តម្លៃប្រេងបន្តកើនឡើង ​ក្រោមសញ្ញានៃការថមថយកម្ដៅសង្រ្គាមពាណិជ្ជកម្ម

តម្លៃប្រេងអន្តរជាតិ បាន​កើនឡើងសម្រាប់ការជួញដូរលើទីផ្សារនៅអាស៊ីនៅព្រឹកថ្ងៃសុក្រនេះ បន្ទាប់ពីប្រទេសចិន​​បាន​និយាយថា ខ្លួនបើកចំហទ្វារ​សម្រាប់កិច្ចចរចាពន្ធជាមួយសហរដ្ឋអាមេរិក ​ដែលជា​សញ្ញានៃការបន្ធូរបន្ថយភាពតានតឹងក្នុងសង្គ្រាមពាណិជ្ជកម្ម​រវាងមហាអំណាចសេដ្ឋកិច្ចទាំង២។ នេះបើតាម​ការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ៣៨ សេន ឬ ០,៦ ភាគរយ ដល់ ៦២,៥១ ដុល្លារ/បារ៉ែល ​គិតត្រឹមម៉ោងម៉ោង ៩ កន្លះព្រឹកថ្ងៃសុក្រនេះ ខណៈ​តម្លៃប្រេងឆៅ​អាមេរិក ម៉ាក West Texas Intermediate (WTI) បានកើនឡើង ៣៨ សេន ឬ ០,៦ ភាគរយ ដល់ ៥៩,៦២ ដុល្លារ/បារ៉ែល។ តម្លៃប្រេងទាំង២ បាន​កើនឡើងជាង ២ ភាគរយ ពេលបញ្ចប់ការជួញដូរនៅថ្ងៃព្រហស្បតិ៍។ ​

នៅថ្ងៃសុក្រនេះ ក្រសួងពាណិជ្ជកម្មចិន​បាននិយាយថា ថ្មីៗនេះសហរដ្ឋអាមេរិកទាក់ទងទៅខ្លួនដើម្បីស្វែងរកការចរចាគ្នា អំពីបញ្ហា​ពន្ធ។​ កន្លងមក តម្លៃប្រេងបានធ្លាក់ចុះ ដោយ​សារតែការព្រួយបារម្ភស្ដីពីភាពតានតឹងនៃសង្រ្គាមពាណិជ្ជកម្ម​ដែល​អាចបង្កវិបត្តិសេដ្ឋកិច្ចសកល ហើយ​បន្ថយតម្រូវការប្រេង និងលទ្ធភាពដែលអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC +) បង្កើនផលិតកម្មប្រេងរបស់ខ្លួន។ ​

​យ៉ាងណាមិញ សញ្ញានៃការបន្ធូរបន្ថយ​ភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិន ដែលជាប្រទេសនាំចូលប្រេងឆៅដ៏ធំបំផុតរបស់ពិភពលោក បាន​ជំរុញលើកំណើនតម្លៃប្រេងឆៅសម្រាប់ការជួយដូរថ្ងៃសុក្រនេះ។

ជាមួយគ្នានោះ តម្លៃប្រេងកើនឡើងក៏រួមចំណែកដោយ​ការគំរាមកំហែងរបស់ប្រធានាធិបតីអាមេរិក លោក ដូណាល់ ត្រាំ ក្នុងការដាក់ទណ្ឌកម្មលើប្រទេស ឬបុគ្គលដែលទិញប្រេងពីអ៊ីរ៉ង់ផងដែរ៕
​