោគអាស៊ាន-អាមេរិក (STIP)។

ក្របខ័ណ្ឌនេះមានគោលបំណងការពារទំនាក់ទំនងសេដ្ឋកិច្ច ពាណិជ្ជកម្ម ការវិនិយោគ និងសន្តិសុខរយៈពេលវែងនៃខ្សែច្រវ៉ាក់ផ្គត់ផ្គង់​ក្នុងតំបន់។ អាស៊ាននឹងបន្តជំរុញកិច្ចសហប្រតិបត្តិការជាមួយសហរដ្ឋអាមេរិកក្នុងវិស័យ​សំខាន់ៗ រួមមាន បច្ចេកវិទ្យាឌីជីថល បញ្ញាសិប្បនិម្មិត (AI) ស្បៀងអាហារ ថាមពលកកើតឡើងវិញ ផលិតកម្មទំនើប យានជំនិះ​អគ្គិសនី គ្រឿងអេឡិចត្រូនិក សុខាភិបាល​ ភស្តុភារ និងកសិកម្ម។ កិច្ចខិតខំប្រឹងប្រែង​ដដែល​ នឹងបើកឱកាសថ្មីសម្រាប់តំបន់ ខណៈ​ពង្រឹងសារៈសំខាន់នៃប្រព័ន្ធពាណិជ្ជកម្មពហុភាគី។

អាស៊ាន​ក៏​បាន​បញ្ជាក់​ដែរ​ថា ខ្លួន​នឹង​មិន​សងសឹក​អាមេរិក​ក្នុង​វិស័យ​ពាណិជ្ជកម្ម​នោះ​ទេ ដោយថា «ការប្រាស្រ័យទាក់ទងបើកចំហ និងការសហការគ្នា នឹងមានសារៈសំខាន់ណាស់ក្នុងការធានាឱ្យមានទំនាក់ទំនងប្រកបដោយតុល្យភាព និងនិរន្តរភាព»។ នេះបើតាម​សេចក្ដីថ្លែងការណ៍រួម។

គួរគូសបញ្ជាក់ថា កិច្ចប្រជុំពិសេសដដែលធ្វើឡើងក្រោយ​លោក ត្រាំ កាលពីថ្ងៃពុធបាន​ប្រកាសផ្អាកពន្ធគយបដិការរយៈពេល ៩០ ថ្ងៃ ដោយ​ទម្លាក់វាមកត្រឹមពន្ធមូលដ្ឋាន ១០ ភាគរយ ប៉ុណ្ណេះ ក្នុងអំឡុងពេលផ្អាកនេះ​៕