ឥណ្ឌូណេស៊ី អារ៉ាប៊ីសាអ៊ូឌីត ចុះកិច្ចព្រមព្រៀងវិនិយោគតម្លៃជិត ៣០ ប៊ីលានដុល្លារ

ឥណ្ឌូណេស៊ី និងអារ៉ាប៊ីសាអូឌីត បានចុះកិច្ចព្រមព្រៀង​សម្រាប់ការវិនិយោគ​តម្លៃ ២៧ ប៊ីលាន​ដុល្លារ ឬប្រហែល ៤៣៧ ទ្រីលានរូពៀរឥណ្ឌូណេស៊ី ដែលគ្រប់ដណ្ដប់លើវិស័យផ្សេងៗ ​រួមទាំងថាមពលស្អាត គីមីឥន្ធនៈ និងសេវាកម្មឥន្ធនៈអាកាសចរណ៍។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រដ្ឋ Antara ​នៅថ្ងៃព្រហស្បតិ៍។

ការព្រមព្រៀងនេះ ធ្វើឡើងជាផ្លូវការ​ក្នុងជំនួបទ្វេភាគីរវាងប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ ​និងរជ្ជទាយាទ និងជានាយករដ្ឋមន្ត្រីអារ៉ាប៊ីសាអូឌីត ព្រះអង្គម្ចាស់ Mohammed bin Salman bin Abdulaziz Al Saud ​នៅទីក្រុង Jeddah ​នៃប្រទេសអារ៉ាប៊ីសាអូឌីត កាលពីថ្ងៃពុធ។

មេដឹកនាំទាំង ២ បាននិយាយ​ក្នុងសេចក្តីថ្លែងការណ៍រួមថា៖ «ភាគីទាំង២ ស្វាគមការចុះហត្ថលេខាលើកិច្ចព្រមព្រៀង និងអនុស្សរណៈនៃការយោគយល់គ្នាមួយចំនួនក្នុងដំណើរទស្សនកិច្ចនេះរវាងស្ថាប័នវិស័យឯកជន​ក្នុងតម្លៃប្រហែល ២៧ ប៊ីលានដុល្លារអាមេរិក ក្នុងវិស័យជាច្រើនរួមទាំងថាមពលស្អាត ឧស្សាហកម្មគីមីឥន្ធនៈ និងសេវាកម្មឥន្ធនៈអាកាសចរណ៍ ដែលឆ្លុះបញ្ចាំងពីបំណងប្រាថ្នារបស់ពួកគេសម្រាប់ភាពជាដៃគូសេដ្ឋកិច្ចជឿនលឿន»។

លើសពីនេះ ភាគីទាំង ២ បានប្តេជ្ញាចិត្តគាំទ្រការវិនិយោគលើវិស័យឱសថ វ៉ាក់សាំង ឧស្សាហកម្មបច្ចេកវិទ្យាសុខាភិបាល និងវិស័យអភិវឌ្ឍន៍ធនធានមនុស្ស ខណៈបានសង្កត់ធ្ងន់លើសារៈសំខាន់នៃការពង្រឹងភាពជាដៃគូក្នុងវិស័យយុទ្ធសាស្ត្រផ្សេងៗ ដែលរួមមាន​ សេដ្ឋកិច្ចឌីជីថល ប្រព័ន្ធយុត្តិធម៌ ការងារ វប្បធម៌ ទេសចរណ៍ យុវជន និងកីឡា ការអប់រំ និងការស្រាវជ្រាវវិទ្យាសាស្ត្រ ឧស្សាហកម្ម និងរ៉ែ កសិកម្ម នេសាទ និងសន្តិសុខស្បៀង ព្រមទាំងការកែលម្អការតភ្ជាប់ជើងហោះហើរ៕