ព័ត៌មានអន្ដរជាតិ

ក្នុងពិធីបុណ្យកាន់ទុក្ខមេដឹកនាំកំពូលអ៊ីរ៉ង់ មានការចាប់អារម្មណ៍ខ្លាំង លើប្រតិភូរុស្ស៊ី ដឹកនាំដោយ លោក Medvedev

បានផុស

២៨ វិនាទី មុន

នៅ

ថ្ងៃសៅរ៍ ៤ កក្កដា ២០២៦

ដោយ

ការរៀបចំពិធីកាន់ទុក្ខសម្រាប់អតីតមេដឹកនាំកំពូលអ៊ីរ៉ង់ លោក Ayatollah Ali Khamenei នៅទីក្រុងតេហេរ៉ង់ បានប្រព្រឹត្តទៅក្រោមការចូលរួមពីតំណាងជាង១០០ប្រទេស ដោយយោងតាមប្រព័ន្ធផ្សព្វផ្សាយអ៊ីរ៉ង់ ប៉ុន្តែ គណៈប្រតិភូរុស្ស៊ី ដឹកនាំដោយ លោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ី ទទួលការចាប់អារម្មណ៍ខ្លាំងក្នុងចំណោមគណៈប្រតិភូកម្រិតខ្ពស់ទៅចូលរួមពិធីកាន់ទុក្ខនោះ។

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev (ឆ្វេង) ជួបសន្ទនាជាមួយប្រធានាធិបតីអ៊ីរ៉ង់។ TASS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានដឹកនាំគណៈប្រតិភូរុស្ស៊ី រួមមានរដ្ឋមន្ត្រីថាមពលរុស្ស៊ី លោក Sergey Tsivilev អនុរដ្ឋមន្ត្រីការបរទេស លោក Georgy Borisenko និងអ្នកដទៃទៀត សម្រាប់ពិធីកាន់ទុក្ខអតីតមេដឹកនាំកំពូលអ៊ីរ៉ង់ ដែលត្រូវបានសម្លាប់ដោយការវាយប្រហាររួមគ្នា របស់អ៊ីស្រាអែល និងសហរដ្ឋអាមេរិក កាលថ្ងៃទី២៨ខែកុម្ភៈ ២០២៦នេះ។

យោងទូរទស្សន៍រដ្ឋអ៊ីរ៉ង់ IRIB ប្រតិភូពីបណ្តាប្រទេសផ្សេងៗជាង១០០ ត្រូវបានរំពឹងចូលរួមក្នុងពិធីកាន់មរណទុក្ខមេដឹកនាំកំពូលអ៊ី៉រ៉ង់ ដែលចាប់បានចាប់ផ្តើមកាលពីថ្ងៃសុក្រទី៣ រហូតដល់ថ្ងៃទី៩ខែកក្កដា។

ប្រទេសដែលមានថ្នាក់ដឹកនាំប្រទេសចូលរួម ភាគច្រើនគឹនៅតំបន់អាស៊ីកណ្តាល ហើយប្រទេសមួយចំនួនទៀតដែលមានប្រតិភូជាន់ខ្ពស់ មានដូចជា ប្រទេសចិន ប៉ាគីស្ថាន ឥណ្ឌា ជាដើម។

ជាផ្នែកមួយនៃដំណើរទស្សនកិច្ចទៅចូលរួមកាន់ទុក្ខនោះ ប្រតិភូរុស្ស៊ីដឹកនាំដោយ លោក Medvedev ក៏បានជួបជាមួយប្រធានាធិបតីអ៊ីរ៉ង់ លោក Masoud Pezeshkian ដែលបង្ហាញពីចំណងមិត្តភាពនៃប្រទេសទាំងពីរយ៉ាងជ្រាលជ្រៅ។ នេះបើយោងតាមវីដេអូដែលបានចេញផ្សាយនៅលើប្រព័ន្ធផ្សព្វផ្សាយសង្គមរបស់លោក Medvedev។

ក្បួនដង្ហែសពរបស់លោក Ali Khamenei ដែលបានស្លាប់យ៉ាងសោកនាដកម្មនៅក្នុងការវាយប្រហារតាមអាកាសរបស់អាមេរិក និងអ៊ីស្រាអែល បានចាប់ផ្តើមនៅទីក្រុងតេអេរ៉ង់នៅថ្ងៃទី ៣ ខែកក្កដា។ ចាប់ពីថ្ងៃទី ៤ ដល់ថ្ងៃទី ៥ ខែកក្កដា សពរបស់លោក Khamenei នឹងត្រូវតម្កល់នៅ Mosallah ក្នុងទីក្រុងតេហេរ៉ង់ ដែលជាអគារសាសនា និងសាធារណៈធំបំផុតរបស់ទីក្រុង ដែលអនុញ្ញាតឱ្យអ្នកកាន់ទុក្ខចូលរួមរំលែកទុក្ខ។

នៅថ្ងៃទី ៦ ខែកក្កដា ក្បួនដង្ហែដ៏ឧឡារិកមួយនឹងធ្វើដំណើរឆ្លងកាត់ដងផ្លូវសំខាន់ៗនៃទីក្រុងតេហេរ៉ង់ ដោយបញ្ចប់ដោយការដឹកជញ្ជូនសពរបស់លោកទៅកាន់ទីក្រុង Qom ដែលជាមជ្ឈមណ្ឌលសាសនាឈានមុខគេរបស់ប្រទេសអ៊ីរ៉ង់ ជាកន្លែងដែលពិធីបុណ្យសពនឹងត្រូវប្រារព្ធឡើងនៅថ្ងៃទី ៧ ខែកក្កដា។

នៅថ្ងៃបន្ទាប់ គឺថ្ងៃទី ៨ខែកក្កដា សពរបស់លោកនឹងត្រូវយកទៅប្រទេសអ៊ីរ៉ាក់ជិតខាង ជាកន្លែងដែលពិធីដាច់ដោយឡែកនឹងគោរពដល់លោកនៅ Karbala និង Najaf ដែលជាកន្លែងគោរពបូជាសម្រាប់ប្រជាជនមូស្លីម Shia។ ជាចុងក្រោយ នៅថ្ងៃទី ៩ ខែកក្កដា សពរបស់ លោក Ali Khamenei នឹងត្រូវបញ្ចុះនៅស្រុកកំណើតរបស់លោក នៅ Mashhad៕

រ៉ាន់ រើយ