ព័ត៌មានអន្ដរជាតិ

មេដឹកនាំកំពូលអ៊ីរ៉ង់ ជំទាស់ដាច់អហង្ការចំពោះសំណើរបស់អាមេរិក ប្ដេជ្ញាបន្តចម្រាញ់អ៊ុយរ៉ាញ៉ូម

បានផុស

៥១ វិនាទី មុន

នៅ

ថ្ងៃពុធ ៤ មិថុនា ២០២៥

ដោយ

Chheang

មេដឹកនាំកំពូលរបស់អ៊ីរ៉ង់ លោក Ayatollah Ali Khamenei នៅថ្ងៃទី៤ខែមិថុនានេះបានច្រានចោលយ៉ាងដាច់អហង្ការចំពោះសំណើររបស់សហរដ្ឋអាមេរិកដែលមានគោលបំណងទប់ស្កាត់សកម្មភាពចម្រាញ់សារធាតុអ៊ុយរ៉ាញ៉ូមទាំងស្រុងរបស់ទីក្រុងតេហេរ៉ង់។ លោក Khamenei អះអាងថា ការទាមទារបែបនេះធ្វើឲ្យប៉ះពាល់ដល់អធិបតេយ្យភាព និងប្រឆាំងផលប្រយោជន៍ជាតិរបស់អ៊ីរ៉ង់។

លោក Ayatollah Ali Khamenei (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាដែលថ្លែងនៅឯទីបញ្ចុះសពរបស់អតីតមេដឹកនាំកំពូលអ៊ីរ៉ង់ Ruhollah Khomeini លោក Khamenei បានសង្កត់ធ្ងន់លើសារៈសំខាន់នៃការចម្រាញ់សារធាតុអ៊ុយរ៉ាញ៉ូមនៅក្នុងកម្មវិធីនុយក្លេអ៊ែររបស់ខ្លួន ដោយបញ្ជាក់ថា «ប្រសិនបើយើងមានរោងចក្រថាមពលនុយក្លេអ៊ែរ១០០កន្លែង ខណៈពេលដែលមិនមានការចម្រាញ់(អ៊ុយរ៉ាញ៉ូម) នោះវាមិនអាចប្រើប្រាស់បានសម្រាប់យើងទេ»។ លោកបានរិះគន់សំណើរបស់អាមេរិក ដែលបញ្ជូនតាមរយៈអ្នកសម្រុះសម្រួលអូម៉ង់ ថាជាការប៉ុនប៉ងដើម្បីរុះរើឧស្សាហកម្មនុយក្លេអ៊ែររបស់អ៊ីរ៉ង់ និងធ្វើឲ្យប្រទេសខ្លួនពឹងផ្អែកលើមហាអំណាចបរទេសសម្រាប់តម្រូវការថាមពលក្នុងស្រុក។

លោក Khamenei បាននិយាយថា «ការចម្រាញ់សារធាតុអ៊ុយរ៉ាញ៉ូមគឺជាគន្លឹះនៃកម្មវិធីនុយក្លេអ៊ែររបស់យើង ហើយសត្រូវបានផ្តោតទៅលើការចម្រាញ់នោះ»។ លោកបន្តថា សំណើរបស់អាមេរិក «ផ្ទុយពីជំនឿរបស់ប្រជាជាតិយើងក្នុងការពឹងផ្អែកលើខ្លួនឯង និងគោលការណ៍ “យើងអាចធ្វើបាន”»។

លោកក៏បានបន្ថែមទៀតថា «ក្រុមមេដឹកនាំដ៏ឈ្លើយ និងក្រអឺតក្រទមរបស់អាមេរិក ទាមទារម្តងហើយម្តងទៀតថា យើងមិនគួរមានកម្មវិធីនុយក្លេអ៊ែរ។ តើអ្នកជានរណាក្នុងការសម្រេចថាតើប្រទេសអ៊ីរ៉ង់គួរតែមានការចម្រាញ់ឬក៏អត់»។

ក្រុងតេហេរ៉ង់ និយាយថា ខ្លួនចង់ធ្វើជាម្ចាស់លើបច្ចេកវិទ្យានុយក្លេអ៊ែរសម្រាប់គោលបំណងសន្តិវិធី ហើយបានបដិសេធជាយូរមកហើយនូវការចោទប្រកាន់របស់មហាអំណាចលោកខាងលិចដែលថា ខ្លួនកំពុងស្វែងរកការអភិវឌ្ឍអាវុធនុយក្លេអ៊ែរ។

សូមរឭកថា ប្រធានាធិបតី ដូណាល់ ត្រាំ កាលពីថ្ងៃទី២ខែមិថុនា បានប្រកាសជាសាធារណៈថា កិច្ចព្រមព្រៀងនុយក្លេអ៊ែរអនាគតណាមួយជាមួយប្រទេសអ៊ីរ៉ង់ នឹងហាមឃាត់ការចម្រាញ់សារធាតុអ៊ុយរ៉ាញ៉ូមទាំងស្រុង។ លោក ត្រាំ បង្ហោះសារនៅលើ Truth Social ថា «ក្រោមកិច្ចព្រមព្រៀងសក្តានុពលរបស់យើង – យើងនឹងមិនអនុញ្ញាតឲ្យមានការចម្រាញ់អ៊ុយរ៉ានីញ៉ូមណាមួយឡើយ»។

ការចម្រាញ់សារធាតុអ៊ុយរ៉ាញ៉ូមនៅតែជាចំណុចសំខាន់នៃការឈ្លោះប្រកែកគ្នានៅក្នុងកិច្ចចរចាចំនួន៥លើកគិតចាប់តាំងពីខែមេសា ដើម្បីចុះហត្ថលេខាលើកិច្ចព្រមព្រៀងថ្មីមួយ ជំនួសឲ្យកិច្ចព្រមព្រៀងចាស់ដែលលោក ត្រាំ ធ្លាប់បានបោះបង់ចោលជាឯកតាភាគីក្នុងអំឡុងពេលអាណត្តិដំបូងរបស់គាត់កាលពីឆ្នាំ២០១៨។

ទីភ្នាក់ងារថាមពលអាតូមិកអន្តរជាតិ (IAEA) នាពេលថ្មីៗនេះ បានរាយការណ៍ថា អ៊ីរ៉ង់បានបង្កើនការចម្រាញ់សារធាតុអ៊ុយរ៉ាញ៉ូមដល់កម្រិតភាពសុទ្ធ ៦០% ដែលកៀកជិតដល់កម្រិត ៩០% ក្នុងការផលិតអាវុធនុយក្លេអ៊ែរ។ របាយការណ៍នេះបានបង្កើនការព្រួយបារម្ភក្នុងចំណោមមន្ត្រីអាមេរិក និងអ៊ីស្រាអែល ដោយលោក ត្រាំ បានព្រមានអំពីសកម្មភាពយោធាដែលអាចកើតមាន ប្រសិនបើកិច្ចខិតខំប្រឹងប្រែងការទូតត្រូវបរាជ័យ៕

ដោយ៖ ឈាង

ចុចអាន៖ លោក ត្រាំ ប្រកាសថា កិច្ចព្រមព្រៀងជាមួយអ៊ីរ៉ង់ដាច់ខាតមិនឲ្យមានការចម្រាញ់អ៊ុយរ៉ាញ៉ូម