ការនាំចេញក្រពើទៅចិនជាផ្លូវការ មិនទាន់​បាននៅឡើយ ខណៈក្រពើកំពុងក្រាបពង

លោក គង់ ម៉ី អនុប្រធានសហគមន៍អ្នកចិញ្ចឹមក្រពើ ខេត្តសៀមរាប បានឱ្យដឹងថា ការនាំចេញក្រពើទៅចិនជាផ្លូវការ នៅពុំទាន់បាននៅឡើយ ខណៈក្រពើតាមកសិដ្ឋានកំពុងក្រាបពង។ ទីផ្សារចិននឹងផ្តល់ក្តីរំពឹងខ្ពស់សម្រាប់អាជីវកម្មចិញ្ចឹមក្រពើរបស់កម្ពុជាឱ្យមានសន្ទុះឡើងវិញ ដោយសារតែបញ្ហាកង្វះទីផ្សារនាពេលកន្លងមកបានធ្វើឱ្យអ្នកនៅក្នុងវិស័យនេះជួបប្រទះនូវការលំបាកយ៉ាងខ្លាំងនាប៉ុន្មានឆ្នាំចុងក្រោយនេះ។

ថ្លែងប្រាប់ កម្ពុជាថ្មី នៅថ្ងៃទី០៥ ខែឧសភា នេះ លោក គង់ ម៉ី បញ្ជាក់ថា «ក្រពើនៅក្នុងសហគមន៍របស់លោកនាពេលបច្ចុប្បន្ននេះ កំពុងតែក្រាបពងច្រើន ដែលនេះជាហេតុដែលមិនអាចនាំចេញក្រពើឆ្ពោះទៅកាន់ទីផ្សារប្រទេសចិន បាននៅឡើយ ដោយទុកឱ្យក្រពើទាំងនេះក្រាបពងអស់សិន ទើបនាំ​ចេញ»។

អនុប្រធានសហគមន៍រូបនេះ បានឱ្យដឹងទៀតថា សព្វថ្ងៃក្រពើក្នុងសហគមន៍របស់លោកមានត្រឹមចន្លោះ ២០កសិដ្ឋាន ទៅ២៥កសិដ្ឋានតែប៉ុណ្ណោះ បើធៀបនឹងប៉ុន្មានឆ្នាំមុនៗ ឃើញថា មុខរបរចិញ្ចឹមក្រពើនេះ មានការថយចុះយ៉ាងខ្លាំង ផងដែរ។

គួរឱ្យដឹងថា ក្នុងដំណើរ​ទស្សនកិច្ច​របស់​ប្រធានាធិបតី​ចិន​លោក ស៊ី ជិនពីង មក​ប្រទេស​កម្ពុជា កាលពីថ្ងៃទី១៧ និង១៨ ខែមេសា កន្លងទៅ មាន​ការ​ចុះ​ហត្ថលេខា​លើឯកសារ​​ពិធីសារ​ចំនួន ៣ សម្រាប់​ការ​នាំ​ចេញ​ផលិតផល​កសិកម្ម​ចំនួន ៣ មុខ របស់​កម្ពុជាទៅ​ទីផ្សារ​ប្រទេស​ចិន។

ក្នុង​នោះ​មាន​ពិធីសារស្តីពីលក្ខខណ្ឌតម្រូវចត្តាឡីស័កនិង​សុខភាព សម្រាប់​ការនាំចេញ​ក្រពើ​ដែល​បាន​បង្កាត់​ពូជ​នៅ​ កសិដ្ឋាន​​ពីព្រះរាជាណាចក្រកម្ពុជា ទៅ​សាធារណរដ្ឋប្រជាមានិត​ចិន ផងដែរ៕

អត្ថបទ ៖ សួស សិត