ធ្ងន់ធ្ងរ ខេត្តស្វាយរៀងឈានដល់​បិទកាស៊ីណូបណ្តោះអាសន្ន

រដ្ឋបាលខេត្តស្វាយរៀងនៅថ្ងៃទី ៣០ ខែមីនានេះ បានប្រកាសស្នើទៅម្ចាស់កាស៊ីណូទាំងអស់នៅក្នុងខេត្តស្វាយរៀង ផ្អាកដំណើរការជាបណ្តោះអាសន្ន ដើម្បីការពារការឆ្លងរាលដាលជំងឺកូវីដ១៩ក្នុងខេត្ត ស្របពេលដែលតួលេខឆ្លងក្នុងខេត្តកំពុងហក់ឡើងរៀងរាល់ថ្ងៃ។

សេចក្តីប្រកាសរដ្ឋបាលខេត្ត បានជម្រាបជូន លោកនាយកក្រុមហ៊ុន កាស៊ីណូក្នុងខេត្តស្វាយរៀង ដែលបានចុះ អនុស្សរណៈយោគយល់ជាមួយក្រសួងសុខាភិបាល អោយបានជ្រាបថា “នាពេលបច្ចុប្បន្ន នេះ ស្ថានភាពនៃការរីករាលដាលជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ កំពុងបន្តកើតឡើង គួរឱ្យមានការព្រួយបារម្ភ ។ ដូច្នេះអាជ្ញាធរខេត្តស្វាយរៀង សូមធ្វើការផ្អាកសកម្មភាព អាជីវកម្មគ្រប់ប្រភេទ ដែលកំពុងដំណើរ ការ នៅក្នុងកាស៊ីណូ របស់លោកអ្នកជាបណ្តោះអាសន្ន ចាប់ពីថ្ងៃទី៣០ ខែមីនា ឆ្នាំ២០២១នេះ រហូតដល់មានការជូនដំណឹងសារជាថ្មី”។

ខេត្ត​ស្វាយរៀង​ជាខេត្តជាប់ព្រំដែនវៀតណាម បាន​ផ្ទុះ​ករណី​ឆ្លង​កូវីដ១៩ ក្នុង​ទ្រង់ទ្រាយ​ធំ​រយៈ​ពេល ២៤ ម៉ោង​នេះ រកឃើញអ្នកឆ្លងរហូតដល់ទៅ ១៩ នាក់ ក្នុង​នោះ​មាន​ជនជាតិ​ចិន ០៧ នាក់ និង​ខ្មែរ ១២ នាក់។ បច្ជុប្បន្នអ្នកទាំងនោះត្រូវបានដាក់ឱ្យសម្រាកព្យាបាលនៅមន្ទីពេទ្យបង្អែកស្វាយជ្រុំ ខេត្តស្វាយរៀង៕

អត្ថបទ៖ភក្ដី