ការនាំចេញកសិផលកម្ពុជា កើនឡើងដល់ជាង ២,៨ ពាន់លានដុល្លារ នៅឆមាសទី១ ឆ្នាំនេះ

នៅឆមាសទី១ ឆ្នាំ ២០២៥នេះ កម្ពុជានាំចេញទំនិញ​កសិផលទៅក្រៅប្រទេស​សម្រេច​បាន​ទំហំ​ទឹកប្រាក់ជាង ២ ៨៧២ ដុល្លារ កើនឡើង ២២,៦៦% ធៀបនឹងរយៈពេលដូចគ្នាកាលពីឆ្នាំ ២០២៤។

យោងតាមរបាយការណ៍របស់ អគ្គនាយកដ្ឋានកសិកម្មបង្ហាញថា កសិផលចម្បងៗដែលត្រូវបាននាំចេញរួមមានស្រូវជាង ៣,១ លានតោន អង្ករ មានជាង ៣៨ ម៉ឺនតោន ដំឡូងមី គ្រាប់ស្វាយចន្ទី ចេក ស្វាយ ផ្លែមៀន ម្រេច និងកសិផលផ្សេងៗទៀត។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កំណើននៃការនាំចេញនេះ ជាលទ្ធផលដែលកើត​ចេញពី​ការ​បើកទីផ្សារថ្មី ការបង្កើនសមត្ថភាព​ប្រ​កួត​ប្រជែង ដែលអនុញ្ញាតឱ្យកសិផលកម្ពុជា​ដល់ចំ​ណាត់​​​​​ថ្នាក់​អាចនាំចេញបាន ហើយក​សិផល​កម្ពុជា​ភាគច្រើន​នាំ​ចេ​ញ​​ជា​ផ្លូវ​ការ ដែលជាសញ្ញាល្អ។

លោក ឃឹម ហ្វីណង់ បញ្ជាក់ថា៖ «ចន្ទីជាកសិផលមួយទាក់ទាញ ថ្មីៗនេះ យើងបានក្លាយជាអ្នក​ផលិត​​ចន្ទីធំជាងគេមួយក្នុងពិភពលោក ហើយយើងមានឱកាសក្លាយ​ជាប្រទេស​អធិរាជស្វាយ​ចន្ទី​ពិត​ប្រាកដក្នុងអាណត្តិនេះ»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា ការនាំចេញទំនិញ​របស់​​កម្ពុជាមានកំណើន ដោយសារទីផ្សារបញ្ជាទិញ ពោលគឺពាក់ព័ន្ធនឹងអស្ថិរភាពក្នុងតំបន់ ដូច​ជា​អស្ថិរភាព​នយោបាយនៅប្រទេសភូមា បង់​ក្លាដេស បានធ្វើឱ្យរោងចក្រមួយចំនួនរើមកកម្ពុជា ដែល​ធ្វើឱ្យការបញ្ជាទិញមានការកើនឡើងទាំងការវិនិយោគ និងនាំចេញ។

យោងតាមក្រសួងកសិកម្ម នៅឆ្នាំ ២០២៤ កម្ពុជាទទួលបានចំណូលជាង ៥,២ ពាន់លាន​ដុល្លារ ពីការនាំចេញកសិផលចំនួនជិត ១២ លានតោន ទៅកាន់គោលដៅ ៩៥ ប្រទេស កើនឡើងប្រមាណ ៣៩% ធៀបនឹងឆ្នាំ ២០២៣។

ទីផ្សារសំខាន់ៗ ដែលកម្ពុជាបាននាំចេញទំនិញទៅរួមមាន៖ ប្រទេសចិន សហរដ្ឋអាមេរិក វៀតណាម ជប៉ុន និងទីផ្សារ​សំខាន់ៗមួយចំនួនទៀត៕

អត្ថបទ៖ ឡេង ដេត