ភ្លៀងធ្លាក់ខ្លាំង​ប៉ុន្មានថ្ងៃ​​​ បង្កជាទឹកជំនន់ និង​បំណាក់​ដី​ក្នុង​ខេត្ត​ឈៀង​ម៉ៃ ប្រទេសថៃ

យោងតាមការចេញផ្សាយរបស់កាសែត Bangkok Post នៅថ្ងៃទី២៧ខែឧសភានេះ ភ្លៀងធ្លាក់ខ្លាំងជាបន្តបន្ទាប់​​ក្នុងរយៈពេលប៉ុន្មានថ្ងៃ​មក​នេះ​​ បាននាំឱ្យមានទឹកជំនន់ភ្លាមៗ និងបំណាក់ដីយ៉ាងធ្ងន់ធ្ងរនៅក្នុងផ្នែកខ្លះនៃខេត្តឈៀងម៉ៃ ជាពិសេសនៅតាមដងទន្លេ Mae Klang ក្នុងស្រុក Chom Thong ។

អាជ្ញាធរថៃ​​បានរាយការណ៍ពីការកើនឡើងកម្ពស់ទឹក និងការខូចខាតហេដ្ឋារចនាសម្ព័ន្ធ ជំរុញឱ្យមានការជម្លៀសចេញ និង​ការឆ្លើយតបជាបន្ទាន់។ ដោយគិតត្រឹមព្រឹកថ្ងៃអង្គារ ភ្លៀងធ្លាក់ជាបន្តបន្ទាប់ ជាពិសេស​ចាប់តាំង​ខ្លាំង​នៅ​​យប់ថ្ងៃចន្ទបាន​បណ្តាលឱ្យទឹកហូរចេញពីតំបន់ព្រៃឈើ Doi Inthanon ហៀរលើទន្លេ Mae Klang ក្នុងស្រុក Chom Thong ជាមួយនឹងកម្រិតទឹកឡើងដល់ ៣.៨៦ ម៉ែត្រ​គិត​ត្រឹម​ព្រឹកថ្ងៃអង្គារ ខណៈកម្រិតគ្រោះមហន្តរាយនៅកម្រិត​កម្ពស់​ ៤.៥ ម៉ែត្រ។

ជាពិសេសភូមិ​ទី​៤ ក្នុង​ក្រុង Ban Mae Klang រង​ការ​ប៉ះពាល់​ខ្លាំង​បំផុត ដោយ​អ្នក​ស្រុក​ត្រូវ​ជម្លៀស​ចេញ​ទាំង​យប់ ដោយ​​មាន​ជំនួយ​ពី​មន្ត្រី​មូលដ្ឋាន។ លើសពីនេះក៏មានទឹកជន់ហូរហៀពីប្រឡាយនានា និងបំណាក់ដីខូតខាតផ្លូវខ្លះ ជំរុញឲ្យអាជ្ញាធរ​បិទ​ផ្លូវ និង​បញ្ជូន​អ្នក​ជួសជុលស្តារ​ឡើងវិញ។

អាជ្ញាធរខេត្តឈៀងម៉ៃក៏បានដាស់តឿនអ្នកបើកបរយានយន្តឲ្យមានការប្រុងប្រយ័ត្ន និងពិនិត្យស្ថានភាពផ្លូវមុនពេលធ្វើដំណើរ ព្រោះថានឹងមានភ្លៀងធ្លាក់កាន់តែច្រើន ខណៈក្រុម​សង្គ្រោះ​បន្ទាន់​នៅ​តែត្រៀមខ្លួនក្នុង​ការ​ឆ្លើយ​តប​ចំពោះ​ឧបទ្ទវហេតុ​បន្ថែម​ទៀត​នៅ​ពេល​ដែល​ស្ថានការណ៍​មាន​ការ​វិវត្តបន្ថែម៕

អត្ថបទ៖ ប៊ុន សុភាព