គណបក្ស​សំខាន់២​ទៀត​ក្នុងរដ្ឋាភិបាល​ចម្រុះ បដិសេធ​​ ផែថងថាន កាន់តំណែង​បន្ត​

​គណបក្ស​​សំខាន់​​ធំ២​​ រួម​មានគណបក្ស​​ថៃ​រួបរួម​ជាតិ និង​គណបក្ស​ប្រជាធិបតេយ្យ ដែលមានអាសនៈសភា​សរុប​ ៦១​​កៅអី​ ក្នុងរដ្ឋាភិបាល​ចម្រុះ​​ដឹកនាំ​ដោយ​គណបក្ស​ភឿថៃបច្ចុប្បន្ន​ ​បាន​ប្រជុំបន្ទាន់​​ក្នុងគណបក្ស​របស់​ពួកគេ​រៀងៗខ្លួន នៅល្ងាច​​ថ្ងៃ​ព្រហស្បតិ៍​នេះ ដោយ​បង្ហាញ​ជំហរ​មិន​គាំទ្រ​​​​​​លើ​នាយករដ្ឋមន្ត្រី ផែថង​ថាន​ ស៊ីណាវ៉ាត្រ ឲ្យ​បន្ត​ដំណែង​​​​ទៀត​នោះទេ​។

​​សេចក្តីរាយការណ៍​ដាច់​ដោយ​ឡែក​ពីគ្នា​​របស់​បណ្តាញ​សង្គម​នៃ​សារ​ព័ត៌មាន Khaosod ​​បានបង្ហាញ​ថា គណបក្ស​ ​​ថៃ​រួបរួមជាតិ (United Thai Nation) ដែល​បង្កើត​ឡើង​ដោយ​​អតីត​នាយករដ្ឋមន្ត្រី​ ប្រាយុធ ចាន់អូចា ដែលបាន​ធ្វើ​រដ្ឋ​ប្រហារទម្លាក់​ អ្នកស្រី យីងឡាក់ ស៊ីណាវ៉ាត្រ កាលឆ្នាំ​២០១៤ នោះ មិនគាំទ្រ​នាយករដ្ឋ​មន្ត្រី​​ ផែថងថាន ស៊ីណាវ៉ាត្រ ដែល​ធ្វើឲ្យ​នយោបាយ​ថៃ​​ជួបវិបត្តិផ្ទៃក្នុង បន្ត​តំណែង​ទៅមុខ​ទៀត​នេះ​ទេ។

សេចក្តីរាយការណ៍​នោះ បាន​លើក​ឡើង​ថា ​គណៈកម្មាធិការប្រតិបត្តិនៃគណបក្ស United Thai Nation ដែល​បច្ចុបន្ន​មាន​សមាជិកសភា​៣៦​អាសនៈ បានស្នើផ្លាស់ប្តូរនាយករដ្ឋមន្ត្រី​ ពី​​លោកស្រី ផែថងថាន ស៊ីណាវ៉ាត្រ ទៅឲ្យ​លោក​ Chaikasem Nitisiri ដែលជាបេក្ខជនលំដាប់ទីបីនៃគណបក្សភឿថៃ ដែលជាគណបក្សស្នូលរបស់រដ្ឋាភិបាលចម្រុះ។

គណបក្ស​​ប្រជាធិបតេយ្យ (Democrat Party) ​ដែល​​​មានសមាជិក​សភា​២៥​អាសនៈ ហើយ​មេដឹកនាំ​នៃ​គណបក្ស​នេះ​កំពុង​កាន់​តំណែង​​ប្រធានសភាជាតិ ក៏បាន​​​បើកកិច្ច​​ប្រជុំបន្ទាន់​របស់​គណបក្ស​ ដោយ​​ប្រើ​ពេលបីម៉ោងកាលពីល្ងាចថ្ងៃព្រហស្បតិ៍ ដោយ​គណបក្សប្រជាធិបតេយ្យ​នឹង​សម្រេចចេញសេចក្តីថ្លែងការណ៍ដោយមេដឹកនាំរបស់ខ្លួន និងចរចាជាមួយគណបក្សភឿថៃ បន្ថែមទៀត​។

ទោះបី​ជាយ៉ាងណា តាមការចេញផ្សាយ​នេះ ​​មន្ត្រី​នៃ​គណបក្ស​នេះ​​ បានសង្កត់ធ្ងន់ថា ពួកគេមិនស្វែងរកមុខតំណែងនយោបាយនៅក្នុងគណៈរដ្ឋមន្ត្រី​​ថ្មី​នោះទេ​។ ​ទោះបីជា​បែបនេះ​ ជំហររបស់​គណបក្ស​នេះ​នៅ​មិនទាន់ច្បាស់​នៅឡើយថា នឹង​បន្ត​​នៅ​​ជាមួយរដ្ឋាភិបាលចម្រុះ ឬ​ក៏ត្រូវ​បញ្ចប់សម្ព័ន្ធ​ភាព​នោះទេ​ ដោយសារ​ថា​ នាយក​ប្រតិបត្តិ​គណបក្ស​ភាគច្រើន​ពេញចិត្ត​នឹង​ការ​បន្ត​នៅ​ក្នុង​រដ្ឋាភិបាល​ចម្រុះ៕

រ៉ាន់ រើយ​